افغانستانده آچلیک معماسی؛ ۱۷ میلیوندن آرتیق کیشی آزیق-آوقت خوفسیزلیگی معماسیگه دوچ کېلماقده
۸صبح، کابل: انسان حقلرینی کوزه‌تووچی تشکیلاتی‌نینگ افغانستان بۉییچه تدقیقاتچیسی فرشته عباسی، اقتصادی بحران و انسانپرورلیک یاردملری کمه‌یگنی میلیونلب افغانستان وطنداشلرینی آچرچیلیک خوفی بیلن یوزمه-یوز قیلگنینی اَیتدی.
عباسی جمعه کېچه‌سی، ۲۶ سرطان، اعلان قیلینگن حساباتیده کۉپلب افغان عایله‌لری یېترلی آزیق-آوقت تیّارلش یاکه ساتیب آلیش امکانیگه اېگه اېمسلیگینی تأکیدله‌دی.
اونینگ قۉشیمچه قیلیشیچه، بیرلشگن ملتلر تشکیلاتی معلوماتیگه کۉره، جاری ییلده افغانستانده ۱۷ میلیوندن آرتیق کیشی آغیر آزیق-آوقت خوفسیزلیگی معماسیگه دوچ کېله‌دی. بو حالت اینیقسه عیاللر و باله‌لرنی ینه‌ده ضعیف احوالگه ساله‌دی.
عباسی‌نینگ اَیتیشیچه، امریکا قۉشمه ایالتلری، بریتانیا و باشقه دونر دولتلر تامانیدن تشقی یاردملر‌نینگ قیسقرتیریلیشی انسانپرورلیک تشکیلاتلرینی اۉز دستورلرینی کمه‌یتیریشگه همده یاردمنی فقط اېنگ کۉپ احتیاجمند آدملرگه یۉنه‌لتیریشگه مجبور قیلگن.
حساباتده قید اېتیلیشیچه، افغانستانده قریب ۲۲ میلیون کیشی شاشیلینچ آزیق-آوقت یاردمی و ساغلیقنی سقلش خدمتلریگه محتاج.
شونینگدېک، ایران و پاکستاندن میلیونلب افغان مهاجرلری‌نینگ مجبوری قَیتریلیشی اوّلدن قورغاقچیلیک و ایش ا‌ۉرینلری یېتیشمسلیگی بیلن کوره‌شه‌یاتگن محلی جماعه‌لرگه ینه‌ده کتّه باسیم یوکله‌گن.
فرشته عباسی طالبان‌نینگ یاردم تشکیلاتلریده عیاللر ایشلشیگه قۉیگن چېکلاولرینی هم یاردم یېتکزیش جریانینی آغیرلشتیره‌یاتگن عامللردن بیری صفتیده تیلگه آلیب، بو چېکلاولر اَیریم عایله‌لر‌نینگ انسانپرورلیک یاردملریدن فایده‌لنیش امکانیتینی کمه‌یتیرگنینی اَیتدی.
عینی پیتده، یاردم تشکیلاتلری زودلیک بیلن بودجه تأمینلنمسه، میلیونلب افغانستان وطنداشلری حیاتی اهمیتگه اېگه یاردملرنی آلیش امکانیدن محروم بۉلیشی ممکنلیگی حقیده آگاهلنتیردی.
عباسی یاردم بیرووچی دولتلرنی افغانستاندهگی انسانپرورلیک عملیاتلرینی مالیه‌لشتیریش اوچون ضرور مبلغنی تأمینلشگه چقیردی. شونینگدېک، افغانستان مهاجرلری‌نینگ قَیتیش جریانی اختیاری، خوفسیز و ضرور قۉللب-قوّتلشلر بیلن بیرگه عملگه آشیریلیشی لازملیگینی تأکیدله‌دی.
