افغانستان طالبان شلاقی آستیده؛ ۸۲۷ کیشی اۉن آی ایچی‌ده جماعت آلدیده قییناققه سالیندی
طالبان جاری ییل نینگ جوزا آییدن ۱۴- جدی‌گه قدر مملکت نینگ ۲۵ ولایتیده جمعی ۸۲۷ کیشینی شلاقلگن. اوشبو شخصلر نکاحدن تشقری جنسی مناسبت، اۉغریلیک، مخدر ماده‌لرنی ساتیب آلیش و ساتیش، اویدن قاچیش همده لواطت کبی عیبلاولر بیلن عامه آلدیده قمچیلنگن. بو دورده ۶۶۳ نفر اېرکک و ۱۶۴ نفر عیال جزالنگن. مذکور معلوماتلر طالبان عالی محکمه‌سی تامانیدن اعلان قیلینگن بیاناتلر همده ۸صبح گزېته‌سی نشر اېتگن گزارشلر اساسیده تیارلنگن. شو بیلن بیرگه، طالبان ۲۰۲۵ ییل آخریده بیر ییل دوامیده تورلی عیبلاولر بیلن جمعی بیر مینگ و ۱۱۸ کیشینی قمچیلگنینی معلوم قیلگن اېدی. بو حالت طالبان نظارتی آستیده‌گی محکمه جریانلری دایمی روشده سوال آستیده قاله‌یاتگن بیر پیتده یوز بېرماقده. اوشبو گروه مملکت باش محکمه‌سینی توگتگن و ایشلر حمایه‌چی مدافعه وکیلی اشتراکیسیز همده عدالتلی محکمه نینگ اساسی میزانلریگه رعایه اېتیلمه‌گن حالده کۉریب چیقیلماقده. نتیجه‌ده عیبلنووچیلر اۉزینی حمایه قیلیش و اۉز نقطه‌ی نظرینی بیلدیریش حقیدن محروم اېتیلگن.
مذکور گزارش خلاصه‌لریگه کۉره، طالبان کابل ولایتیده ۲۲۵ کیشینی شلاقلشگن. شوندن سۉنگ سرپل ولایتی ۶۷ حالت بیلن، غزنی ۴۴ حالت بیلن، کاپیسا و خوست ولایتلری هر بیری ۳۸ حالتدن، بلخ ۳۴ حالت بیلن و پروان ۲۹ حالت بیلن کېینگی ا‌ۉرینلرده قید اېتیلگن.
شونینگدېک، تخار ولایتیده ۲۷ حالت، فاریاب‌ده ۲۴ حالت، ارزگان‌ده ۲۲ حالت، لغمانده ۲۰ حالت، ننگرهارده ۱۹ حالت، کنر و هلمند ولایتلریده هر بیری ۱۷ حالتدن، پکتیاده ۱۵ حالت، زابل‌ده ۱۴ حالت، بغلان‌ده ۱۳ حالت، غورده ۱۲ حالت، لوگرده ۱۰ حالت، بامیان‌ده ۸ حالت، میدان وردک و سمنگان‌ده هر بیری ۶ حالتدن، بده‌خشان‌ده ۴ حالت، فراه‌ده ۳ حالت و دایکندیده بیر حالت شلاقلش قید اېتیلگن.
گزارشده قید اېتیلیشیچه، اقرارلر باسیم آستیده آلینگن و عیبلنووچیلر وکیل گه مراجعت قیلیش همده عدالتلی محکمه جریانیدن فایده‌لنیش حقوقیدن محروم بۉلگن. شونینگدېک، طالبان شفاف محکمه تیزیمینی یره‌تیش اۉرنیگه جسمانی جزالر و عامه آلدیده کوچ نمایشیگه ته‌ینماقده. بو یاندشوو نه‌فقط انسان حقوقلری تمایللریگه ضد، بلکه جبرلنووچیلر و افغانستان جمعیتی اوچون چوقور اجتماعی و روحی عاقبتلرنی کېلتیریب چیقرماقده.
