بیرلشگن ملتلر تشکیلاتی: چېگره‌ده‌گی تۉقنه‌شوولر کوچه‌ییشی آرتیدن شرقی افغانستانده ۱۰۰ مینگ‌دن آرتیق کیشی کۉچیریلگن
۸صبح، کابل: بیرلشگن ملتلر تشکیلاتی عیاللر بۉلیمی (UN Women)افغانستان و پاکستان چېگره‌سی بۉیلب ترنگلیک کوچه‌یگنی آرتیدن شرقی افغانستانده ۱۰۰ مینگ‌دن آرتیق کیشی اۉز یشه‌ش جایینی ترک اېتگنینی معلوم قیلدی.
اوشبو تشکیلات دوشنبه کونی، ۱۱ جوزا، ترقه‌تگن حساباتیده، بو انسانلر هوا هجوملری، اۉققه توتیلیش، درون هجوملری و قوروقلیکده‌گی تۉقنه‌شوولر نتیجه‌سیده اویلرینی ترک اېتیشگه مجبور بۉلگنینی ایتگن.
حساباتگه کۉره، عیاللر و قیزلر کۉچیریلگنلر آره‌سیده‌گی اېنگ ضعیف گروهلردن بیری بۉلیب، اولر کېنگ کۉلملی اقتصادی، اجتماعی و روحی معمالرگه دوچ کېلگن.
«افغانستان جنسیت موافقلشتیریش گروهی» معلومات‌لریگه کۉره، ضرر کۉرگن ۱۰ ولایتده‌گی عیاللرنینگ اوچدن ایکّی قِسمیدن کۉپراغی درآمد منبعینی یۉقاتگن و اولرنینگ تۉرتدن اوچ قِسمی آزیق-آوقت‌گه ایریشیشی ینه‌ده قیینلشگنینی بیلدیرگن.
تشکیلات‌نینگ قۉشیمچه قیلیشیچه، عیاللر باشقه گروهلرگه نسبتاً روحی باسیملرگه کۉپراق دوچ بۉلگن و سۉنگگی خوفسیزلیک بې‌قرارلیگی اولرنینگ روحی همده اقتصادی حالتیگه جدّی تأثیر کۉرسه‌تگن.
بیرلشگن ملتلر تشکیلاتی عیاللر بۉلیمی شونینگدېک، سویس ترقیات و همکارلیک آژانسی‌نینگ مالیوی همکارلیگیده همده محلی همکار آرقه‌لی کۉچیریلگن عایله‌لر کمپ‌لریده عیاللر اوچون مخصوص خوفسیز حدودلر تشکیل اېتیلیشینی قۉللب-قوّتله‌گنینی بیلدیرگن.
تشکیلاتگه کۉره، اوشبو مرکزلرده مصلحت و روحی قۉللب-قوّتلش خدمتلری کۉرسه‌تیلماقده همده عیاللر خوفسیز و خصوصی محیطده بیر-بیری بیلن ملاقات قیلیب، ضرور خدمتلردن فایده‌لنیشلری ممکن.
