طالبان و اۉزبېکستان دارو-درمان همده طبی جهازلر ساحه‌سیده همکارلیکنی رواجلنتیریشگه اورغو بېردیلر
طالبان ساغلیقنی سقلش وزیرلیگی طالبان‌نینگ آزیق-آوقت و دارو بۉییچه اۉرین‌باسری حمدالله زاهد اۉزبېکستان ساغلیقنی سقلش وزیری‌نینگ اۉرین‌باسری و اۉزبېکستان دارو صناعتینی رواجلنتیریش آژانسی‌نینگ باشلیغی عبدالله عزیزاوف بیلن اوچره‌شگنینی معلوم قیلدی.
طالبان ساغلیقنی سقلش وزیرلیگی یک‌شنبه کونی، ۲۸ سرطان، اعلان قیلگن بیاناتیده اوشبو اوچره‌شوو وزیرلیک‌نینگ آزیق-آوقت و دارو بۉییچه اۉرین‌باسری‌نینگ اۉزبېکستانگه رسمی سفری دایره‌سیده بۉلیب اۉتگنینی بیلدیردی.
طالبان‌نینگ اَیتیشیچه، تامانلر اوشبو اوچره‌شووده دارو-درمان، طبی اسکونه‌لر، ساغلیقنی سقلش و آزیق-آوقت محصولاتلری ساحه‌لریده ایکّی تامانلمه همکارلیکنی کېنگه‌یتیریش همده تجربه المشیش مسأله‌لرینی محاکمه قیلگن.
اوچره‌شوو دوامیده تخنیکی بیلیملرنی اۉتکزیش، تخنیکی صلاحیتنی آشیریش، سودا علاقه‌لرینی رواجلنتیریش و اۉزارا همکارلیکنی مستحکملش مسأله‌لری یوزه‌سیدن هم فکر المشیلگن.
مذکور بیاناتگه کۉره، اۉزبېکستان ساغلیقنی سقلش وزیرلیگی هم طالبان ساغلیقنی سقلش وزیرلیگی بیلن قۉشمه دستورلرنی عملگه آشیریشگه تیّارلیگینی بیلدیرگن.
