خوفسیزلیک کېنگشی گزارشی؛ طالبان خلق احتیاجلری‌گه بې‌پروا و ۲۰ دن آرتیق ترورچی گروه‌لرگه میزبان‌لیک قیلماقده
امین کاوه
بیرلشگن ملتلر تشکیلاتی خوفسیزلیک کېنگشی نینگ سۉنگگی گزارشیده ایتیلیشیچه، طالبان بوتون افغانستان، خصوصاً شهر حدودلریده نظارتنی سقلب قالگن، اما اهالی راضیلیگیگه اعتبار بېرمیدی و خلق همده خلق‌ارا همجمعیت آلدیده هېچ قندی جوابگرلیکنی اۉز ذمه‌سیگه آلمیدی. اوشبو گروه بیلیم‌یورت موضوعلرینی چیقریب تشلش و اۉقوو دستورلرینی اۉز ایدئولوژی‌سی اساسیده شکللنتیریش آرقه‌لی تعلیم و اۉقیشگه کېنگ قمراولی چېکلاولر قۉللگن. گزارشگه کۉره، ملی قرشیلیک جبهه‌سی و آزادلیک جبهه‌سی نینگ هجوملری کمه‌یگن، اما ۲۰ دن آرتیق ترور تشکیلاتی، جمله‌دن، خراسان داعشی، پاکستان طالبان حرکتی و القاعده تامانیدن یرتگن تهدیدلر برقرارلیگیچه قالماقده؛ القاعده حتا اۉز جنگچیلریگه افغانستانگه قیتیشنی بویورگن. طالبان مینگلب تاجیک و اۉزبېک جنگچیلرینی آلیب تشلب، ناراضیلیکلر و ناحق معامله‌لر بیلن ایچکی ترنگلیکلرنی باشقرگن و گروه ایچکی بیرلیگینی سقلب قالگن، شو بیلن بیرگه، هبت‌الله، کوچی مستحکملنیب، گروهلررا بۉیسونیش طالبان رېژیمینی سقلش اوچون برقرارلشتیریلگن. شو بیلن بیرگه، عیاللر و قیزلر، آزچیلیکلر و مجبوری قیتیب کېلگنلر حالتی آغیر، اقتصادی وضعیت ضعیف و اهالی نینگ ۷۰ فایزدن آرتیغی انسانپرورلیک یاردمیگه محتاج؛ تخمیناً ۹۰ فایز اهالی قشاقلیک چیزیغیدن پستده یشماقده. گزارشده تأکیدلنیشیچه، طالبان تیلگه آلگن موجود برقرارلیک کېنگ قمراولی انسان حقلری بوزیلیشی، ایچکی باستیریش و عیاللر اوچون تعلیم و ایش امکانیتلری نینگ چېکلنیشی حسابیگه قۉلگه کیریتیلگن.
ملی قرشیلیک و آزادلیک جبهه‌لری هجوملری
بیرلشگن ملتلر تشکیلاتی خوفسیزلیک کېنگشی نینگ سۉنگگی گزارشیده ایتیلیشیچه، ۲۰۲۵- ییل جنوری آییدن جولای آییگچه ملی قرشیلیک جبهه‌سی طالبانگه قرشی۷۳ و آزادلیک جبهه‌سی اېسه ۴۳ هجومنی عملگه آشیرگن. گزارشگه کۉره، بو هجوملر دوام اېته‌یاتگن بۉلسه‌ده، ترقلگن و چېکلنگن بۉلیب، طالبان رېژیمی اوچون جدی تهدید صفتیده کۉریلمیدی. کېنگش معلوماتلریگه کۉره، ۲۰۲۴- ییلده آزادلیک و ملی قرشیلیک جبهه‌لری ماس روشده ۸۳ و ۲۶۱ هجومنی عملگه آشیرگن بۉلیب، بو ۲۰۲۵ ییلده هجوملر سېزیلرلی درجه‌ده کمیگنینی کۉرسته‌دی.
افغانستانگه مجبوری قیتیش
گزارشده ایتیلیشیچه، پاکستان و ایران اوشبو دولتلرده‌گی افغان مهاجرلریگه کوچلی باسیم اۉتکزگن و اولرنی مجبوری قیتیشگه مجبور قیلگن. گزارشگه کۉره، بو مجبوری قیتیشلر افغان مهاجرلری نینگ ایچکی افغانستاندهگی عایله‌لریگه یوباریله‌دیگن پول مبلغلری نینگ یۉقالیشیگه سبب بۉلگن. گزارشگه کۉره، ۲۰۲۳- ییل اکتوبر آییدن بېری ۴.۵ میلیوندن آرتیق کیشی مجبوری افغانستانگه قیتریلگن. شونینگدېک، گزارشده طالبان نینگ چېکلاوچی سیاستلری خلق‌ارا همجمعیت نینگ قیتیب کېلگنلرگه یاردم کۉرستیش قابلیتینی قیینلشتیرگنلیگی تأکیدلنگن.
