استرالیا نینگ مثل‌سیز حرکتی؛ عیاللرگه باستیریب کیریش‌گه جوابا طالباننی تاریخی چېکلاوگه اوچره‌تدی
نیما
استرالیا تشقی ایشلر وزیرلیگی تاریخی چاره‌نی اعلان قیلیب، وزیرلیک عیاللر و قیزلرگه قرشی ظلم سببلی طالباننی جوابگرلیککه تارتیش مقصدیده اوشبو گروه نظارتیده‌گی کمیده ۱۴۰ شخص و تشکیلاتگه مستقل چېکلاو تیزیمی یره‌تگنینی بیلدیردی. بو تیزیم طالبان حکمرانلیگی دوری، یعنی ۲۰۲۱- ییل اگست‌دن حاضرگی کونگچه بۉلگن دورنی قمره‌ب آله‌دی. استرالیا تشقی ایشلر وزیرلیگی چېکلاولرنی بیرلشگن ملتلر تشکیلاتی خوفسیزلیک کېنگشی نینگ چېکلاولرینی ایچکی چېکلاو قانونلریگه کیریتیش آرقه‌لی عملگه آشیره‌یاتگنینی معلوم قیلگن.
اوشبو تیزیم دایره‌سیده طالبان بیلن باغلیق شخص و تشکیلاتلرگه قورال یېتکزیش، خدمتلر، تعلیم و مصلحت بېریش همده تجارت فعالیتی بۉییچه چېکلاولر جاری قیلینگن، شونینگدېک چېکلاو قیلینگن شخصلر اوچون سفر تعقیقلری بېلگیلنگن. استرالیا تشقی ایشلر وزیرلیگی بیلدیریشیچه: «بیز مالیوی چېکلاولر و سفر تعقیقینی طالبان نینگ، شونده‌ی دېییله‌دیگن، وزیرلری و اوشبو گروه عالی محکمه‌سی نینگ رهبری صفتیده تنیلگن بیر نېچه شخصلریگه جاری قیلگنمیز. اوشبو چاره-تدبیرلر عیاللرگه و قیزلرگه قرشی ظلمده و ساغلام باشقروو همده قانون اوستوارلیگینی ضعیفلشتیریشده اولر نینگ رۉلیگه اساسلنگن.»
شونینگدېک، اوشبو تیزیم استرالیا تشقی ایشلر وزیریگه افغانستانگه نسبتاً انسانپرورلیک ساحه‌سیده مخصوص رخصت‌نامه بېریش امکانیتینی یره‌تگن. بو رخصت‌نامه عادی شرایطده چېکلنگن بۉلیشی ممکن بۉلگن ایریم انسانپرورلیک فعالیتلرینی عملگه آشیریش امکانینی بېره‌دی.
استرالیا تشقی ایشلر وزیرلیگی بیلدیریشیچه، اوشبو چاره‌لر طالبان نینگ عیاللرگه و قیزلرگه قرشی ظلمی، آزچیلیک گروهلرنی تعقیب قیلیشی، افغانستان اهالیسی اوستیدن باسیم اۉتکزیشی همده یخشی باشقروو و قانون اوستوارلیگینی ضعیفلشتیریشی سببلی تۉرتته طالبان رسمییگه قره‌تیلگن. اوشبو رۉیخطگه، امر بالمعروف و نهی عن المنکر وزیری، محمد خالد حنفی، عالی اۉقوو وزیری، ندا محمد ندیم، عدلیه وزیری، عبدالحکیم شرعی و عالی محکمه رییسی، عبدالحکیم حقانی کیریتیلگن.
استرالیا تشقی ایشلر وزیرلیگی قۉشیمچه قیلگنیچه: طالبلر حکمرانلیگی آستیده کابل قوله‌گنیدن بېری، اوشبو مملکت عیاللر و قیزلرگه اعتبار قره‌تگن حالده افغانستانگه ۲۶۰ میلیون دالردن آرتیق انسانپرورلیک یاردمینی تقدیم قیلگن. ۲۰۲۶ مالیوی ییل اوچون ینه ۵۰ میلیون دالر اجره‌تیلگن.
