بیرگهلیکدهگی بېش عامهوی اخبارات واسطهسی حساباتی: طالبان ۱۱۰ نفر سابق حربینی سیستماتیک روشده اۉلدیرگن
۸صبح
طالبان نینگ «عمومی عفو» وعدهسیدن تۉرت ییلدن آرتیق وقت اۉتگن بۉلسهده، ینگی قۉشمه تېرگاو حساباتی نینگ تاپیلمهلری شونی کۉرسهتهدیکی، افغانستان نینگ سابق خوفسیزلیک کوچلری هنوزگچه طالبان تامانیدن حبسگه آلیش، قییناققه سالیش و اۉلدیریش نینگ نشانیگه ایلنگن. اوشبو تېرگاو ۸صبح، اطلاعات روز گزېتهلری، Lighthouse Reports تېرگاو مرکزی ژورنالیستلری گروهی، بریتانیا نینگ The Independent گزېتهسی و امریکا نشری Military Times همکارلیگیده اۉتکزیلگن. حساباتدهگی معلوماتلر سابق حربی منبعلر و امریکا مصلحتچیلری تامانیدن هم تصدیقلنگن.
تېرگاو تاپیلمهلری شونی کۉرسهتهدیکی، ۲۰۲۳-ییلدن ۲۰۲۵-ییل نینگ اۉرتهلریگچه کمیده ۱۱۰ نفر سابق حربی خدمتچی اۉلدیریلگن، اولردن فقط ۱۸ تهسی جاری ییل نینگ دستلبکی یېتی آییده صادر بۉلگن. آلتی آی دوام اېتگن بو حسابات، امریکا حربیلری بیلن یانمه-یان خدمت قیلگن کوچلر نینگ اۉنلب اۉلدیریلیش و قییناققه سالینیش حالتلرینی حجتلشتیرگن. حساباتده، شونینگدېک، سابق مخصوص خوفسیزلیک بۉلینمهلری نینگ آلتی اعضاسی اۉلیمی و ایکی اعضاسی قییناققه سالینگنی حقیده باتفصیل معلومات کېلتیریلگن. بو حربیلر مخصوص تیارگرلیکدن اۉتگن بۉلیب، امریکا کوچلری بیلن تروریسمگه قرشی مخصوص عملیاتلرده اشتراک اېتگنلر.
حسابات نینگ تاپیلمهلری کۉرسهتهدیکی، بو رقملر افغانستانده سابق خوفسیزلیک کوچلریگه قرشی صادر بۉلگن حقیقی حالتلردن انچه کم. تاپیلمهلرگه کۉره، طالبان نظارتیدهگی افغانستانده بو قاتللیکلرنی تصدیقلش جوده قیین. حسابات تأکیدلهیدیکی، اۉز-اۉزینی سانسور قیلیش، تهدیدلر و طالبان نینگ قصاص آلیشیدن قۉرقوو سببلی، سابق حربیلر نینگ اۉلدیریلیش و قییناققه سالینیش حالتلرینی تصدیقلش باشقه اۉلدیریش حالتلریگه قرهگنده انچه مرکب. شو باعث، اصل رقملر حساباتدهگی کۉرسهتکیچلردن انچه یوقاری بۉلیشی احتمال قیلینماقده.
حساباتده اۉلیم و قییناققه سالینیش حالتلری رسمی حجتلر یاکه ایشانچلی حربی منبعلر آرقهلی تصدیقلنگن. شونینگدېک، مخصوص کوچلر اعضالری نینگ بیر نېچه اۉلدیریلیش حالتلری محلی ییتکرمهلر تامانیدن هم قید اېتیلگن.
امریکا حربیلری نینگ سابق اتفاقچیلری و اولر نینگ عایله اعضالری تصدیقلشیچه، بو افغان اتفاقچیلر اۉلدیریلیشیدن آلدین دایمی قۉرقوو و خواطر آستیده یشهگنلر. ایکی سابق حربی نینگ عایلهسی اېسه طالبان جسدلرنی دفن اېتیش مراسمینی اۉتکزیشگه رخصت بېرمهگنینی خبر قیلگن.