گزارشگه کۉره، زلزله کبی طبیعی آفتلر مملکتگه جدی ضربه بېریب، کم منبعلرنی باسیم آستیگه آلگن. بیرلشگن ملتلر تشکیلاتی خوفسیزلیک کېنگشی معلوماتلریگه کۉره، قورغاقچیلیک قیشلاق خۉجه‌لیگی محصولاتلرینی کمه‌یتیره‌دی. گزارشده ایتیلیشیچه، کابل زمانوی دورده بیرینچی بۉلیب سوو تنقیصلیگی بیلن دوچ کېله‌دیگن پایتخت بۉلیشی ممکن، بو اېسه مملکت برقرارلیگی اوچون خوف توغدیره‌دی. اوشبو اساسی معمالر خلق‌ارا یاردم کمه‌ییشی بیلن ینه‌ده کوچه‌یه‌دی.
برقرارلیک انسان حققلری بوزیلیشی و باستیریش حسابیگه
بیرلشگن ملتلر تشکیلاتی خوفسیزلیک کېنگشی تأکیدلگنیدېک، طالبان تیلگه آلگن برقرارلیک انسان حقوقلری بوزیلیشی و ایچکی باستیریش گزارشیگه قۉلگه کیریتیلگن. کېنگش معلوماتلریگه کۉره، اقتصادی معمالر عیاللرگه قۉییلگن چېکلاولر بیلن کوچه‌یگن و اولر نینگ ایشلش امکانیتلریگه جدی تأثیر کۉرستگن. گزارشده ایتیلیشیچه، هبت‌الله نینگ تعلیمگه عاید فرمانلری مملکت اقتصادی امکانیتلرینی ینه‌ده چېکله‌گن.
غیر پشتونلرگه نسبتاً کمسیتووچی مناسبت
گزارشده قید اېتیلیشیچه، طالبان حکومتیده اساسا غیر پشتونلرگه پشتونلرگه قره‌گنده کمراق اعتبار قرتیله‌دی و اولر نینگ بیلن نامناسب مناسبتلر موجود. گزارشگه کۉره، طالبان مینگلب تاجیک و اۉزبېک جنگچیلرینی، اینیقسه، تاجیک و اۉزبېکلر یشیدیگن ولایتلرده، ایشدن بۉشه‌تگن. گزارشده تأکیدلنیشیچه، طالبان بودجه انقراضی سببلی کوچلرینی قیسقرتیریشگه مجبور بۉلگن و بو قراردن سۉنگ اېنگ کۉپ بۉشه‌تیشلر ولایتلرده یوز بېرگن، او یېرده جنگچیلر نینگ کته قسمی تاجیکلر و اۉزبېکلردن عبارت بۉلگن. گزارشگه کۉره، بدخشاندن سۉنگ اېنگ کۉپ بۉشه‌تیشلر کاپیسا، پروان و تخار ولایتلریده قید اېتیلگن.
بیرلشگن ملتلر تشکیلاتی خوفسیزلیک کېنگشی نینگ تحلیل ونظارت جماعه‌سی بیلن تعامل و کابل‌گه سفر
خوفسیزلیک کېنگشی اوشبو گزارشده نظارت جماعه‌سی طالبان بیلن تۉغریدن-تۉغری ملاقات قیلگنینی تصدیقله‌گن. اۉتگن ییل آخریده جماعه طالبان نماینده بیلن باشقه مملکتلرده اوچره‌شگن و یقینده نظارت جماعه‌سی نینگ ایریم اعضالری طالبان بیلن تۉغریدن-تۉغری ملاقات اوچون کابل‌گه سفر قیلگن.
هبت‌الله نینگ حکمرانلیگی دوامیلیگی و کوچه‌ییشی
بیرلشگن ملتلر تشکیلاتی خوفسیزلیک کېنگشی نظارت جماعه‌سی گزارشیده طالبان رهبری هبت الله‌ده، خوفسیزلیک کېنگشی نینگ چېکلاولر رۉیخطیده بۉلمسه هم، «تیوکراتیک حکومت» اسلوبیده اۉز حاکمیتینی مستحکملشنی دوام اېتتیرگنینی بیلدیرگن و قندهارنی سیاسی پایتخت صفتیده تنلگنینی قید اېتگن. گزارشگه کۉره، هبت‌الله صادق و تنلب آلینگن شخصلرنی تعیینلش آرقه‌لی حاکمیت مرکزلشووینی کوچه‌یتیرگن و نظارتنی آشیرگن.
