امریکا سیلاوی کونی ترورچیلیک هجومی‌گه اورینیشده عیب‌لنگن افغان یاش‌گه ۱۵ ییل قماق جزاسی بېریلدی
۸صبح، کابل: ۱۹ یاشلی افغان یاش، عبدالله حاجیزاده، امریکا دایمی یشه‌ش گواه‌نامه‌سیگه اېگه بۉلیب، سیلاو کونی ترورچیلیک هجومینی عملگه آشیریش مقصدیده قورال و اۉق-داریلرنی آلیشگه اورینیشده عیبلنیب، ۱۵ ییل قماق جزاسی آلدی.
امریکا عدلیه وزیرلیگی، ۲۸- عقرب چهارشنبه کېچه‌سی، اعلان قیلگن خبرنامه‌ده ایتیلیشیچه، حاجیزاده و ۲۸ یاشلی نصیر احمد توحیدی، ایکی دانه AK-۴۷ قورالی و ۵۰۰ دانه اۉق بیلن، داعش نامیدن ۲۰۲۴- ییل نوامبر آییده‌گی سیلاو کونی ترورچیلیک هجومی اویوشتیریشنی رېجه‌لشتیرگن.
حاجیزاده، ۲۰۲۴- ییل اکتوبر آییده حبسگه آلینگن و ۲۰۲۵ ییل اپرېل آییده اۉز عیبینی تن آلگن.
اعتراف شرطنامه‌سیگه کۉره، او جزانی اۉته‌گچ امریکادن چیقریله‌دی و دایمی یشه‌ش همده قاچقین صفتیده مراجعت قیلیش حقوقیدن محروم بۉله‌دی.
وزیرلیک قۉشیمچه قیلیشچه: توحیدی هم داعش‌گه مادی یاردم کۉرسه‌تیش و ترورچیلیک جنایت‌لری اوچون قورال آلیش‌ده عیبلنماقده؛ عیبلاو اثباتلنسه، اونگه ۲۰ ییلگچه قماق جزاسی بېریلیشی ممکن.
امریکا عدلیه وزیرلیگی ملی خوفسیزلیک بۉلیمی رییسی، سو جی بای، شونده‌ی ایتیشیچه: «اوشبو حکم ترورچیلیک حرکتلرینی آلدینی آلیش و اولرنی عملگه آشیرووچیلرنی محکمه‌گه تارتیش باره‌سیده‌گی جدیلیگیمیزنی کۉرسه‌ته‌دی.»
مذکور ایش بۉییچه تېرگاو اف‌بی‌آی نینگاوکلاهاما ایالتی‌ده‌گی تروریسم‌گه قرشی قۉشمه گروهی تامانیدن، فدرا‌ل اداره‌لر و محلی پولیس بیلن همکارلیکده آلیب باریلگن.