حساباتده قید اېتیلگن تصدیقلنگن اۉلدیریش حالتلری شونی کۉرسهتهدیکی، طالبان تامانیدن اعلان قیلینگن «عمومی عفو» امریکا بیلن یانمه-یان خدمت قیلگن افغانلرنی حمایه قیله آلمهگن. قییناققه سالینگن جبرلنووچیلر بیلن اۉتکزیلگن مصاحبهلر اېسه خلقارا کوچلر نینگ سابق اتفاقچیلرینی انیقلش و تعقیب اېتیش بۉییچه تشکیل اېتیلگن تیزیملی اورینیشلر موجودلیگیدن خواطر اویغاتهدی. اوچ منبع، جملهدن ایکی سابق مخصوص بۉلینمه عسکری (خاص قطعاتی)، سابق همکسبلری نینگ علاقه معلوماتلری آشکار بۉلگچ قییناققه سالینگنینی بیلدیرگن. اولردن بیری سابق همکسبی نینگ قییناققه سالینیشی نتیجهسیده اۉز معلوماتلری فاش بۉلگنینی تصدیقلهگن. ینه بیر منبع تأکیدلهگنیچه، بو جریان شو درجهده کېنگ ترقهلگنکی، اېندی هېچ کیم سابق همکسبلری بیلن باغلنیشگه جرات قیلمهیدی.
حسابات مؤلفلری افغانستان نینگ سابق ملی مدافعه و خوفسیزلیک کوچلری (ANDSF) اعضالری نینگ ۲۰۲۳ -ییلدن ۲۰۲۵-ییل اۉرتهلریگچه بۉلگن دوردهگی ۱۱۰ ته اۉلدیریش حالتینی ۸صبح و اطلاعات روز گزېتهلریده اعلان قیلینگن معلوماتلر اساسیده تۉپلهگنلر. هر بیر حالت ایکینچی مستقل منبع تامانیدن هم تصدیقلنگن. اوشبو تصدیقلش ایلگری افغانستان جنایت تدقیقات باشقرمسی (CID) رهبری بۉلیب ایشلهگن، سابق حربی منبعلر بیلن یقین علاقهلرگه اېگه بۉلگن دکترا درجهسیگه اېگه تدقیقاتچی بیلن همکارلیکده عملگه آشیریلگن.
حساباتده ایتیلیشیچه، بو سعی-حرکتلرگه قرهمهی، کېلتیریلگن رقملر احتمال واقعی کۉرستکیچلردن انچه کمدیر. حساباتگه فقط شوندهی حالتلر کیریتیلگنکی، اولر نهفقط ییتکرمهلر تامانیدن یاریتیلگن، بلکه ایکینچی منبع تامانیدن هم تصدیقلنگن. شو سببلی، اۉنلب باشقه حالتلر ایکیلمچی تصدیق بۉلمهگنی اوچون یکونی رقملرگه کیریتیلمهگن. انتقام آلیشدن قۉرققن کۉپلب عایلهلر مطبوعات بیلن گپلشیشدن باش تارتگن، ایریملری اېسه ژورنالیستلر بیلن صحبتلشگنی اوچون تهدید یاکه جزاگه دوچ کېلگن. شو سببلی، تدقیقات گروهی عایلهلر نینگ خوفسیزلیگینی تأمینلش مقصدیده افغانستانده یشهیاتگن قرینداشلرگه مراجعت قیلمسلیککه قرار قیلگن.
افغان منبعلریدن آلینگن معلوماتلر حاضرگی وضعیت نینگ تشویشلی منظرهسینی چیزهدی. بعضی حاللرده قربانلر نینگ باشی کېسیلگن، باشقه حاللرده اېسه جسدلر بۉلهکلب تشلنگن حالده تاپیلگن. ایریم حالتلرده قاتللیکلر «نامعلوم قوراللنگن شخصلر»گه یوکلهتیلگن یاکه جسدلر غایب بۉلیشلردن سۉنگ تاپیلگن. اما باشقه حالتلرده اېسه عیبدارلر انیق. معلوماتلرگه کۉره، سابق خوفسیزلیک کوچلری (ANDSF) اعضالری نینگ بیر قسمی حبسگه آلینیب قییناققه سالینیش جریانیده یاکه اوندن کۉپ اۉتمهی هلاک بۉلگن.