خوفسیزلیک کېنگشی تأکیدلشیچه، هبت‌الله افغانستانده شریعتگه اساسلنگن باشقروو شکلینی اعلان قیلگن و هر بیر ولایتده طالبان عالملر کېنگشینی تشکیل اېتیش بۉییچه فرمان بېرگن. گزارشده قید اېتیلیشیچه، شریعتنی بوزگن شخصلر نینگ جماعت آلدیده قتل قیلینیشی قیته تیکلنگن.
گزارشده، طالبان ایچیده‌گی ایچکی ضدیتلر موجود بۉلسه‌ده، رهبریت درجه‌سیده محاکمه و ملاقات قیلینمسلیگی تأکیدلنگن. گزارشگه کۉره، ایچکی ضدیتلر نینگ اساسی منبعی عیاللر و قیزلر تعلیمی و ایش بیلن بندلیگی مسأله‌سی حسابلنه‌دی. طالبان رهبری و یقین یوقاری لوازمده‌گیلر بو مسأله‌نی قبول قیلمیدی، گرچه قرشیلر بو تعقیق ایشانچنی سسه‌یتیره‌دی، خلق‌اراعلاقه‌نی اوزیش کمه‌یتیریشگه تۉسقینلیک قیله‌دی و اوزاق مدتلی اقتصادی عاقبتلرگه آلیب کېله‌دی.
خوفسیزلیک کېنگشی نظارت جماعه‌سی تأکیدلشیچه، طالبان ایچیده‌گی نزاعلر و ایچکی محاکمه‌لر کۉپینچه باستیریله‌دی و عامه اوچون یشیریله‌دی. گزارشده، هبت‌الله اخندزاده و عبدالحکیم حقانی اوستیدن خلق‌ارا جنایی محکمه تامانیدن چیقریلگن حبس حکملری قید اېتیلگن، بو حکملر جنسی اساسلی زۉرآورلیک اوچون بېریلگن. بیراق، بو حبس حکملری نینگ طالبان نینگ خلق‌ارا تن آلینیشگه بۉلگن سعی-حرکتلریگه قنده‌ی تأثیر قیلیشی نامعلوم دیر.
هبت الله نینگ ایچکی گروهده‌گی حکمرانلیگی و وارثی بېلگیلنیشی مسأله‌سی
خوفسیزلیک کېنگشی نظارت و بهالش جماعه‌سی گزارشیده قید اېتیلیشیچه، طالبان نینگ اساسی شخصیتی هبت الله نینگ کوچی بیلن رقابت قیلیشی ممکن بۉلگن شخصلر موجود بۉلسه‌ده و اولر سیاستینی تنقید قیلسه هم، رهبر طالبان اعضالرینی اطاعتکار و صادق سقلش یۉلینی تنله‌گن. گزارشگه کۉره، اونینگ موقعیی برقرار قالماقده و اونی المشتیریش اوچون وارث یاکه نامزاد بېلگیلنمگن.
گزارشگه کۉره، طالبان ایچیده‌گی اېنگ کته ضدیت منبعی هبت‌الله نینگ قندهارده‌گی بازه‌سی و سراج‌الدین حقانی رهبرلیگیده‌گی حققنی ترماغی همده گروه نینگ عالی تعلیم وزیری ندا محمد ندیم دیر. گزارشده، حقانی هبت الله گه نسبتاً؛ یومشاق یۉلنی قۉللب-قوتلاوچی صفتیده کۉریله‌دی، اما برقرارلیکنی سقلش مقصدیده امیرگه اطاعت قیلماقده.
گزارشده طالبان تشقی ایشلر وزیرلیگی نینگ سابق سیاسی اۉرین‌باسری شیر محمد عباس ستانکزی نینگ ایشدن بۉشه‌تیلیشی قید اېتیلگن. او رهبرنی عیاللر تعلیمیگه قۉییلگن تعقیق بۉییچه تنقید قیلگنی سببلی بۉشه‌تیلگن و هبت الله اونینگ حبسینی بویورگن، اما ستانکزی افغانستاندن چیققن و حاضرده قاچقینلیکده یشماقده.
