افغانستان اۉغلاق ملی تیرمه جماعهسینینگ قزاقستانده جهان بیلهشوولریده اشتراک اېتیش اوچون ترکیبی انیقلندی.
۸صبح، کابل: طالبان نظارتیدهگی افغانستاننینگ اۉغلاق، نیزه اۉیینی و محلی سپورت تورلری ملی فدراسیونیدن بۉلگن منبعلرنینگ ایتیشیچه، افغانستان اۉغلاق ملی تیرمه جماعهسینینگ ترکیبی انیقلنگن.
منبعلرگه کۉره، قزاقستانده بۉلیب اۉتهدیگن جهان مسابقهسیده اشتراک اېتیش اوچون افغانستان اۉغلاق ملی تیرمه جماعهسیگه محمدابراهیم حکیمی، عبدالسمیع عاشوری، محمدالیاس عمرخیل، دادالله احمدی، صدرالحق پهلوانزاده، صفتالله پهلوان، حاجی محمد افغان، فرید صفری، احمد جاوید مزاری، نجیب الله، سیدمسعود شیرپور و عبدالسلام ایماق چقیریلگن.
اوشبو اۉن ایکّی کیشیلیک جماعه افغانستان تامانیدن قزاقستانده بۉلیب اۉتهدیگن مملکتلر اۉرتهسیدهگی اۉغلاق بیلهشوولریده اشتراک اېتهدی.
منبعلرنینگ معلوماتیگه کۉره، افغانستاننینگ اۉغلاق ملی تیرمه جماعهسی شو آی نینگ ۱۴-سیده قزاقستانگه یۉل آلهدی.
دیمک اۉغلاق افغانستاننینگ عنعنوی سپورت تورلریدن بیری بۉلیب، سۉنگی ییللرده محلی اۉیینلرگه قوشیمچه کابلده ملی لیگه دایرهسیده هم اۉتکزیلهدی.
افغانستاننینگ یېتّینچی دور اۉغلاق لیگهسی یقینده کابلده ایچکی و چیتایللیک اۉغلاقچیلر حضوریده اۉتکزیلیب سرپل جماعهسی قهرمانلیگی و بدخشان جماعهسی ایکّینچی اۉریننی اېگهللشی بیلن یکونلندی.