طالبان ۲۰۲۱-ییل اگست آییده افغانستاننی اېگهلهگچ، سابق حکومت خدمتچیلری و ملی خوفسیزلیک و مدافعه کوچلری (ANDSF) اعضالری اوچون «عمومی عفو» اعلان قیلگن اېدی. بو وعده ۲۰۲۵-ییلده هم قیته تیلگه آلیندی، بو اېسه امریکا سابق جمهور رییسی دونالد ترمپ افغانلر اوچون سفر چېکلاولرینی جاری قیلگنیدن اتیگی بیر نېچه کون اۉتگن اېدی. امریکا حکومتی ۲۰۲۵ -ییل جولای آییده افغانلر اوچون وقتینچهلیک حمایه مقامینی (TPS) هم توگهتدی و ایچکی خوفسیزلیک وزیرلیگی (DHS) افغانستان اېندیلیکده امریکا نینگ مخصوص حمایه دستوریگه کیرمسلیگینی معلوم قیلدی.
طالبان وکیللری سابق (ANDSF) اعضالری آرهسیده ایریم اۉلدیریش حالتلرینی تن آلگن بۉلسهلرده، اولرنی «شخصی عداوت یاکه انتقام آلیش» بیلن ایضاحلب، «عیبدارلر جزالنیشی» نی دعوا قیلگن. ۸صبح گزېتهسی ایلگری نیویارک تایمز بیلن همکارلیکده آلیب بارگن سوریشتیرووده، طالبان حاکمیتنی اېگهلهگن دستلبکی آلتی آی ایچیده عملگه آشیریلگن قصاصی قاتللیکلرنی فاش قیلگن اېدی. شونینگدېک، بیرلشگن ملتلر تشکیلاتی نینگ افغانستاندهگی یاردم موسسهسی (UNAMA) ۲۰۲۱-ییل اگستیدن ۲۰۲۳-ییل جونیگچه ۲۰۰ دن آرتیق ناقانونی اۉلدیریش حالتینی قید اېتگن. ینگی تاپیلمهلر بو قاتللیکلر اولگی رقملردن سۉنگ هم دوام اېتگنینی کۉرسهتماقده.
بو آرهده، انسان حقلری کوزهتووچی (HRW) تشکیلاتی نینگ آسیا بۉلیمی اۉرینباسری پاتریشیا گاسمن، شوندهی دېگن:«طالبان رهبریتی عمومی عفو وعده قیلگن، اما بو وعده ۲۰۲۱-ییل اگستیدن بویان اۉلدیریلگن یاکه یشیرینیشده یشهیاتگن یوزلب سابق خوفسیزلیک خادملری اوچون مطلقا معناسیز بۉلیب چیقدی».
گاسمن شوندهی دوام اېتگن: «طالبان نینگ محلی قوماندانلری هېچ قندهی محکمهسیز، بیر نېچه یوزلب عسکر، پولیس و استخبارات خادملرینی قتل اېتگن یاکه مجبورا غایب قیلگن، بیراق بو نینگ اوچون جوابگرلیککه تارتیلمهگن. بو حالتلر شونی کۉرسهتهدیکی، بو قاتللیکلر طالبان نینگ یوقاری مرتبهلی رهبرلری تامانیدن یاکه معقوللنگن، یاکه هېچ بۉلمهگنده طاقت بیلن قرهلگن، چونکه رهبریت اۉز جنگچیلرینی جزالش ایستهگیده اېمس».
هلاک بۉلگن حربیلر نینگ عایلهلری و امریکالیک مصلحتچیلر حکایهسی حساباتده تأکیدلنیشیچه، امریکا نینگ سابق اتفاقچیلری بۉلگن اوشبو کوچلر عیناً شو سببلی نشانگه آلینگن. اولر امریکا بیلن بیرگه ایشلهگنلیکلری اوچون حاضر اېنگ کته خوف آستیده قالیشگن.