بې‌پروا؛ خلق راضی بۉلیشی و کۉپراق اطاعتنی تأمینلش اوچون تعقیق قۉللش
خوفسیزلیک کېنگشی معلوم قیلگنیچه، طالبان بوتون مملکت، خصوصاً شهر حدودلریده اۉز نظارتینی مستحکملشگن. شو بیلن بیرگه، بو گروه نینگ حکمرانلیگی کۉپینچه ناانیق و کم اخبارات بېریش بیلن کېچه‌دی، چونکه طالبان اۉز سیاستلرینی عملگه آشیریش اوچون خلق قۉللب-قوتلشینی یاکه راضیلیگینی قبول قیلیشی شرط دېب حسابلمه‌یدی. گزارشده ایتیلیشیچه، طالبان اۉزلرینی «افغانستان اوستیدن حکمرانلیک قیلیشگه تقدیرلنگن» دېب بیله‌دی و نه‌فقط خلق راضیلیگینی اعتبارگه آلمه‌یدی، بلکه فقرالر و خلق‌ارا همجمعیت نینگ خواطرلریگه هم جواب بېرمه‌یدی.
گزارشده انترنت و مخابرات خدمتلرینی ۴۸ ساعتگه اوزیش بۉییچه بویروق بېریلگنی تیلگه آلینگن. اوشبو چاره‌نی هبت‌الله «اخلاقسیز» فلملرنی انترنت آرقه‌لی ترقه‌تگنلیکده عیبلاو بیلن عملگه آشیرگن و بو حالت انترنتنی اوزیش نینگ اساسی سببی صفتیده کۉرسه‌تیلگن.
گزارشگه کۉره، طالبان قندهارده تعلیم تیزیمینی قیته لایحه‌لشگن و اونی هبت‌الله نینگ تۉلیق و بې‌واسطه نظارتی آستیگه آلگن. گزارشده ایتیلیشیچه، بو گروه نینگ شریعتگه عاید دینی تلقینلریگه اورغو بېریب، طالبان مکتب و بیلیم یورتلرده تورلی درجه‌ده‌گی اۉقوو دستورلرینی قیته کۉریب چیقیش بۉییچه دایمی حرکتلرنی دوام اېتتیرماقده. شو بیلن بیرگه، فقرالیک قدریتلری، انسان حقوقلری و عیاللر نینگ حقوقلری، عیاللرگه عاید تدقیقاتلر و خلق‌ارا تشکیلاتلر نینگ مضمونی فقط طالبان ایدیولوژی‌سیگه ماسلشتیریلگن و غربگه قرشی روایتلر همده هبت‌الله گه صادقلیک بیلن المشتیریلگن.
گزارشده ایتیلیشیچه، طالبان بیلیم یورتلردن ۱۸ موضوعنی آلیب تشله‌گن، چونکه بو موضوعلر گروه نینگ شریعت و سیاست تلقینلریگه ماس کېلمه‌یدی. اوشبو موضوعلرگه اساسی قانون، اسلامی سیاسی حرکتلر، یخشی باشقروو، سیلاو تیزیملری، دموکراسی و انسان حقلری، عیال جمعیتشناسلیگی، اخلاق فلسفه‌سی و باشقه فنلر کیرا‌دی. شونینگدېک، ۲۰۰ موضوع فقط طالبان تلقینیگه موافق قیته یازیلگن تقدیرده اۉقیتیلیشی ممکن.
خوفسیزلیکنی تأمینلش و خوفسیزلیک معمالری بۉییچه ادعالر
گزارشده ایتیلیشیچه، افغانستاندهگی خوفسیزلیک حالتی خوفسیزلیک کېنگشی نینگ آلدینگی حسابات دوری بیلن سالیشتیرگنده برقرار قالگن، اما معمالر سقلنیب قالگن. گزارشگه کۉره، اساسی معمالردن بیری مملکتده‌گی ترورچیلیک گروهلری نینگ موجودلیگی بۉلیب، او منطقوی برقرارلیککه خوف ساله‌دی و ایکی تامانلمه ترنگلیکلرنی یوزه‌گه کېلتیره‌دی.
گزارشده ایتیلیشیچه، طالبان افغانستان حدودیده خراسان داعشی موجودلیگینی رد اېته‌دی. گرچه بو گروه داعش گه قرشی عملیاتلر اۉتکزگن بۉلسه‌ده، داعش ایچکی و چېگره‌لررا خوف صفتیده قالماقده. گزارشگه کۉره، اعضا دولتلر افغانستانده ۲۰ دن آرتیق خلق‌ارا و منطقوی ترورچیلیک گروهلری فعالیت یوریته‌یاتگنینی بیلدیرگن. القاعده، پاکستان طالبانی حرکتی، شرقی تورکستان اسلامی حرکتی (ETIM/TIP)و تاجیکستانده‌گی انصارالله جمعیتی حاضرده فعالیت آلیب بارماقده.
