طالبان‌نینگ «صلاحیتنی آشیریش سمینارلری»؛ تعلیم‌می یاکه تهدید؟
۸صبح، غزنی
۸صبح گزېته‌سی‌نینگ انیقلشیچه، طالبان‌نینگ اخبارات و مدنیت وزیرلیگی اوشبو گروه استخبارات اداره‌سی و ژورنالیستلر اویوشمه‌لریدن بیری بیلن همکارلیکده سۉنگگی آیلرده مملکت‌نینگ تورلی ولایتلریده «ژورنالیستلر صلاحیتینی آشیریش بۉییچه علمی سمینار» نامی آستیده بیر قطار ییغیلیشلر اۉتکزگن. بیراق اوشبو ییغیلیشلر دوامیده اخبارات و مدنیت وزیرلیگی‌نینگ یوقاری مرتبه‌لی خادملری، استخبارات اداره‌سی و اوشبو گروه‌نینگ محلی منصبدارلری عامه‌وی اخبارات واسطه‌لریگه آگاهلنتیرووچی نطقلر بیلن چیقیب، اولرگه اۉزلری فایده‌سیگه ترغیبات قیلیشنی بویورگن؛ حال‌بوکه، بو ییغیلیشلرده ژورنالیستلرنی اۉقیتیش و اولر‌نینگ صلاحیتینی آشیرایش حقیده گپ بۉلمه‌گن.
اوشبو ییغیلیشلرده قتنه‌شگن اَیریم ژورنالیستلر‌نینگ اَیتیشیچه، علمی سمینار متخصص و کسبی ملَکه‌لر شخصلر اشتراکیده‌گی اختصاص‌لشگن ییغیلیش بۉلیشی و ژورنالیستلر‌نینگ علمی بیلیملرینی مستحکملش مقصدیده اۉتکزیلیشی کېره‌ک؛ حال‌بوکه، یوقاریده قید اېتیلگن ییغیلیشلرده طالبان منصبدارلری نطق سۉزلب، عامه‌وی اخبارات واسطه‌لرینی آگاهلنتیرگن.
ژورنالیزم فاکولته‌سی اۉقیتووچیلریدن بیری اَیتیشیچه، هر بیر دستورده اونگه گپیریش اوچون اتیگی بېش دقیقه‌دن ۱۰ دقیقه‌گچه وقت بېریله‌دی، بیراق طالبان منصبدارلری اوشبو دستورلرده بیر نېچه ساعت دوامیده اشتراکچیلرگه آگاهلنتیرووچی نطقلر سۉزلب، ژورنالیستلرگه نیمه قیلیش کېره‌کلیگینی بېلگیلب بېره‌دی.
شونینگدېک، لوگر ولایتیده‌گی اوشبو سمینار اشتراکچیلریدن بیری «علمی سمینار» نامی آستیده‌گی دستورلردن بیریده تۉرت ساعت قتنه‌شگنینی و بو سمینار دوامیده طالبان‌نینگ محلی منصبدارلری نطقلریدن تشقری، اولر هم عامه‌وی اخبارات واسطه‌لرینی نظارت قیلیش و اوشبو گروه فایده‌سیگه ترغیبات قیلیشگه قره‌تیلگن بۉلگنینی، باشقه هېچ قنده‌ی نرسه تقدیم اېتیلمه‌گنینی اَیته‌دی.
اوشبو اشتراکچی قۉشیمچه قیله‌دی: «بونده‌ی دستورلرنی عموماً صلاحیتنی آشیریش سمیناری دېب اتَه‌مسلیک کېره‌ک؛ اونی صلاحیتنی یۉق قیلیش و کۉمیش دېب اته‌گن معقول. مېن قتنه‌شگن دستور دوامیده طالبان اعضالریدن یېتّی نفری، جمله‌دن، طالبان‌نینگ اخبارات و مدنیت وزیرلیگی منصبدارلری همده اوشبو گروه‌نینگ بیر نېچه محلی منصبداری سۉزگه چیقدی و اولر‌نینگ هر بیری اۉز نوبتیده رژیم یانیده توریش و بو گروهنی تنقید قیلمسلیک حقیده آگاهلنتیردی و دستور شو طرزده یکونلندی.»
پکتیا‌ده‌گی محلی عامه‌وی اخبارات واسطه‌لریدن بیری‌نینگ خادیمی هم اوشبو ولایتده سمینار اۉتکزیلگنی حقیده شونگه اۉخشه‌ش فکر بیلدیره‌دی. او شونده‌ی دېیدی: «بیز کۉپلب اۉقوو سمینارلریده قتنه‌شگنمیز و ترتیب شونده‌ی که کسبگه علاقه‌دار موضوعلرده گپیریلیشی کېره‌ک؛ اما بو یېرده کتّه خلق ییغینی کبی یوزلب کیشی قتنه‌شدی و زېریکرلی نطقلر همده پند-نصیحتلردن باشقه هېچ نرسه بۉلمه‌دی. قیزیغی شونده که بیلیم یورتی اۉقیتووچیسی هم سمینار صلاحیتینی آشیرایش حقیده معروضه قیلیش اوچون کېلگن اېدی، اما افسوس که اونگه اتیگی بېش دقیقه وقت بېریلدی.»
اوشبو حسابات‌نینگ انیقلشیچه، طالبان و ژورنالیستلر اویوشمه‌لریدن بیری تامانیدن بیرگه‌لیکده اۉتکزیلگن بو سمینارلر اۉندن آرتیق ولایتده تشکیل اېتیلگن و دستورلرنی تشکیل قیلووچی جماعه برچه ولایتلرگه سفر قیلیشی رېجه‌لشتیریلگن.
بو حالت طالبان بوندن بیر نېچه کون اوّل مملکتده‌گی برچه عامه‌وی اخبارات واسطه‌لری و یوتیوب کاناللری اېگه‌لرینی اوشبو گروه‌نینگ قَیته حاکمیتنی اېگه‌لله‌گنی‌نینگ بېشینچی ییللیگی ۲۴ اسد سنه‌سینی علیحده طرزده یاریتایش حقیده آگاهلنتیرگن بیر پیتده یوز بېرماقده.
