سوریه نینگ حلب ده پارتلش؛ ۱۰ کیشی هلاک بولیب و کمیده ۳۰ کیشی یره‌لندی
بریتانیا ده جایلشگن سوریه انسان حقلرینی کوزه‌تووچی تشکیلات گه کوره، حلب ولایتی شمالی حدودلری «اعزاز» شهری بازاری ده موترسایکل ده ییرلشتیریلگن ماین پارتلشی عاقبتیده سکیز کیشی هلاک بولیب و کمیده ۲۳ کیشی یره‌لنگن.
بو پارتلش ۳۰ مارچ، شنبه کیچه گوجوم بازار ده یوز بیرگن.
شو بیلن بیرگه، المیادین آژانسی اوشبو پارتلش ده ۱۰ کیشی هلاک بولیب و ۳۰ کیشی یره‌لنگنینی بیلدیرگن.
مذکور واقعه مسوولیتینی حاضرگچه هېچ کیم تن آلمه‌گن.
سوریه انسان حقلرینی کوزه‌تووچی تشکیلات نینگ معلوماتی اساسیده، بو پارتلش جانی تلفات گه قوشیمچه، واقعه محلی ده کېنگ کولمده یانغین صادر بولیب و اهالی گه آغیر مالی زیان یېتکیزگن.
اوشبو شهر تورکیه گه طرفدار کوچلر تامانیدن نظارت اېتیلماقده.
معلومات‌لر اساسیده، سوریه نینگ قریب تورت مینگ کیلومتر توپراغی جمله دن عفرین و الباب، اعزاز و جرابلس شهرلری تورک و اولر گه طرفدار کوچلر تامانیدن نظارت اېتیله‌دی.
ایتیش کېره‌ک که ۲۰۱۱ ییلدن سۉنگ دولت تامانیدن مسالمت‌آمیز ناراضی‌لیک سرکوب اېتیلگچ ناتینچ‌لیکلر باشلنیب و اوندن کیېن اېسه اوشبو مملکت حربی کوچلری و مخالف گروه‌لری آره‌سیده کوچلی اۉروش گه اېلنگن.
بو اۉروش عاقبتیده حاضرگچه قریب ۶۰۰ مینگ کیشی قربان بولیب و سوریه‌لیک میلیون‌لب فقرا بدرغه بولگنلر.
عین‌حالده ایکّی کون آلدین سوریه نینگ جلب شهری ده اسراییل هوا کوچلری نینگ هجوم‌لری عاقبتیده کمیده ۳۳ حربی و تینچ اهالی هلاک بولگن اېدیلر.