طالبان مطبوعات کاتبی، ذبیح‌الله مجاهد، استرالیا نینگ ۱۴۰ نفر طالبان بیلن باغلیق شخص و تشکیلاتگه چېکلاو جاری قیلگن چاره‌لرینی «اساس‌سیز و عدالت‌سیز» دېب اته‌دی. او بیلدیریشیچه، طالبان استرالیا بیلن هېچ قنده‌ی سودا یاکه علاقه‌گه اېگه اېمس و بونده‌ی علاقه‌گه احتیاج سېزمه‌یدی. مجاهد دعوا قیلیشیچه: دولتلر «ناتۉغری معلوماتلر» و «ثمره‌سیز موضع‌لرگه» ته‌یه‌نیش اۉرنیگه، حقیقتنی انگلب، اوشبو گروه بیلن ملاقات یۉلینی تنلشلری لازم دیر.
شو بیلن بیرگه، طالبان نینگ امر بالمعروف وزیرلیگی مطبوعات کاتبی، سیف‌الاسلام خیبر، حنفی چېکلاوسینی «ینگیلیک و عجبلنرلی اېمس» دېب اته‌دی و دعوا قیلیشیچه: استرالیا کبی دولتلر نه عیاللر نینگ حقوقلریگه، نه انسان حقوقلریگه اعتبار بېره‌دی.
طالبان نینگ تۉرتته یوقاری درجه‌ده‌گی رسمیسی و اولر نینگ نقشی نیمه؟
خالد حنفی
طالبان نینگ امر بالمعروف و نهی عن المنکر وزیری، خالد حنفی، اوشبو گروه رهبری هبت‌الله آخندزاده طرفداری صفتیده تنیلگن. طالبان نینگ امر بالمعروف و نهی عن المنکر وزیرلیگی سایتیده معلوم قیلینیشیچه، ملک قوماندان حبیب‌الله نینگ اۉغلی،محمد خالد حنفی، ۱۳۵۰ هجریده نورستان ولایتی دو‘آبه تومنی نینگ کولمم شهید قیشلاغیده جهادچی عایله‌ده دنیاگه کېلگن. او دینی تعلیمینی پاکستان نینگ خیبر پختونخوا ایالتی‌ده‌گی «مارتونگ» و «چکیسر» حدودلریده، شونینگدېک پشاورورده‌گی «جامعه امدادالعلوم» ده آلگن.
خالد حنفی طالبان نینگ عیاللرگه قرشی قطعی چېکلاولرینی ایشلب چیققن اساسی شخصلردن بیریدیر. او گروه نینگ «امر بالمعروف و نهی عن المنکر» قانونی لایحه‌سینی تیارله‌گن؛ بو قانون اساسیده عیال نینگ آوازی «عورت» دېب حسابلنه‌دی و عیال آوازیده نعت اۉقیش یاکه قرآن تلاوتی تعقیقلنگن. مجبوری حجاب، مدنی مراسملرنی تعقیقلش، مسجدلرده اشتراکنی نظارت قیلیش، تیریک موجوداتلر تصویرینی اعلان قیلیشنی منع اېتیش، عیاللر نینگ محرم سیز تشقریگه چیقیشینی تعقیقلش، سپورت زللری و حماملرنی عیاللر اوچون یاپیش کبی چېکلاولر اونینگ فعال اشتراکی بیلن عملگه آشیریلگن.
ندا محمد ندیم
طالبان نینگ عالی اوقوو وزیری، ندا محمد ندیم، هبت‌الله آخوندزاده نینگ یقین نماینده‌سی صفتیده تنیلگن. او قندهار شهریده توغیلگن و طالبان عالی تعلیم وزیرلیگی سایتیگه کۉره، دینی مکتبده تحصیل آلگن. ندیم طالبانگه قرشی بۉلگنلرنی «اۉلدیریلیشی لازم» دېب اته‌گن و گروه اعضالری نینگ علمی درجه‌سینی اولر تامانیدن اۉرنه‌تیلگن ماین پورتله‌تیش ایشلری بیلن بهالشنی تکلیف قیلگن. او عیاللر نینگ تعلیم آلیشینی تعقیقلشده مهم رۉل اۉینه‌گن، جفعری فقهنی بیلیم یورتلرده اۉقیتیشنی منع قیلگن و کۉپلب فنلر و کتابلرنی اۉقوو دستوریدن چیقریشنی بویورگن.
