انسان حقوقلری و یېتکرمەلرنی قوللب-قوتلاوچی تشکیلاتلر: ۸صبح حقیقت و پارلاقلیک سېسی دیر
نیما
۸صبح گزېتهسی تشکیل تاپگنی نینگ ییگیرمهنچی ییللیگی مناسبتی بیلن عامهوی اخبارات واسطهلری و انسان حقوقلرینی قۉللب-قوّتلاوچی بیر قطار تشکیلاتلر بیاناتلر اعلان قیلیب، بو کوننی ۸صبحگه تبریکلهدیلر و اونینگ ایکّی اۉن ییللیک پارلاق فعالیتینی قدرلهدیلر. اوشبو تشکیلاتلر ۸صبحنی افغانستاننینگ تأثیرلی و مسوولیتلی عامهوی اخبارات واسطهلریدن بیری دېب بیلیب، مملکتنینگ آغیر شرایطیده حقیقتلر و خلق آوازینی یاریتیشدهگی رۉلینی تأکیدلهدیلر.
افغانستان یېتکرمه قۉللب-قوّتلش تشکیلاتی (AMSO) بیانات اعلان قیلیب، ۸صبح گزېتهسی فعالیتی نینگ ییگیرمهنچی ییللیگینی تبریکلهدی و اونینگ اخبارات یېتکزیش همده معیاری قدریتلرنی حمایه قیلیشدهگی رۉلینی قدرلهدی.
تشکیلات جمعه آقشامی، ۱- جوزا اۉز بیاناتیده ۸صبح افغانستاننینگ ایلغار، اېرکین و تأثیرلی عامهوی اخبارات واسطهلریدن بیری دېب تعریفلهدی همده بوگونگی آغیر شرایطده اونینگ فعالیتینی دوام اېتتیرهیاتگنی حقیقت و ژونالیستلیک تمایللریگه صادقلیک بېلگیسی اېکنینی بیلدیردی.
بیاناتده ایتیلیشیچه، سۉز اېرکینلیگی و ژونالیستلیک دایما تهدید همده انقراضگه دوچ کېلگن افغانستانده ایکّی اۉن ییللیک مېدیا فعالیتی عادی ایش دوری اېمس، بلکه «حقیقت و پارلاقلیک قدریتلرنی حمایه قیلیش تاریخی» حسابلنهدی.
افغانستان عاموې اخبارات واسطهلرینی قۉللب-قوّتلش تشکیلاتی قۉشیمچه قیلیشیچه، طالبان مملکت اوستیدن قَیته نظارت اۉرنهتگنیدن کېین هم ۸صبح سورگونده اۉز فعالیتینی دوام اېتتیریش و افغانستاندهگی واقعهلرنی یاریتیشگه موفق بۉلدی. تشکیلات تأکیدلشیچه، سورگوندهگی فعالیت «افغانستان خلقی نینگ آوازی و پارلاقلیک یۉلی اۉچمسلیگینی» اثباتلهیدی.
بیانات نینگ بیر قِسمیده ایتیلیشیچه، ۸صبح جماعهسی کۉپلب قیینچیلیکلرگه قرهمهی، مملکت حقیقتلرینی یاریتیش، انسان حقوقلری بوزیلیشلرینی فاش اېتیش و فسادنی آچیب بېریشده فعال رۉل اۉینهب کېلماقده.
شونینگدېک، سۉز اېرکینلیگی مرکزی هم بیانات اعلان قیلیب، ۸صبح گزېتهسی فعالیتینینگ ییگیرمهنچی ییللیگینی تبریکلهدی و اونینگ اخبارات یېتکزیش، سوریشتیروو ژونالیستلیک همده ملی ملاقاتنی مستحکملشدهگی رۉلینی قدرلهدی. جمعه آقشامی، ۱- جوزاده اعلان قیلینگن اوشبو بیاناتده ایتیلیشیچه، ۸صبح سۉنگگی ایکّی اۉن ییللیک دوامیده معیاری مستقللیک و ژونالیستلیک تمایللریگه صادقلیکنی سقلب، افغانستان ایچیده و تشقریسیدهگی ایزلاوچیلر آرهسیده علیحده اۉرین اېگهللشگه موفق بۉلگن.
اوشبو مرکزنینگ قۉشیمچه قیلیشیچه، ۸صبح برچه قیینچیلیکلرگه قرهمهی دایما خلق آوازی بۉلیشگه اینتیلیب، راپورتاژ و سوریشتیروو ژونالیستلیک آرقهلی افغانستان، منطقه و دنیا واقعهلری نینگ انیقراق تصویرینی تقدیم اېتیشگه حرکت قیلگن. بیانات نینگ بیر قِسمیده حاضرگی افغانستانده سۉز اېرکینلیگیگه کېنگ چېکلاولر موجود بۉلگن شرایطده مستقل یېتکرمه فعالیتینی دوام اېتتیریش «مقتاو و قدرلشگه لایق» اېکنی تأکیدلنگن.