بیرلشگن ملتلر تشکیلاتی خوفسیزلیک کېنگشی معلوم قیلگنیچه، طالبان نینگ باشقروو توزیلمه‌سی، اینیقسه شهر مرکزلریدن تشقریده، پولیس فعالیتی و حاکمیتنی عملگه آشیریشده موفقیتلی بۉلمه‌دی. فساد، جوابگرلیک نینگ یۉقلیگی و محلی طالبان کوچلری آره‌سیده‌گی ضدیتلر اساسی تۉسیقلر صفتیده قالماقده. گزارشگه کۉره، افغانستاندهگی اقتصادی معمالر هم طالبان نینگ خوفسیزلیک چاره‌لری مرکبلیگینی آشیرگن و بو گروهنی مالیوی خرجتلرنی خوفسیزلیک ساحه‌سیگه کۉپراق یۉنه‌لتیریشگه مجبور قیلگن.
عیاللر و قیزلر، آزچیلیکلر و سابق افغانستان جمهوریتی رسمیلری حالتی
خوفسیزلیک کېنگشی نظارت گروهی گزارشده ایتیلیشیچه، افغانستاندهگی عیاللر و قیزلر حالتی هنوز آغیر قالماقده. یونیسف نینگ ۲۰۲۴، ییلگی افغانستان جنسی تېنگلیک کۉرسه‌تکیچلریگه عاید تېکشیروویگه کۉره، هر ۱۰ عیالدن سکیزی تعلیم و ایشدن محروم. شونینگدېک، افغانستان دنیاده ایکینچی اېنگ کته جنسی تېنگسیزلیککه اېگه. طالبان نینگ عیاللرگه عاید سیاستی، تخمیناً، هر ییلی مملکت اقتصادیگه بیر میلیارد دالردن آرتیق ضرر یېتکزه‌دی.
طالبان نینگ مالیوی حالتی و مخدر ماده‌لر
گزارشده تأکیدلنیشیچه، افغانستان اقتصادی نهایتده ضعیف حالتده قالماقده. گزارشگه کۉره، ۲۰۲۵- ییل نینگ بیرینچی یرمیده یلپی ایچکی محصولات ۶.۵ فایزگه قیسقرگن و ایشسیزلیک درجه‌سی ۷۵ فایز اېتیب قید اېتیلگن. خوفسیزلیک کېنگشی معلوماتیگه کۉره، افغانستان اهالیسی نینگ ۹۰ فایزدن آرتیغی قشاقلیک چېگره‌سیدن پستده یشماقده و اهالی نینگ ۷۰ فایزدن کۉپراغی انسانسیورلیک یاردمگه قره‌مدیر.
خوفسیزلیک کېنگشی نینگ نظارت گروهی معلوم قیلیشیچه، ۲۰۲۵ – ییل اکتوبر آییده افغانستان نینگ ایچکی درآمدلری آشگن، بیراق خلق‌ارا تۉلاولرنی عملگه آشیریش امکانیتی هنوز کېسکین چېکلنگنلیگیچه قالماقده. حواله پول اۉتکزمه‌لری ترماقلری کېنگ قۉللنیلماقده و مخدر ماده‌لر سوداسی افغانستان نینگ نارسمی اقتصادی‌ده هنوز اوستونلیک قیلماقده.
گزارشده بیرلشگن ملتلر تشکیلاتی نینگ مخدر ماده‌لر و جنایتچیلیککه قرشی کوره‌ش باشقرمسی (UNODC) معلوماتلریگه ته‌یه‌نیب ایتیلیشیچه، ۲۰۲۵ – ییلده تعقیق و قورغاقچیلیک سببلی کۉکناری اېکینلری پست درجه‌ده قالگن بۉلیب، اېکین میدانی تخمیناً ۱۰ مینگ و ۲۰۰ هکتارنی تشکیل اېتگن. بو کۉرستکیچ ۲۰۲۴- ییلگه نسبتاً ۲۰ فایزگه کمدیر. گزارشگه کۉره، کۉکناری یېتیشتیریش افغانستان جنوبیدن شمالیگه کۉچگن و دهقانلر نینگ کۉکناریدن آله‌دیگن درآمدی کمه‌یگن.