عبدالحکیم شرعی
عبدالحکیم شرعی، طالبان نینگ عدلیه وزیری، ۱۳۴۰ هجریده خوست ولایتی لکن قبیله‌سیگه قره‌شلی ایوب‌خیل قیشلاغیده توغیلگن. او دینی تعلیمینی پاکستانده‌گی دارالعلوم حقانی و پشاور ده‌گی اکوره حقانیه مدرسه ده آلگن. عبدالحکیم شرعی طالبان حکمرانلیگیده حزب لرنی «ا‌ۉرین یۉق» دېب اته‌گن و حزب نامینی ایتیشنی هم جنایت صفتیده بهاله‌گن. شونینگدېک، او کابلده‌گی دارالامان حدودیده شخصی ملکلرنی تارتیب آلیشده عیبلنگن.
عبدالحکیم حقانی
ملا محمد عمر و ملا اختر منصور یقین همراهی و طالبان اساسچیلریدن بیری، عبدالحکیم حقانی، طالبان رېژیمی نینگ عالی محکمه رئیسی حسابلنه‌دی. او ۱۳۳۶ هجریده قندهار ولایتی پنجوایی تومنیده توغیلگن. بیرینچی طالبان دوریده هم عالی محکمه رئیسی بۉلگن و پاکستانده‌گی حقانیه مدرسه سیده درس بېرگن. اوّلراق، خلق‌ارا جنایی محکمه اونی انسانیتگه قرشی جنایتلر و کېنگ قمراولی جنسی تبعیض بیلن باغلیق عیبلر بۉییچه حبسگه آلیشگه بویروق بېرگن.
خلق‌ارا جنایی محکمه ایلگری طالبان رهبری هبت‌الله آخوندزاده، اوچون هم «انسانیتگه قرشی جنایت» عیبلاوینی چیقریب، حبسگه آلیش بویروقینی بېرگن. محکمه بیان قیلگن: یېترلی دلیللر موجود بۉلیب، اوشبو ایکی یوقاری درجه‌ده‌گی طالبان رسمیسی عیاللر و قیزلرگه قرشی جنسی تعقیب و ظلم طفیلی انسانیتگه قرشی جنایتلرده رسمی عیبلنه‌دی و شو نینگ اوچون حبسگه آلیش بویروقلری چیقریلگن.
استرالیا اوشبو چاره‌نی عملگه آشیره‌یاتگن پیتده، ایلگری اوشبو مملکت تشقی ایشلر وزیری هالند، کانادا و آلمان وزیرلری بیلن بیرگه ۲۰۲۴ ییلده بیرلشگن ملتلر تشکیلاتی باش مجمع‌سیده طالباننی خلق‌ارا جنایی محکمه تارتیش نیتینی اعلان قیلگن. اولر طالباننی افغانستانده بیرلشگن ملتلر تشکیلاتی عیاللر نینگ حقوقلری حقیده‌گی شرطنامه‌نی «جدی و تیزیملی بوزگن»لیگی سببلی محکمه گه بېریشنی رېجه‌لشتیرگن. شکایتنی رۉیخطدن اۉتکزیش بیلن طالبانگه رسمی اېشیتوو مجلسی آلدیدن اۉز جوابینی بېریش اوچون آلتی آی وقت بېریلگن.
آلمان، استرالیا، هالند و کانادا طالبانگه قرشی شکایتنی رۉیخطدن اۉتکزگنیدن سۉنگ، ۲۰دن آرتیق دولتلر هم اوشبو حرکتنی قۉللب-قوتله‌گن. اوشبو دولتلر بیانات بېریب، طالبان حکمرانلیگیده‌گی افغانستان نینگ خلق‌ارا حقوققه بناءً عیاللرگه قرشی تیزیملی و دایمی مجبوریت بوزیلیشلری اوچون جوابگر اېکنینی تأکیدله‌گن.