حوا اسملی عیال، علی گل حیدری نینگ بېوهسی، اېرینی وطننی سېوووچی انسان صفتیده تعریفلهیدی. او، اۉز سۉزلریگه کۉره، خلقی نینگ تینچ حیات کېچیریشی، بالهلری نینگ مکتبگه باره آلیشی و عایلهسی نینگ مجبوری مهاجرلیکدن قوتولیشی اوچون اردوگه قۉشیلگن. حوا، حاضر قۉشنی مملکتدن سۉزلهیاتگنینی ایتیب، شوندهی دېگن: «او مسوولیت آلیشنی، مملکتده خوفسیزلیک یرهتیشنی خواهلردی؛ شوندهی مملکتکی، اونده بالهلر مکتبگه باره آلسین، عایلهسی اېسه قاچقینلیککه مجبور بۉلمسین».
خوفسیزلیک سببلری طفیلی تدقیقات گروهی افغانستانده یشهیاتگن قربانلر عایلهلری بیلن هېچ قندهی علاقه اۉرنهتمهگن.
حیدری اۉز خدمت فعالیتی نینگ کته قسمینی افغانستان مخصوص کوچلریده اۉتکزگن، سۉنگره کماندو لر صفیگه قۉشیلگن. حاضر امریکا یشهیاتگن اونینگ سابق قوماندانی اونی «جسور عسکر» صفتیده تعریفلهیدی، او کۉپلب حربی عملیاتلرده امریکالیک کوچلر بیلن یېلکمه-یېلکه قتنهشگن. امریکا مخصوص کوچلری نینگ بیر مصلحتچیسی، حیدری بیلن بیرگه ایشلهگنلیگینی ایتیب، شوندهی دېیدی: «اولر بیز نینگ برچه عملیاتلریمیزگه تۉلیق حصهلشگن اېدی. بیز اۉرتهمیزدهگی ایشانچ شو درجهده کوچلی اېدیکی، امریکالیک عسکرلر اولر بیلن بیر کمپده یشهشردی.»
حیدری افغانستان نینگ اۉز دوریده «اېنگ ملکهلی» مخصوص کوچ عسکرلریدن بیری اېدی. حربی توزیلمه قیته تشکیل اېتیلگچ، او کماندولر ترکیبیگه اۉتکزیلگن. اۉشه امریکالیک مصلحتچی شوندهی دېیدی:«اولر بیز نینگ برچه خوفسیزلیک ماموریتلریمیز نینگ اجراچی قۉلی اېدی. حیدری بۉلگن بۉلینمهلر کبی بۉلینمهلر بیز نینگ بوتون خوفسیزلیک استراتیژیمیز اوچون نهایتده مهم اېدی.»
او ینه قۉشیمچه قیلهدی: «مېن مخصوص کوچلر و کماندولر ترکیبیده تنیشگن آدملر نینگ اکثریتی افغانستان اېرکینلیگیگه ایشانگنلیکلری اوچون بو صفگه قۉشیلگن اېدی. مېن افغان همکسبلریمگه قرهگنیمده، اولر مملکت کېلهجگی نینگ امیدی دېب اۉیلردیم.»
کابل قولهگچ، مخصوص کوچلر نینگ کۉپچیلیگی مملکتدن چیقیب کېتیشگه موفق بۉلگن، بیراق حیدری بونگه اېریشه آلمهگن. اونینگ رفیقهسی حوا حکایه قیلهدی: اوچ کون کېتمه-کېت، ایکی فرزندی بیلن بیرگه، برچه ضرور حجتلرنی آلیب هوا میدانیده باریشگن، امیدی شوکی، اولر امریکاگه کېتووچی اوچاقگه چیقیشهدی. حیدری هر دایم عایلهسیگه امریکا کوچلری بیلن یقین همکارلیگی سببلی اولر خوفسیز بۉلیشینی ایتگن.
