۸صبح مېن اوچون ایکّی قدریتنی عکس اېتتیرووچی مهم بیر آدرس دیر
چغتای
کۉپچلیک انسانلر اوچون «۸صبح» دېگنده، ییگیرمه ییلدن بېری بو عامهوی اخبارات واسطهسینینگ تحلیللری، خبرلری و محتوالری اېسگه کېلسه-ده، مېن اوچون اېسه بو رسانه ایکّی قدریتنینگ کوچلی بیر منبعسی توییلیب، بهالنهدی.
بوگونلر ۸صبح گزېتهسینینگ ۲۰ یاشگه تۉلگنی مناسبتیده، اونینگ اوزاق ییللیک فعالیتلری و اېزگو خذمتلری حقیده خاطرهلر یادگه آلینماقده. مېن هم بو گزېتهنینگ اوزاق ییللیک اۉقووچیسی اولهراق، ایلکبار ۸صبحده اۉزبېک تیلیده فعالیت باشلندی دېگن خبرنی ایشیتگنیمده، اۉزیم بیلن بو رسانه اۉرتهسیده باشقهچه بیر باغلیقلیکنی حس قیلگندیم.
۸صبح هر کون اېلگه یېتکزیب تورگن خبر، تحلیل و محتوالری بیلن اېرکین فکرگه اېگه انسانلر اوچون قدریت منبعی بۉلیب کېلگن بۉلسه-ده، مېن اوچون اېسه نه فقط انسانی توشینچهلریمگه ماس بیر منبع اېدی، بلکه آنه تیلیمگه قدر بېریلهدیگن بیر محیط هم بۉلیب قدرلنگن محیط دیر. شو سببدن اونینگ قدریتی مېنگه ینهده ایکّی برابر آشگندی.
ممکن انه شو باغلیقلیک سببلی بۉلسه کېرک، ۸صبحده اۉزبېک بۉلیمی باشلنگنینی ایشیتگنیمده کۉپ قووانگندیم. ذهنیمده: «اېندی بو یېرده اۉزبېک تیلیده هم شوندهی فعالیتلر بۉلیشی کېرک»، دېگن رېجهلر و خیالاتلر تاپیلگن اېدی.
بوگون بیلهمنکه اوشه وقت مېن اویلهگن فکر و امیدلریم اۉرینسیز اېمس اېکن. چونکه ۸صبح، مېن بیلمسدن، انسانی قدریتلرگه ایشانگن، اېرکین فکری و آچیق توشینچهلی انسانلرنی بیر یېرگه ییغیب، انسانیت و حقیقی وطنداشلیک و قدریت اوچون اورینیب تورگن محیط اېکن.
کیینچلیک بو یېرده ایشگه باشلب، اونینگ مسووللرینی اۉزبېک تیلیگه و اۉزبېکلرگه بۉلگن توشینچهلرینی کۉرگنیمده، بو رسانهنینگ نگاهیده قومیت چېگرهلریدن کۉره انسانیت مهمراق اېکنینی ینهده چوقورراق حس قیلدیم. اولر «اۉزبېک تیلی رواجی اوچون اېندی قۉلینگیز آچیق»، دېب بیلدیرگنلری حقیده کۉپ مراتبه اویلهگنمن. بو انسان و فارسچهده ایتیلگندیک «همدللیک و همدیگرپذیرلیک» حقیقی یوزی بو بېرده کۉرینهدی اېکن. مېن شونی توشیندیمکه، انسانی توشینچه سېنگه کوچلی بۉلگن انسان قدریتلر اساسیده برچه ارزشلر و تیللر سېن اوچون بیرخیل اهمیت تاپهدی اېکن. چونکه ۸صبحده اۉزبېک بۉلمهگن انسانلر بار اېکن آغیر شرایطده اۉزبېک یا بو خلق یا قومیت دېب اېمس انسان دېب پارلاقلیک و روشنگرلیک اوچون کورهشیب، اینتیلیب تورگن.
شوندهی اېکن، ۸صبح فعالیت دوامینی انسانیت و تورلی خلقلرگه تېگیشلی چیرایلی قدریتلرنینگ پارلاق کېلهجگی اوچون مهم دېب، اونینگ برچه مسووللری و خادملریگه سلامت و کوچ و قوت تیلهب قالهمن.
۸صبحنینگ ۲۰ ییللیگی قوتلوغ بۉلسین
