طالبان ملا هبت‌الله تامانیدن «غایب شخصلرنینگ ملکلرینی تېکشیریش تۉغریسیده‌گی قانون» تصدیقلنگنی حقیده خبر بېردی
۸صبح، کابل: طالبان اوشبو گروه رهبری ملا هبت‌الله آخوندزاده تامانیدن «غایب شخصلرنینگ کۉچر و کۉچمس ملکلرینی تېکشیریش تۉغریسیده‌گی قانون» تصدیقلنگنی حقیده خبر بېردی.
طالبان عدلیه وزیرلیگی، دوشنبه کونی، ۱۱ جوزا، «غایب شخصلرنینگ کۉچر و کۉچمس ملکلرینی تېکشیریش تۉغریسیده‌گی قانون» بیر مقّدمه، تۉرت باب، تۉرت فصل و ۳۱ مادّه‌دن عبارت اېکنینی معلوم قیلدی.
طالبان عدلیه وزیرلیگی بیاناتیگه کۉره، اوشبو «قانون»نی عملگه آشیریش اوچون مسوول اۉرگان بو گروه عالی محکمه‌سی‌نینگ حربی اۉرین باسرلیگی ترکیبیده‌گی غایب شخصلرنینگ کۉچر و کۉچمس ملکلرینی تېکشیریش باشقرمه‌سی حسابلنه‌دی.
طالبان‌نینگ اوشبو «قانونی»ده «ساعین بالفساد»لر (طالبان مخالفلری)نینگ ملکلری یاکه اولردن آلینه‌دیگن منفعتلرنی تاپشیریش طالبان رهبری نینگ حکمیگه باغلیق اېکنی قید اېتیلگن.
طالبان‌نینگ ینگی «قانونی»ده، شونینگدېک، غایب بۉلگن، بې‌درک یۉقالگن یاکه وفات اېتگن شخصلرنینگ ملکی طالبانگه تاپشیریلیشی تأکیدلنگن.
طالبان‌نینگ ینگی «قانونی»نینگ بیر قِسمیده کۉچر ملکلرنی اجاره‌گه بېریش و ساتیش، اجاره‌چی‌نینگ مجبوریتلری، اداری جریانلرنی یوریتیش ترتیبی، غایب شخصلرنینگ شرعی وکیلیگه قۉییله‌دیگن شرطلر، خارجی وکالت‌نامه حجتلری‌نینگ حقوقی کوچی همده ییغیلگن درآمدلرنی ملک اېگه‌سیگه تاپشیریش مسأله‌لری توشونتیریلگن.
طالبان «قانونی»نینگ ییگیرمه تۉقّیزینچی مادّه‌سیده اجرا اېتووچی ارگان افغانستان اوستیدن طالبان‌نینگ قَیته حکمرانلیگی اۉرنه‌تیلیشیدن آلدین یاکه کېین «رسمی و نارسمی شخصلر همده اداره‌لر تامانیدن باسیب آلینگن» شخصی اویلرنی اصل اېگه‌لریگه قَیتریشگه مجبور اېکنی قید اېتیلگن.
طالبان «غایب شخصلرنینگ کۉچر و کۉچمس ملکلرینی تېکشیریش تۉغریسیده‌گی قانون» کوچگه کیرگنی حقیده خبر بېره‌یاتگن بیر پیتده، اولر ۲۰۲۱-ییلده افغانستان اوستیدن قَیته نظارت اۉرنه‌تگنیدن سۉنگ کابل و مملکت نینگ باشقه شهرلریده‌گی تورر جای حدودلری‌نینگ مینگلب جریب یېرلرینی اېگه‌للب آلگن.