حسابات تاپیلمهلری کۉرسهتیشیچه، حیدری سابق حکومت اغدریلگندن آلتی آی اۉتیب طالبان تامانیدن حبسگه آلینگن. او کېینچهلیک آزاد اېتیلگن، اما قماقده قییناققه سالینگنیدن سۉنگ عایلهسی بیلن ایران تامان قاچیشگه قرار قیلگن. بیر ییل ایران حدودیده یشهگچ، حیدری کوندهلیک ایش جاییدن قیتهیاتگنده حبسگه آلینگن و افغانستانگه رد قیلینگن. رفیقهسی نینگ سۉزلریگه کۉره، افغانستانگه قیتگچ، حیدری تینچ، فقراوی حیات کېچیرگن. اما ۲۰۲۴-ییل باشلریده او قوراللنگن شخصلر تامانیدن هجومگه اوچرهب اۉلدیریلگن. حوا ایتهدی:«طالبانلر اوییمیزنی قورشهب آلگنیده، او اولر بیلن گپلشیش اوچون تشقریگه چیقدی، لېکن حلی آغزینی آچمسیدن اۉق بیلن آتیب اۉلدیریشدی.»
حیدری نینگ رفیقهسی قۉشیمچه قیلهدی: طالبان محلی اهالیگه اونی داعش اعضاسی صفتیده کۉرسهتگن. حساباتده قید اېتیلیشیچه، ینه بیر حالت، سابق مخصوص عملیات عسکری، مستعار اسمی بیلن «احمد» بۉلگن شخصگه تعلقلیدیر. اونینگ قرینداشلری ایتیشیچه، حکومت قولهگندن سۉنگ او عادی حیات کېچیره آلمهگن، چونکه طالبان نینگ قصاص آلیشیدن نهایتده قۉرققن. عایلهسی ایتهدی: او اویلنمهی یورگن، چونکه «بیر کون نشانگه آلینهمن» دېب ایشانردی.
اونینگ اسمینی آشکار اېتیشنی ایستهمهگن قرینداشلریدن بیری ۲۰۲۴-ییلگی حادثه حقیده شوندهی دېیدی:«کېچقورون، نماز پیتیده، کۉپ اۉق آوازلرینی اېشیتدیم. تون بۉیی خواطرده اېدیم، اېرتهلب اېرته اونگه قۉنغیراق قیلدیم، لېکن جواب بېرمهدی. اۉشه کونی آرهدن بیر نېچه ساعت اۉتیب، اونینگ جسدینی تاپیشدی، تنهسی اۉقدن تېشیب تشلنگن اېدی. او جوده شفقتسیزلرچه اۉلدیریلگن اېدی.»
سابق عسکر نینگ بو قرینداشی ینه شوندهی دېیدی: «طالبان اونی اۉلدیرگندن سۉنگ، بیزگه دفن مراسمی اۉتکزیشگه هم رخصت بېرمهدی. بیز اونی جیملیکده، یشیرینچه کۉمدیک.» بو حالت حیدری نینگ حکایهسیگه هم اۉخشهیدی، اونینگ رفیقهسی هم ایتگنیدېک، اونگه اېرینی دفن اېتیش مراسمینی اۉتکزیشگه رخصت بېریلمهگن.
امریکا همکارلری نینگ آچیقدن-آچیق قییناققه سالینیشی
حسابات نینگ تاپیلمهلریگه کۉره، محمود (مستعار) ۲۰۲۳-ییل آخری یاکه ۲۰۲۴-ییل باشلریده طالبان نینگ بیر بۉلینمهسی تامانیدن قۉلگه آلینگن. اونینگ ایتیشیچه، امریکا تامانیدن تیارلنگن مخصوص قسملریدهگی باشقه همکسبلری اولراق حبسگه آلینگن و اونینگ حقیدهگی معلوماتنی طالبانلرگه بېرگن. او قۉلگه آلینگه نینگ دستلبکی ۴۸ ساعتیده آغیر قییناقلرگه سالینگنینی ایتهدی، بو دورده طالبانلر اونگه باسیم اۉتکزیب، تلفنی نینگ قفلی آچیلیشی اوچون اورینیب، باشقه مخصوص بۉلینمه اعضالری حقیده کۉپراق معلومات آلیشگه حرکت قیلگن. او ایتیشیچه، سۉراق پیتیده اوندن مخصوص قسمدهگی بیر همکسبی نینگ یشهش جایی حقیده هم سۉرهلگن. او حبسدن آزاد اېتیلگن پیتگه کېلیب، اۉشه همکاری اۉلدیریلگن اېدی. حسابات تیارلاوچیلری بو شخص نینگ اۉلیمینی مستقل طرزده تصدیقلهی آلیشگن.