گزارش خلاصه‌لریگه کۉره، ایشسیزلیک درجه‌سی نینگ یوقاریلیگی سببلی کۉپلب قیشلاق دهقانلری و محلی قاچاقچیلر مت‌آمفتامین ایشلب چیقریشگه اعتبار قره‌تگن. گزارشگه کۉره، طالبان رسمیلری سۉنگگی بیر ییل دوامیده مت‌آمفتامین لابراتوار‌لرینی هم اۉز ایچیگه آلگن حالده بیر مینگ و ۴۰۰ مخدر ماده ایشلب چیقریش مرکزی یۉق قیلینگنینی دعوا قیلگن. بیراق بیرلشگن ملتلر تشکیلاتی نینگ مخدر ماده‌لر و جنایتچیلیککه قرشی کوره‌ش باشقرمسی مت‌آمفتامین مصادره قیلینیشی سېزیلرلی درجه‌ده آشگنینی معلوم قیلگن بۉلیب، بو افیونلر نینگ صنعی مخدر ماده‌لر بیلن المشتیریلیش خوفی آرتیب باره‌یاتگنینی کۉرسته‌دی.
افغانستاندهگی خلق‌ارا ترورچیلیک گروهلری
الف) خراسان داعشی
بیرلشگن ملتلر تشکیلاتی خوفسیزلیک کېنگشی معلوم قیلیشیچه، طالبان خراسان داعشی افغانستانده مغلوب اېتیلگنینی دعوا قیلماقده و قالگن تهدیدلر اوشبو گروه هسته توزیلمه‌لری نینگ چېگره‌لررا کیریب کېلیشی بیلن باغلیق اېکنینی بیلدیرگن. شونگه قره‌می، اعضا دولتلر افغانستاندن کېله‌یاتگن اېنگ کته ترورچیلیک تهدیدی هنوز خراسان -داعشی بۉلیب قاله‌یاتگنینی بهالماقده. خوفسیزلیک کېنگشی نظارت گروهی معلوماتیگه کۉره، داعش تشقی عملیاتلرنی عملگه آشیریش صلاحیتی و نیتینی سقلب قالگن همده شیعه‌لر یشیدیگن حدودلر، طالبان و خارجی نشانلرگه هجوملرنی اوستوار یۉنه‌لیش صفتیده بېلگیله‌گن.
گزارشگه کۉره، ۲۰۲۴ – ییل ۱۱- دسامبر کونی طالبان نینگ قاچقینلر و قیتیب کېلووچیلر بۉییچه سابق وزیری خلیل احمد حقانی نینگ اۉز جانیگه قصد هجومیده هلاک بۉلیشی، اوشبو هجوم اوچون داعش مسوولیتنی اۉز ذمه‌سیگه آلگنی، بو گروه نینگ افغانستاندهگی برقرار عملیات امکانیتلرینی کۉرسه‌ته‌دی.
گزارشده ایتیلیشیچه، خراسان- داعشی یېتکچیسی ثناالله غففاری هنوز فعال بۉلیب، گروه اوچون یاللش استراتیژیسینی کېنگه‌یتیریشده مهم رۉل اۉینماقده. اوشبو گروه نینگ ابو ابو منذر و کاکا یونس ناملری بیلن تنیلگن ایکی مسوولی مرکزی آسیادن، خصوصاً تاجیکستان و اۉزبېکستان حدودلریدن تخمیناً ۶۰۰ نفر کۉنگیللینی جلب قیلگن. گزارشگه کۉره، بو شخصلر نینگ بیر قسمی افغانستانگه کۉچیریلگن، بیر قسمی اۉز مملکتلریده قالگن، ینه بیر قسمی اېسه اروپاگه یوباریلگن. اولر نینگ اکثریتی یاشلر بۉلیب، آنلاین دینی ملاقاتلر آرقه‌لی یاللنگن.
خوفسیزلیک کېنگشی معلوماتیگه کۉره، خراسان داعشی جنگریلری سانی قریب ایکی مینگ نفر دېب بهالنماقده. گزارشگه کۉره، اوشبو گروه دنیاده گی مقیاسده شاو-شوولی هجوملر اویوشتیریش آرقه‌لی ینگی کوچلرنی جلب قیلیش و مالیوی منبعلرنی تأمینلشگه اینتیلماقده. شونینگدېک، گزارشده قید اېتیلیشیچه، خراسان داعشی قۉل‌باله پارتلاوچی ماسلمه‌لر تیارلش بۉییچه یۉریق‌نامه‌لر ایشلب چیقیشده و اوچ اۉلچملی پرینترلر یاردمیده قورال قسملرینی چاپ اېتیشده صنعی عقلدن فایده‌لنماقده.
