بیرلشگن ملتلر تشکیلاتی: ۱۹ کیشی افغانستان وطنداشی نیمروزده ناقانونی مهاجرت یۉلیده جان بېردی
۸صبح، کابل: خلق‌ارا مهاجرت تشکیلاتی (IOM) افغانستان‌نینگ ۱۹ نفر وطنداشی نیمروز ولایتی چوللریده ناقانونی مهاجرت قیلیشگه اورینگن پیتده جان بېرگنینی معلوم قیلدی.
مذکور تشکیلات شنبه کونی، ۱۰ اسد، ایکس صحیفه‌سیده اوشبو افغانستان وطنداشلری‌نینگ مهاجرت یۉللریده جان بېرگنی حقیده‌گی خبرلردن چوقور قیغوده اېکنینی یازدی.
خلق‌ارا مهاجرت تشکیلاتی قربانلر‌نینگ عایله اعضالری و یقینلریگه همدردلیک بیلدیریب، مهاجرت یۉللریده یۉقاتیلگن هر بیر انسان حیاتی چوقور و آغریقلی فاجعه اېکنینی تأکیدله‌دی.
بو بیانات اۉتگن کون ایرانگه ناقانونی آلیب اۉتیش یۉلیده نیمروز چۉللریده بې‌درَک یۉقالگن ۱۴ نفر افغانستان وطنداشی‌نینگ جسدی تاپیلگنی آرتیدن ینگره‌دی.
بیرلشگن ملتلر تشکیلاتی‌نینگ قاچقینلر ایشلری بۉییچه عالی کمیسارلیگی (UNHCR) اوّلراق نیمروز ولایتیده ناقانونی مهاجرت یۉلیده افغانستان‌نینگ بېش نفر وطنداشی جان بېرگنی، ینه ۱۴ کیشی اېسه هنوز بې‌درک یۉقالگنینی معلوم قیلگن اېدی.
