۸صبح‌نینگ ییگیرمه یاشلیگی
۸صبح گزېته‌سی اۉز فعالیتی‌نینگ ییگیرمه‌نچی ییلیگه قدم قۉیدی. یازیش، حکایه قیلیش و افغانستان کبی سیاسی اۉزگریشلر، کېتمه-کېت انقراضلر همده سۉز اېرکینلیگیگه قۉییلگن چېکلاولر گِردابیده‌گی جمعیتده حکایه‌چیلیک، تدقیقات و پارلاقلیک مدنیتینی تیزیملی‌لشتیریش اوچون ییگیرمه ییل قیسقه مدت دیر. اما ۸صبح اۉز فعالیتی‌نینگ ایلک کونی‌دن بوگونگچه عیناً شو تمایللرگه صادق قالیب کېلماقده.
بو ییللر دوامیده ۸صبح خلق آوازی بۉلیشگه اینتیلدی؛ بعضاً انقراضلر شاوقینیده اۉچیب قالگن، بعضاً اېسه اته‌یلب چېتگه سوریلگن سېس بۉلدی. اوشبو عامه‌وی اخبارات واسطه‌سی تدقیقی ژونالیست‌لیک، میدان راېورتاژلری، تحلیل و صحبتلرگه ته‌ینگن حالده افغانستان، منطقه و دنیا حقیقت‌لرینی ینه‌ده انیقراق تصویرلشگه حرکت قیلدی.
۸صبح اۉتگن ییگیرمه ییل ایچیده تورلی تجربه‌لرنی باشدن کېچیردی و کۉپلب یوکسه‌لیش همده پسه‌ییشلرنی کۉردی. اما بو تجربه‌لرنینگ برچه‌سیدن سبق آلدی و برچه ترتیبسیزلیک همده قیینچیلیکلرگه قره‌مه‌ی، هنوز تیک توریب، حکایه قیلیب، اېرکینلیک و عدالت اوچون کوره‌شیب کېلماقده. گزېته بو یۉلده ینه‌ده ینگی نفس آلدی و ایلگری‌دن کوچلیراق طرزده آلدینگه باره‌دی. ۸صبح بو ییللر دوامیده تورلی ساحه‌لرده‌گی اچّیق و شیرین تجربه‌لردن سبق آلیب، ژونالیست‌لیک‌نی ینه‌ده معیاری‌لشتیریش و عامه‌وی اخبارات واسطه‌سی‌نینگ خلق آوازی رمزی صفتیده آینه‌دېک بۉلیشی اوچون حرکت قیلدی و قیلماقده. هر دایم ایتگنیدېک: «یېتوکلیک-بیزنینگ کېله‌جک آرزومیزدیر.»
۸صبح اۉز فعالیتی‌نینگ ییگیرمه‌نچی ییلیده، دنیا و وطنیمیز محیطینی قارانغی و افلاس قیلگن قیغولی عذابلر همده انقراضلر چنگی آره‌سیده، یره‌لری و امیدی بیلن آلدینگه یوریشده دوام اېته‌دی. سۉنگّی بېش ییل ۸صبح اوچون، احتمال، پارلاقلیک، تدقیقی ژنالیست‌لیک‌نی رواجلنتیریش و سۉز اېرکینلیگینی حمایه قیلیش یۉلیده باسیب اۉتیلگن برچه ییللر قدَر آغیر و مشقتلی بۉلدی. بیز شونده‌ی یۉلده توریبمیز که اونده سانسور و سۉز اېرکینلیگینی باستیریش مثلی کۉریلمه‌گن درجه‌گه یېتدی، اخباراتگه اېریشیش جنایت دېب قره‌لماقده و اونی ترقه‌تیش قماق همده اۉلیم کبی عاقبتلرگه آلیب کېلیشی ممکن.
مملکت‌نینگ ۲۰ دن آرتیق ولایتیده صورت ترقه‌تیش عملده تقیقلنگن و جمعیتگه سکوت همده تصویرسیزلیکنی مجبوری سینگدیریشگه اورینیشلر دوام اېته‌یاتگن بیر محیطده، هر قنده‌ی عامه‌وی اخبارات واسطه‌سی اینیقسه ۸صبح کبی یاش مېدیا اوچون ایش‌نینگ ینه‌ده قیینلشیشی و اونینگ بورچی ینه‌ده آغیر همده اولکن بۉلیشی طبیعی دیر.