گزارشده ایتیلیشیچه: «خراسان داعشی نینگ رهبریتی هنوز افغان پشتونلر تامانیدن باشقریلماقده، اما اوشبو گروه کوچلری نینگ کته قسمی مرکزی آسیا دولتلری فقرالریدن عبارت.» خوفسیزلیک کېنگشی معلوماتیگه کۉره، داعش افغانستان نینگ ایریم حدودلریده دینی مدرسه لر تشکیل قیلگن و کیچیک یاشده‌گی باله‌لر، خصوصاً ۱۴ یاشدن کیچیک باله‌لر، اوچون ایدیولوژیک و انتحاری تیارگرلیک بېریلماقده. گزارشده قید اېتیلیشیچه، بو مدرسه لر و اۉقوو کورسلری اساسا افغانستان شمالیده و پاکستان چېگره‌سیگه یقین حدودلرده فعالیت یوریته‌دی.
خوفسیزلیک کېنگشی نینگ نظارت و بهالش کمیته‌سی معلوم قیلگنیدېک، داعش-خراسان حاضرده اساسا کیچیک حجره شکلیده فعالیت یوریته‌دی و اونینگ موجودلیگی اینیقسه افغانستان شمال و شرقیده دوام اېتماقده. گزارشگه کۉره، طالبان ۲۰۲۵ ییل باشیدن بېری خراسان داعشیگه قرشی بیر نېچته اتروریسم گه قرشی عملیاتلرینی عملگه آشیرگن و گروه نماینده لری «موفقیتلی باستیریش»نی معلوم قیلگن. شو بیلن بیرگه، گزارش خراسان داعشی نینگ دعوا قیلینگن هجوملری نینگ دوام اېتیشی، پروپاگندا فعالیت نینگ کوچه‌ییشی، کوچ جلب قیلیش و طالبان صفلریگه کیریش امکانیتی بۉییچه خواطرلرنی قید اېته‌دی.
گزارشده تأکیدلنیشیچه، خراسان داعشی نینگ مالیوی منبعلری انیق اېمس؛ بیراق حبسگه آلینگنلر بیلن صحبتگه کۉره، گروه تخنیکی واسطه‌لر، لپ‌تاپ و تلفنلردن فایده‌لنیب، اۉز اعضالری اوچون آزیق-طعام تأمینلنگن. شونینگدېک، مالیوی منبعلر صفتیده مبلغلر یاردمیده آدملرنی اۉغیرلش، محلی تدبیرکارلرنی نشانگه آلیش ورقملی پوللردن فایده‌لنیش کۉرستیب اۉتیلگن.
ب) پاکستان طالبان حرکتی (TTP)
خوفسیزلیک کېنگشی نظارت گروهی معلوماتیگه کۉره، پاکستان طالبان حرکتی حسابات دوریده اساسا پاکستان اوردوسی و دولت اداره‌لریگه قرشی هجوملرنی کوچه‌یتیرگن. گزارشگه کۉره، تی‌تی‌پی نینگ تکراری هجوملری طالبان عملدارلری نینگ برقرارلیگیگه قیسقه مدتلی اېنگ کته تهدید حسابلنه‌دی. گزارشده قید اېتیلیشیچه، تاریخی مناسبتلر سببلی طالبان نینگ پاکستان طالبان حرکتیگه قرشی فعال چاره کۉریشی احتمالدن ییراقدیر. حتا طالبان قرشی کوره‌شیشگه تیار بۉلسه هم، بو نینگ اوچون ضرور امکانیتگه اېگه اېمس.
گزارش نتیجه‌لریگه کۉره، پاکستان طالبان حرکتی جنگریلری سانی تخمیناً آلتی مینگ نفر دېب بهالنگن. شونینگدېک، گروه یېتکچیسی نور ولی محسود بیر مدت کابلده بۉلگن و ۲۰۲۵- ییل بهاریده کندهار، کنر، ننگرهار و پکتیا ولایتلریگه تشریف بویورگن.
ج) القاعده
خوفسیزلیک کېنگشی نظارت گروهی معلوم قیلگنیچه، افغانستاندهگی القاعده حالتی، کوچی و موقعی اولگی گزارشلرگه نسبتاً اۉزگرمه‌گن. گزارشگه کۉره، طالبان هنوز اوشبو گروهنی قۉللب-قوتله‌یدی و القاعده نینگ یوقاری درجه‌ده‌گی رهبرلری کابلده یشماقده.
گزارشده ایتیلیشیچه، القاعده یېتکچیسی، سیف‌العدل، ۲۰۲۴- ییل یازیده افغانستاننی گروه اعضالری اوچون خوفسیز باش‌پناه صفتیده بېلگیلگن و صادق اعضالردن اۉقوو و تجربه آرتتیریش اوچون مملکتگه کېلیشنی سۉره‌گن. شونینگدېک، القاعده تخنیکی امکانیتلرنی رواجلنتیریش و پهپاد یوک تشیش قوتینی آشیریشگه اعتبار قره‌تگن، پهپاد تکنالوژی‌لری و جهازلرینی قاره بازار آرقه‌لی همده ایریم رسمی کۉرینیشگه اېگه کاناللر آرقه‌لی آلگن.