بو سابق حربی طالبانلر تامانیدن قییناققه سالینگنی حقیده شوندهی دېیدی:«مېنگه برق شوکهسی بیلن ضربه بېریشردی، باشیمنی ساووق سووگه باتیریشردی، بو جوده آغیر اېدی. اېنگ دهشتلی قییناقلری پلاستیک خلتهنی اصولی اېدی؛ خلتهنی باشیمگه کییب، آغزیم و بورنیمنی بېرکیتیشردی، هوشیمدن کېتمهگنیمچه آچیشمسدی.»
او دوام اېتهدی: «مېنی ۲۴ ساعت دوامیده بیر آیاغیمده توریشگه مجبور قیلیشردی، باشقه آیاغیمنی تسمه بیلن باغلب قۉییشردی. بیر نېچه ساعت باشیمنی پستگه آسیب قۉییشردی. ۴۸ ساعتدن آرتیق بو قییناقلرگه چیدهی آلمهدیم و نهایت تلفنیمنی اولر اوچون آچدیم. بو قییناقلرنی باشیمدن اۉتکزگنیمده روحی، جسمانی و حتا مالی حالتیم بوتکول برباد بۉلدی… هر سفر سۉراققه چقیریشگنده، بوتون تنهم تیترهی باشلردی.»
سابق حربی ینه دېیدی: «شوندن کېین مېنی سیا جاسوسی اېکنلیگیمنی تن آلیشیم اوچون قییناققه سالیشدی. مېندن معاشیم، نېچه مرته بامباردمان قیلگنیم و قندهی قیلیب ایمن الظواهری حقیدهگی معلوماتنی امریکالیکلرگه بېرگنیم حقیده سۉرهشردی، اولرنی اۉلدیریش اوچون.»
امریکا اردوسیده خدمت قیلگن، مایک ادواردز و بو سابق حربی بیلن همکارلیک قیلگن، «هنگی استخبارات گروهی» دېب اتهلگن بیرینچی درجهلی مخصوص بۉلینمه نینگ اعضاسی بۉلگن. او افغانستان قولهگندن سۉنگ، «خروج لایحهسی» ناملی تشکیلاتنی توزگن، مقصدی «محمود» و او بیلن بیرگه خدمت قیلگن باشقه افغان مخصوص بۉلینمه اعضالریگه یاردم بېریش اېدی. ادواردز نینگ ایتیشیچه، بو بۉلینمه اعضالری نینگ بعضیلری تخنیکی سببلرگه کۉره، جملهدن امریکا حکومتی تامانیدن بېواسطه ایشگه آلینمهگنلیکلری سببلی، (ایسآیوی) مخصوص مهاجرت ویزه آلیش حقوقیدن محروم بۉلیشگن.
ادوارز تشکیلاتی اولر نینگ کۉپلب عریضهلرینی P1 مقابل مهاجرتی یۉلی آرقهلی قیته یوبارگن، بو یۉل افغان مخصوص کوچلر جماعهسیگه ینه امید بغیشلهگن. محمود نینگ ایشی شو دستور جوابینی کوتهیاتگن پیتده، ۲۰۲۵-ییل باشیده بو مهاجرتی یۉل هم توختهتیب قۉییلگن.
ادوارز شوندهی دېیدی: «بیز اولرنی اۉقیتدیک، مصلحت بېردیک، اولر اوچون تاپشیریقلر بېلگیلهدیک و عملیاتلرده بیرگه قتنهشدیک. اولر اصلیده بیز نینگ آدملرمیز اېدی.»
حسابات تاپیلمهلری اساسیده، داوود ناملی باشقه سابق حربی بیر ییلدن آرتیق حبسده سقلنگچ، ۲۰۲۳-ییلده آزاد اېتیلگن و حاضرده قۉشنی مملکتلردن بیریده یشهیدی. اونینگ قرینداشلری ایتیشلریچه، او آغیر قییناقلردن سۉنگ چوقور توشکونلیککه (افسردهلیک) توشگن. بیلدیریلگن قییناقلر تورلری، برق شوکهسی و «ساخته چۉکتیریب اۉلدیریش» محمود باشیدن کېچیرگن حالتلرگه اۉخشهیدی.