۸صبح بو ییللر دوامیده برچه معمالرگه قره‌مه‌ی، اېرکینلیک و عدالت یۉلیده قطعیت و مسوولیت بیلن توردی و خلق آوازی نینگ اۉچیب قالیشیگه یۉل قۉیمه‌دی. گزېته اونوتیش، سکوت، بوزیب کۉرسه‌تیش و باستیریشگه قرشی توردی همده ایلگری‌دن هم قطعی‌راق طرزده خلق نینگ، اینیقسه باستیریلگن عیاللر آوازی نینگ عکس-صداسی بۉلدی.
۸صبح اۉز فعالیتی‌نینگ ییگیرمه‌نچی ییلی مناسبتی بیلن بوگون وېب-سایت و اجتماعی ترماقلرده آلتی میلیوندن آرتیق تۉغریدن-تۉغری ایزلاوچی‌گه اېگه بۉلیب، وطن، اېرکینلیک، عدالت و پارلاقلیک اوچون فعالیت یوریتماقده. اوشبو مېدیا بو یۉلده تورلی و رنگ-برنگ بۉلیملرنی یۉلگه قۉیدی و اولرنی کېنگه‌یتیریشده دوام اېته‌دی. ۸صبح حاضرده تۉرت تیلده فارسچه، پشتوچه، اۉزبېکچه و انگلیس تیلیده فعالیت آلیب بارماقده.
۸صبح‌نینگ حاضرگی فعالیتلری
ینگیلیکلر
۸صبح‌نینگ فارسچه بۉلیمی افغانستان، منطقه و دنیا ینگیلیکلرینی ۲۴ ساعت دوامیده یاریته‌دی. پشتو، اۉزبېک و انگلیس بۉلیملری هم اېرته‌لبدن افغانستان وقتی بیلن تونگی ساعت ۱۲ گچه ینگیلیک و محتوالرنی ترقه‌تدی. ۸صبح ینگیلیکلری سیاست، جمعیت، اقتصاد، مدنیت و سپورت کبی تورلی ساحه‌لرنی قه‌مره‌ب آلیب، حیات‌نینگ برچه جبهه‌لرینی یاریته‌دی.
راپورتاژلر
۸صبح اۉرته‌چه حسابده هر کونی اوچ‌ته راپورتاژ، بعضاً اېسه بېشته‌گچه راپورتاژنی خلق حیاتی و مملکت وضعیتی بیلن بې‌واسطه باغلیق تورلی یۉنه‌لیشلرده چاپ اېته‌دی. شو اساسده هر آی کمیده ۸۰ ته رایورتاژ افغانستان حقیده اعلان قیلینه‌دی. شو بیلن بیرگه، هفته‌سیگه کمیده اوچ ته ویدیو گزارش ۸صبح‌نینگ تورلی پلتفورم‌لریده اعلان قیلینه‌دی.
«۸-صبح»، افغانستانده تدقیقی ژونالیست‌لیک عنعنه‌لرینی قَیته تیکلشده یېتکچی و ایلغار بۉلگنی کبی، قوله‌شدن کېینگی دورده هم تدقیقات و سوال بېریش مدنیتینی دوام اېتتیردی همده بو مدت ایچیده کمیده هر آی بیرته تدقیقی راپورتاژ ترقه‌تدی.
۸صبح‌نینگ تدقیقی راپورتاژلری کۉپراق انسان حقوقلری قدریتلری، افغانستانده انسان حقوقلری نینگ کېنگ کۉلملی بوزیلیشی، دینی افراطی‌لیک، کانلرنینگ تالان-تاراج قیلینیشی، انسانپرورلیک یاردمگه اره‌لشوو و اونی اۉغیرلش همده افغان خلقی‌نینگ جماعه‌وی و شخصی اېرکینلیکلرینی باستیریش موضوعلریگه قره‌تیلگن.