چېکلاولرنی عملگه آشیریش و سیاحتگه استثنالر
گزارشده ایتیلیشیچه، طالبان نینگ ۱۳۵ نفر اعضاسی و بېش تشکیلاتی چېکلاولرگه، مال-ملکنی قفل قیلیش، سیاحت چېکلاوی و قورال چېکلاولریگه تارتیلگن. گزارشگه کۉره، نظارت گروهی ۲۰۲۵- ییل اکتوبر آخریگچه کمیده ۵۸ نفر چېکلاو آستیده‌گی طالبان اعضاسی حاضرگی طالبان رهبرلری بیلن باغلیق بۉلیب، اوشبو شخصلر یوقاری درجه‌ده‌گی مصلحت یاکه باشقروو لوازملریده ایشله‌یاتگنینی تصدیقله‌گن.
کمیته معلوم قیلگنیدېک، حسابات دوریده (می ۲۰۲۴ – ۱۱ نوامبر ۲۰۲۵) چېکلاولر رۉیخطیده‌گی شخصلر اوچون سیاحت چېکلاویدن استثنا قیلیش بۉییچه ۳۸ ته سۉراو تصدیقلنگن. اوشبو سۉراولر آره‌سیده تۉرت نفر شخص دوالنیش، تۉقیز نفر حج مراسمی، ۲۱نفر خلق‌ارا ییغیلیشلر اشتراکی و سکیز نفر ایکی تامانلمه مصلحتلر اوچون رخصت آلگن.
گزارشده ایتیلیشیچه، ۳۸ سیاحتدن آزاد قیلینیش سۉراوی ۱۱ اعضا دولت تامانیدن تصدیقلنگن. بو سیاحتلر منزللری صفتیده چین، هند، پاکستان، قطر، روسیه، سعودی عربستانی، تورکیه، بیرلشگن عرب امیرلیکلری و اۉزبېکستان کۉرسه‌تیلگن. اعلان قیلینگن جدولگه کۉره، امیرخان متقی، طالبان تشقی ایشلر وزیری، توقیزته آزادلیکنی آلگن حالده اېنگ کۉپ سیاحت رخصتیگه اېگه بۉلگن. اونینگ آرتیدن عبداللطیف منصور، سوو و انرژی وزیری، عبدالسلام حنفی، طالبان باش وزیرلیک مأموری یاردمچیسی، و عبدالغنی برادر، اقتصادی یاردمچی، هر بیری تۉرتته آزادلیک آلگن. شونینگدېک، خیرالله خیرخواه، نور محمد ثاقب، حمدالله آخوند، عبدالحق وثیق، هدایت الله بدری و سراج الدین حقانی هر بیری اوچته سیاحتدن آزادلیک آلگن.
قوراللر بۉییچه چېکلاولر
بیرلشگن ملتلر تشکیلاتی خوفسیزلیک کېنگشی نظارت گروهی معلوم قیلگنیدېک، اعضا دولتلر حسابات بېرگنلریچه، تورلی گروهلر چېگره‌لررا قاچاقده و قاره بازار آرقه‌لی زمانوی و ایلغار قوراللرگه اېگه بۉلگن. کېنگش نینگ ایتیشیچه، طالبان نماینده لری پهپادلر نینگ حربی عملیاتلرده اساسی رۉلینی یخشی توشونیشه‌دی و اۉز صلاحیتینی اوشبو ساحه‌ده کېنگه‌یتیریشگه حرکت قیلگن، شونده «ارزان هوا کوچی» یره‌تیش ممکن بۉلر اېدی.
شونینگدېک، گزارشده ایتیلیشیچه، طالبان و پاکستان اۉرته‌سیده‌گی تۉقنه‌شوولر سببلی چېگره اۉتیش نقطهلری یاپیلگنلیگی طفیلی افغانستان کونیگه تخمیناً بیر میلیون دالر ضرر کۉره‌دی. گزارشده آگاهلنتیریلیشیچه، اساسی مسأله‌لرگه اعتبار بېریلمسه، پاکستان و طالبان اۉرته‌سیده حربی تۉقنه‌شوو خوفی کوچه‌ییشی ممکن. گزارش خلاصه‌سیگه کۉره، افغانستان منطقوی بې‌قرارلیک منبعی بۉلیب قالماقده و طالبان، ایچکی باستیریشلرگه قره‌مه‌ی، ترورچیلیک گروهلری بیلن علاقه‌نی توختته آلمه‌یدی و ایستمیدی.