شو بیلن بیرگه، طالبان۲۰۲۵ ییل آخریده اعلان قیلگن بیاناتیده، هبت‌الله نینگ بویروغیگه اساسا فراه، نیمروز، بادغیس و خوست ولایتلریده آلتی کیشینی عامه آلدیده قتل اېتگنینی معلوم قیلگن. شونینگدېک، ینه بیر مینگ و ۱۱۸ کیشی تورلی عیبلاولر بیلن میدانلر و استدیدوم لرده قمچیلنگن. طالبان ۲۰۲۱- ییلده افغانستانده حاکمیتنی قیته قۉلگه کیریتگنیدن بویان حاضرگچه ۱۲ کیشینی عامه آلدیده آتیب اۉلدیرگن. اوشبو قتل اېتیشلر «آتیب قتل اېتیش» نامی آستیده عملگه آشیریلگن.
بریتانیا نینگ «دیلی‌میل» نشری هم قتل اېتیشلر، تاش‌بۉران قیلیشلر و طالبان تامانیدن عیبدار دېب تاپیلگن شخصلرگه نسبتاً قۉللنیله‌یاتگن جسمانی جزالر حقیده اعلان قیلگن گزارشیده، اوشبو گروه هېچ قنده‌ی جنایت صادر اېتمه‌گن بۉلیشی ممکن بۉلگن شخصلرنی هم آغیر جزالرگه دچار قیلگنینی قید اېتگن. گزارشگه کۉره، طالبان سۉنگگی ییگیرمه ییلدن آرتیق وقت دوامیده افغانستانده ترقیاتگه، خصوصاً عیاللر حقوقلری نینگ تأمینلنیشیگه خدمت قیلگن برچه لیبرال قدریتلرنی بېکار قیلگن و عیاللر همده اېرککلر اوچون آغیر جزالر جاری اېتگن.
باشقه تاماندن، بیرلشگن ملتلر تشکیلاتی نینگ انسان حقلری بۉییچه متخصصلری قۉشمه بیانات بیلن چیقیب، طالباندن زودلیک بیلن برچه «انسانیلیککه ضد» جزالرنی، جمله‌دن عاموی قتل اېتیشلر و جسمانی جزالرنی توخته‌تیشنی طلب قیلگن. بیرلشگن ملتلر تشکیلاتی متخصصلری اوشبو قتل اېتیشلرنی خلق‌ارا قانونلر نینگ آچیقدن-آچیق بوزیلیشی و «انسان قدر-قیمتیگه تجاوز» صفتیده بهالب، کېسکین قاره‌له‌گن. اولر نینگ بیاناتیده شونده‌ی دېییله‌دی: «قتل اېتیشلرنی عاموی تماشا‌گه ایلنتیریش هېچ قچان آقلب بۉلمه‌یدی، حتا دینی سببلر بیلن هم. بو زۉرآورلیکنی عادیلشتیره‌دی، جمعیتنی زۉرآورلیککه نسبتاً بې‌فرق قیله‌دی و قۉرقوو همده دهشت محیطینی یره‌ته‌دی.»
بیرلشگن ملتلر تشکیلاتی نینگ افغانستاندهگی یاردم دفتری (یوناما) اۉزی نینگ تورتلیک گزارلریده طالبان تامانیدن عامه آلدیده قمچیلش و جسمانی جزالر قۉللنیلیشینی خلق‌ارا انسانسیورلیک حقوق نینگ بوزیلیشی دېب بهاله‌گن و طالباندن بونده‌ی جزالرنی توخته‌تیشنی طلب قیلگن.