حساباتده قید اېتیلیشیچه، بو سابق حربی نینگ قرینداشلری هم «محمود»نیکیگه اۉخشهش طرزده، اېنگ آغیر قییناقلر اوندن سابق همکسبلری نینگ اسملری و منزللرینی آلیش اوچون قرهتیلگنینی ایتیشگن. بو حکایهلر شونی کۉرسهتهدیکی، بو اۉلدیریشلر شونچهکه تصادفی اېمس، بلکه مخصوص قسملر نینگ اعضالرینی انیقلش و تیزیملی طرزده یۉق قیلیشگه قرهتیلگن کېنگراق حرکت نینگ بیر قسمی.
امریکا نینگ اوشبو تدقیقات دوامیده قۉلگه کیریتیلگن رسمی حربی حجتلریدن بیریده داوود ینه ۱۵ کیشی بیلن بیرگه تیلگه آلینگن و اونده شوندهی دېییلهدی: «اوشبو شخصلر تامانیدن عملگه آشیریلگن جنگاور عملیاتلر بوتون افغانستان بۉیلب استراتیژیک اهمیتگه اېگه عاقبتلرگه آلیب کېلگن.»
حجت نینگ باشقه قسمیده اېسه: «خدمت دوامیده هر بیر کیشی اۉز حیاتی اوچون جدی خوف آستیده بۉلگن و اگر افغانستان دشمنلری تامانیدن انیقلنسه، اولر نینگ عایلهلری هم تهدید آستیده قالگن»، دېییلگن.
حساباتده داوود نینگ عایلهسی حاضرده قۉشنی مملکتده یشهیاتگنی، بو حجت اونگه فوق العاده حالتلرده یاردم آلیش اوچون بېریلگنینی ایتهدی. اولر شوندهی دېیدیلر: «بو حجت افغانستان قولهگن پیتده اونگه عموماً یاردم بېرمهدی. او امریکالیک مخصوص کوچلر بیلن یېلکمه-یېلکه ایشلهگن آدم اېدی.»
بو سابق حربی نینگ عایله اعضالری ایتیشلریچه، اولر هنوزگچه اونینگ افغانستانگه قیتریب یوباریلیشی احتمالیدن جوده خواطرده، چونکه حاضرده قۉشنی دولتلر قاچقینلرنی عامهوی روشده رد قیلیشنی عملگه آشیرماقده. اونینگ قرینداشلریدن بیری شوندهی دېیدی:«بو یېرده وضعیت جوده آغیر. هر لحظه اونی رد قیلیشلری ممکن، و اگر بو صادر بۉلسه، طالبان اونی اۉلدیرهدی.»
بو آرهده، ۸صبح کوندهلیگی نینگ مستقل و مخصوص حساباتلریگه کۉره، سابق حربیلر نینگ اۉلدیریلیشی و قییناققه سالینیشی حالتلری اوشبو حساباتده کېلتیریلگن رقملردن انچه کۉپراق. فقط جاری ییل نینگ سنبله آیی نینگ سۉنگگی هفتهسیده ۸صبح گزېتهسی طالبان تامانیدن اوچ سابق حربی نینگ اۉلدیریلیشینی حجتلشتیرگن.
شونینگدېک، افغانستاندهگی بیرلشگن ملتلر تشکیلاتی یاردم موسسهسی (یوناما) اۉزی نینگ سۉنگگی حساباتیده، بو حجت بیرلشگن ملتلر تشکیلاتی عمومی ییغیلیش و خوفسیزلیک کېنگشیگه تقدیم اېتیلگن، کمیده بېش نفر سابق حربی نینگ اۉلدیریلگنی، بیرته ناقانونی حبس حالتی، و اوچته سابق حکومت عملدارلری همده افغانستان نینگ سابق ملی خوفسیزلیک و مدافعه کوچلری اعضالریگه نسبتاً قییناق و یامان معامله حالتلرینی حجتلشتیرگنینی بیلدیرگن.
