یونیسف: افغانستانده یقینده یوز بېرگن سوو تاشقینلری آدملر جانینی آلیب کېنگ کۉلملی ضررلر یېتکزدی
۸صبح، کابل: بیرلشگن ملتلر تشکیلاتی‌نینگ باله‌لرنی قۉللب-قوّتلش جمغرمه‌سی (یونیسف) افغانستانده یقینده یوز بېرگن سوو تاشقینلری عاقبتیده اۉنلب کیشی جان بېرگنی و جراحتلنگنینی، یوزلب اویلر همده مهم آست-قورمه‌لر‌‌نینگ اَیریم قِسملری ویران بۉلگنینی معلوم قیلدی.
اوشبو تشکیلات یک‌شنبه کونی، ۱-سنبله کونی، بېرگن حساباتیده اَیتیشیچه، بو سوو تاشقینلری ۲۰-جولایدن ۳-اگوستگچه افغانستان‌نینگ مرکزی و شرقی حدودلریده یوز بېرگن و کۉپلب آدملر‌نینگ حیاتیگه تأثیر کۉرسه‌تگن.
یونیسف معلوم قیلیشیچه، نورستان ولایتی‌نینگ پارون تومنی اېنگ کۉپ ضرر کۉرگن حدودلردن بیری بۉلگن. اوشبو تومنده ۲۴ کیشی جان بېرگن، ۱۲۵ کیشی یره‌لنگن و ینه بیر قطار آدملر بې‌درک یۉقالگن.
حساباتگه کۉره، پارونده ۱۲۰ ته اوی ویران بۉلگن یاکه ضرر کۉرگن، شونینگدېک، بیرته خصوصی ساغلیقنی سقلش مرکزی، محلی بازارلر، کۉپریکلر، یۉللر و سوو تأمیناتی ترماقلری هم اوشبو سوو تاشقینلریده ضرر کۉرگن.
افغانستان‌نینگ مرکزی حدودلریده سوو تاشقینلری تۉقّیز ولایتده ایکّی کیشی‌نینگ اۉلیمی و آلتی کیشی‌نینگ یره‌لنیشیگه سبب بۉلگن. اوشبو حدودلرده ۳۱۶ ته اوی ضرر کۉرگن و قریب ۲ مینگ ۵۷ کیشی جبر کۉرگن.
یونیسف شونینگدېک، سوو تاشقینلری ایلگری یېر آستیگه کۉمیلگن اۉق-دارولر و پارتلاوچی مادّه‌لرنی کۉچیریش یاکه یوزه‌گه چیقریشیگه سبب بۉلگن بۉلیشی ممکنلیگیدن آگاهلنتیردی.