شونینگدېک، بیرلشگن ملتلر تشکیلاتی نینگ مخصوص گزارشگری ریچارد بنت عاموی قتل اېتیشلرگه مناسبت بیلدیریب، بو عمللرنی انسان حقلری معیاریلریگه ضد دېب اته‌گن و دارگه تارتیش جزاسی قۉللنیلیشیگه برهم بېریشگه چقیرگن. او اوشبو جریان نینگ دوام اېتیشینی «نهایتده تشویشلی» دېب بهاله‌گن، اینیقسه بو حکملر اونینگ تأکیدلشیچه «نه مستقل و نه عدالتلی محکمه کفالتلریگه اېگه» بۉلگن محکمه تیزیمی دایره‌سیده چیقریله‌یاتگن بیر شرایطده. بنت نینگ ایتیشیچه، بونده‌ی جریانلر جمعیتده عدالتسیزلیک، سیاسی تضییق و قۉرقوونی کوچه‌یتیره‌دی. او دله محکمه‌لری و تېزکار حکملرنی درحال توخته‌تیشگه، شونینگدېک انسان حقلری و خلق‌ارا قانونلرگه تۉلیق حرمت کۉرستیشگه چقیرگن.
خلق ارا کیچیریم تشکیلاتی ۲۰۲۵ ییلده‌گی بیاناتلریده «عدالتسیزلیک»، حقوقی اساسلر و عدالتلی محکمه میکانیسملری نینگ یۉقلیگینی تنقید قیلیب، افغانستانده انسان حقلرینی بوزووچی محکمه عملیاتلرینی توخته‌تیش اوچون دیپلماتیک باسیملرنی کوچه‌یتیریشگه چقیرگن.
انسان حقلری کوزه‌توچیسی هم افغانستاندهگی انسان حقلری حالتی بۉییچه اعلان قیلگن بیر قطار گزارشلریده چوقور خواطر بیلدیرگن. اوشبو تشکیلاتگه کۉره، جزالر کۉپینچه عدالتلی محکمه جریانلریسیز و حمایه‌چی وکیل گه مراجعت قیلیش امکانیتیسیز عملگه آشیریلماقده. تشکیلات تأکیدلشیچه، بو شفقتسیز جزالر خلق‌ارا حقوق معیارلریگه کۉره قطعی تعقیقلنگن.
شو بیلن بیرگه، طالبان نینگ امر بالمعروف و نهی عن المنکر محتسبلری، اوشبو گروه محکمه لریدن تشقری، اۉزلری عیبدار دېب حسابله‌گن عیاللر و اېرککلرنی عامه آلدیده حقارت قیلگن و ایریم حاللرده قمچیله‌گن. کېنگ کۉلملی سانسور و باسیم سببلی بو حالتلر عاموی اخبارات واسطه‌لریدن یشیریلگن و طالبان نینگ اۉزی هم بو باره‌ده تفصیلاتلرنی اعلان قیلمگن.
آلدینراق حقوق‌شناسلر طالبان باش قاضی‌سینی توگه‌تیش آرقه‌لی عدلیه و محکمه تیزیمی نینگ مهم بۉغینینی یۉق قیلگنینی بیلدیرگن اېدی. اولر نینگ ایتیشیچه، باش محکمه جمعیت نامیدن ایش یوریته‌دی و جنایتلرگه قرشی جمعیت حقلرینی حمایه قیلیش همده محکمه ده دعوا قۉزغه‌تیش وظیفه‌سینی بجره‌دی. قاضی نینگ توگه‌تیلیشی محکمه جریانی نینگ بیر تمانلمه بۉلیشیگه و عدالت تأمینلنمسلیگیگه آلیب کېله‌دی.
طالبان مملکت اوستیدن نظارتنی قۉلگه کیریتگچ، ۱۴۰۰ هجری-شمسی ییل ۲- قوس کونی افغانستان مستقل مدافع وکیللری اویوشمه‌سی دفترینی یاپگن. اوشبو اویوشمه یاپیلیشی بیلن عیال حمایه‌چی وکیللر نینگ فعالیت یوریتیش حقی هم بېکار قیلینگن.