سۉز اېرکینلیگی مرکزی ینه شونی تأکیدلهدی که ۸صبح کبی مستقل عامهوی اخبارات واسطهلری سۉز اېرکینلیگینی، خلق نینگ اخبارات آلیش حقوقینی حمایه قیلیش و انسانی قدریتلرنی قۉللب-قوّتلشده مهم رۉل اۉینهیدی. تشکیلات یکونده ۸صبح معیاری صادقلیک و قطعیتنی سقلهگن حالده مېدیا میدانیدهگی تأثیرلی فعالیتینی دوام اېتتیریشیگه امید بیلدیردی.
شو بیلن بیرگه، انسان حقوقلری فعاللری اتفاقی هم ۸صبح گزېتهسی تشکیل تاپگنی نینگ ییگیرمهنچی ییللیگینی اونینگ مسووللری، ژورنالیستلری، یازووچیلری و خادملریگه تبریکلب، ایکّی اۉن ییللیک اخبارات فعالیتی و سۉز اېرکینلیگینی حمایه قیلیشدهگی خدمتلرینی قدرلهدی.
تشکیلات جمعه کونی، ۱ جوزا، ۸صبح افغانستان نینگ زمانهوی تاریخیدهگی اېنگ آغیر دورلردن بیریده اۉز فعالیتینی دوام اېتتیرگنینی ایتدی؛ عینِ پیتده عامهوی اخبارات واسطهلری، ژورنالیستلر و سۉز اېرکینلیگی طالبان تامانیدن کېنگ باسیم آستیده قالماقده.
انسان حقوقلری فعاللری اتفاقی مملکتدهگی عاموې اخبارات واسطهلرینینگ بوگونگی حالتیگه اشاره قیلیب، یېتکرمهلر یاپیلیشی، سانسور کېنگهییشی، ژورنالیستلر حبسگه آلینیشی، مېدیا فعاللریگه تهدیدلر و سۉنگگی حالت صفتیده بامیان رادیوسی نینگ یاپیلیشی افغانستان مېدیا میدانیگه سایه سالهیاتگن اچّیق حقیقتلرنینگ بیر قِسمی اېکنینی بیلدیردی.
تشکیلات تأکیدلشیچه، مهاجرت و سورگون شرایطیده، مالیوی، خوفسیزلیک و سیاسی چېکلاولرگه قرهمهی، معیاری و مستقل عاموې اخبارات واسطهلری فعالیتینی دوام اېتتیریش خلق نینگ اخبارات آلیش حقوقیگه چوقور ایشانچ، جسارت و صداقت طلب قیلهدی. اتفاق نینگ ایتیشیچه، ۸صبح سۉنگگی ییللرده سکوتگه چۉمدیریب قۉییلگن حقیقتلرنینگ بیر قِسمی نینگ آوازی بۉله آلدی و خلق حکایهلرینی تیریک سقلب قالدی.
انسان حقوقلری فعاللری اتفاقی یکونده عامهوی اخبارات واسطهلرینی سکوتگه مجبورلش و سۉز اېرکینلیگینی باستیریشنی افغانستانده آنگنی یۉق قیلیش همده «مدنی جینوساید» نینگ کېنگراق جریانی نینگ بیر قِسمی دېب بهالهدی.
شونینگدېک، «تینچلیک و سپورت تشکیلاتی» تبریک یۉللب، ۸صبح ایکّی اۉن ییللیک معیاری و مسوولیتلی فعالیتی دوامیده پارلاقلیک ترقهتیش، ساغلام اخبارات یېتکزیش، جماعتچیلیک فکرینی اویغاتیش و سۉز اېرکینلیگینی قۉللب-قوّتلش آرقهلی مملکت عاموې اخبارات واسطهلری آرهسیده و اوندن تشقریده مهم همده تأثیرلی موقعگه اېگه بۉلگنینی بیلدیردی. تشکیلاتگه کۉره، ۸صبح اۉزی نینگ معرفتپرور قلمی و مسوولیتلی یاندهشووی بیلن حقیقت، عدالت و آنگ آوازی بۉله آلدی همده اېنگ آغیر شرایطلرده هم انسانی و مېدیا قدریتلری یۉلیده ثابت و یارقین بۉلیب قالدی.
افغانستان صنعتکارلری نینگ مدنی و صنعت تشکیلاتی اېسه شوندهی هم ایتیشیچه افغانستان کبی دایما سیاسی بۉرانلر، کېتمه-کېت انقراضلر و سۉز اېرکینلیگیگه قرشی قتّیق چېکلاولر ایچیده یشهگن جمعیتده مستقل عامهوی اخبارات واسطهسی چیراغینی یاقیب توریش قیین و تحسینگه لایق ایش دیر. صنعت و مېدیا آزادلیک و عدالت سری اوچیشگه اینتیلهیاتگن بیر قوش نینگ ایکّی قناتی دیر. شو اۉرینده ۸صبح سۉنگگی ایکّی اۉن ییللیک دوامیده آوازسیزلرنینگ آوازی بۉلدی؛ انقراضلر شاوقینی آرهسیده چېکّه و عذاب چېکّن خلق نینگ آوازینی عکس اېتتیردی. تشکیلاتگه کۉره، ۸صبح حقیقت تصویرچیسی بۉلیب، سوریشتیروو ژونالیستلیک و میدان راپورتاژلریگه تهینگن حالده مملکت حقیقتلرینینگ یارقین آینهسینی جمعیت قرشیسیگه قۉیه آلدی.