صحبت
سوال بېریش، سوریشتیریش و جواب طلب قیلیش مېدیا مدنیتی نینگ بیر قِسمی بۉلیب، ۸صبح اۉز فعالیتی‌نینگ باشیدن بوگونگچه بونگه صادق قالگن. اوشبو مېدیا بو یۉلده، حتا سورگون دوریده هم، اوشبو یخشی عنعنه‌گه صادق قالیب، تورلی ساحه‌لرده ضیالیلر بیلن صحبتلشدی، تاکه افغانستان مسأله‌لری‌نینگ یشیرین جهتلری و قارانغی همده سوال اویغاتووچی نقطه‌لری آیدینلشسین.
تحلیل
تورلی موضوعلر بۉییچه چوقور، انیق و خالص تحلیللر هم ۸صبح اعتبار قره‌تگن بۉلیملردن بیری دیر. اوشبو مېدیا کېلیب توشگن مقاله‌لر و ایزلاوچیلر محتوالری بیلن بیر قطارده، اۉزی هم هر کونی کمیده بیرته تحلیلی مقاله ترقه‌تیب، افغانستان، منطقه و دنیا مسأله‌لرینی ایزلاوچیلر همده کېله‌جک اوچون تحلیل قیلیشگه حرکت قیلدی.
شونینگدېک، مقاله‌لر، راېورتاژلر و باشقه محتوالرنی انگلیس تیلی کبی باشقه تیللردن ترجمه قیلیش هم ۸صبح‌نینگ اوشبو دورده‌گی فعالیتلریدن بیری بۉلیب، افغانستان خلقی حیاتی و آنگیده مهم رۉل اۉینه‌دی.
عیاللر
عیاللرنی باستیریش و اویگه قه‌مش بیلن کېچگن دورده‌گی اېنگ مهم بۉلیم «عیال بۉلیمی»نینگ تشکیل اېتیلیشی دیر. اوشبو بۉلیم ترکیبیگه «عیال سۉزی»، «اېرته‌گه مکتوب» و «کیچیک تۉلقینلر» کبی یۉنه‌لیشلر کیره‌دی و او تۉلیق عیاللر طلبلری، اولرنینگ آوازی و حکایه‌لریگه بغیشلنگن. بو بۉلیمده هر کونی عیاللر و قیزلردن بیر حکایه چاپ اېتیله‌دی. بوندن تشقری، اوشبو حکایه‌لرنینگ پادکستی هم منتظم روشده ترقه‌تیلیب باریلدی. ینه بیر دستور دایره‌سیده عیاللر و قیزلر اۉز حکایه‌لرینی تاووش و ویدیو شکلیده ۸صبح بیلن شریک قیله‌دیلر و اولر ویدیو گزارش شکلیده ترقه‌تیله‌دی.
۸صبح دایما ژونالیست‌لیک فقط خبر اوزه‌تیش اېمسلیگینی، بلکه جمعیت آلدیده‌گی مسوولیت اېکنینی تأکیدلب کېلگن؛ سوال بېریش، آیدینلشتیریش و اونوتیلمسلیگی کېره‌ک بۉلگن نرسه‌لرنی قید اېتیش مسوولیتی. ۸صبح فعالیتی‌نینگ ییگیرمه‌نچی ییلی مناسبتی بیلن اوشبو مېدیا اۉز بورچ‌گه ینه‌ده قطعی و کوچلی طرزده صادق قاله‌دی.
۸صبح اۉز وقتیده، خالص و مستقل اخبارات یېتکزیش بیلن بیرگه، هر دایم فرقلرنی مملکت‌نینگ کوچی و گۉزه‌للیگی صفتیده کۉریب، کۉپچیلیک و بو فرقلرگه حرمت اوچون قلم تېبره‌تیب کېلگن. بیز اۉز فعالیتیمیزنینگ ییگیرمه‌نچی ییلینی نشانلر اېکنمیز، بویوک وطن نامی آستیده، اوزاقلیک، غربت و سورگونگه قره‌مه‌ی، تیک توریبمیز. اونینگ قیغولری و قووانچلری اوچون نفس آله‌میز و بیزنینگ یگانه آرزومیز افغانستان نامی‌نینگ یوکسه‌لیشی همده بو یورت‌نینگ مدنی و تمدنی رونقی دیر.
