8صبح، کابل: مسوولان شرکت برشنا می‌گویند که افغانستان در سال گذشته میلادی در مجموع به ارزش بیش از ۲۶۰ میلیون دالر از تاجیکستان، اوزبیکستان و ایران برق وارد کرده است.
عبدالرحمان رحمانی، رییس شرکت برشنا در گزارش سالانه خود، روز یک‌شنبه، ۱۴ جوزا، گفته است که این شرکت تنها به تاجیکستان در سال ۲۰۲۲، ۹۶ میلیون دالر بابت خرید برق پرداخته است.
به گفته رحمانی، همچنان در سال گذشته ۹۴ میلیون دالر به اوزبیکستان و ۶۲ میلیون دالر به ایران پرداخت شده است.
در کنار واردات برق از کشورهای همسایه، شرکت برق افغانستان، ۲۲.۳ میلیون افغانی به شرکت‌های تولید برق داخلی نیز واریز کرده است.
افغانستان با وجود داشتن منابع آبی متعدد، به‌شدت وابسته به برق وارداتی از کشورهای همسایه است.
بربنیاد اطلاعات، در حال حاضر حدود ۷۵ درصد برق مورد نیاز افغانستان از کشورهای همسایه تامین می‌شود.
شرکت برشنا در حالی از پرداخت هزینه هنگفت مالی به کشورهای همسایه شمالی افغانستان خبر می‌دهد که در اوایل سال روان میلادی، تاجیکستان و اوزبیکستان به‌دلیل آنچه که بدهکاری افغانستان از درک قرض عنوان کرده‌اند، برای چندین روز جریان برق به کشور را قطع کردند.
گفتنی است که تنها شهر کابل در فصل‌های مختلف از ۵۰۰ تا ۸۰۰ میگاوات برق ضرورت دارد.
