مملکت شمالی تۉرت ولایتی نینگ یشاوچیلری هراتده زلزله‌دن زیان کۉرگنلرگه۲۶ میلیون افغانی یاردم بېردیلر
۸صبح، سمنگان: فاریاب، سمنگان، سرپل و جوزجان ولایتلری نینگ یشاوچیلری هراتده یېر قیمیرلشی عاقبتیده زیان کۉرگنلرگه ۲۶میلیون ۳۷۰مینگ افغانی ییغیب یاردم قیلدیلر.
فاریاب ولایتیده طالبلر اداره‌سی آستیده‌گی مردمی کمکلرنی تۉپله‌گن کمیته نینگ مسووللری ۴-عقرب پنج‌شنبه کونی هنوزگچه هرات ولایتیده زلزله‌دن جبرکۉرگنلرگه یاردم کۉرسه‌تیش مقصدیده ۱۳ میلیون ۲۰۰مینگ افغانی اوشبو ولایتده ییغیلگن دېب ایته‌دیلر.
عین حالده، سمنگان ولایتی نینگ محلی مسووللری هرات ولایتیده زلزله‌دن زیان کۉرگنلرگه کمک ییغیش کمپاینیده آیبک شهری داخل بو ولایت نینگ اولسواللیکلریده اوچ میلیون ۹۰۰مینگ افغانی مبلغ جمعلگندن سۉنگ هرات ولایتیده طالبلر محلی مسووللریگه تاپشیریلگن دېدیلر.
باشقه تاماندن، سرپل ولایتی طبیعی حادثه‌لرگه قرشی کوره‌ش اداره نینگ باشلیغی سید صفت الله صفوان، هرات زلزله‌سی اوچون بو ولایت اهالیسی آرقلی ییغیلگن تۉرت میلیون ۷۰۰مینگ افغانی هرات ولایتیگه یوباریلگن دېب ایتدی.
بوندن تشقری، جوزجان ولایتیده مردمی کمکلرنی ییغیش کمیته نینگ مسووللریگه کۉره، بو ولایت نینگ هم یشاوچیلری تۉرت میلیون ۵۷۰مینگ افغانی تۉپلب هراتده یوز بېرگن زلزله‌ده زیان کۉرگن عایله‌لرگه یاردم قیلگنلر.
اولرنینگ ایتیشیچه، اوشبو یاردملر بیر هیات آرقلی هرات محلی مسووللریگه تاپشیریلگن.
هرات ولایتیده یوز بېرگن اۉلیملی یېر قیمیرلشدن کېین دنیا جماعه‌چیلیگی شامل ایریم ولایتلرنینگ یشاوچیلری میلیونلب افغانینی هراتده زیان کۉرگنلرگه یاردم قیلدیلر.
سۉنگی کونلرده هراتده روی بېرگن یېر قیمیرلشده کته قسمی خاتینلر و باله‌لر بۉلگن چمه‌سی اوچ مینگ انسان هلاک بۉلدیلر.
