درانی: طالبان تی‌تی‌پی‌گه قرشی چاره کۉریشدن باش تارتیب، پاکستان بیلن مناسبتلرنی ضعیفلشتیردی
۸صبح، کابل: پاکستان‌نینگ افغانستان بۉییچه سابق مخصوص وکیلی آصف درانی‌نینگ اَیتیشیچه، طالبان‌نینگ «پاکستان طالبان حرکتی (تی‌تی‌پی) پاکستان‌نینگ معماسی» دېگن فکرده قطعی توریشی، بو گروه تی‌تی‌پی‌گه قرشی هېچ قنده‌ی چاره کۉریشنی ایسته‌مه‌یاتگنینی کۉرسه‌ته‌دی.
درانی جمعه کونی، ۹ اسد، ایکس صحیفه‌سیده یازیشیچه، طالبان‌نینگ بو سیاستی اوشبو گروه افغانستانده ینه حاکمیتنی اېگه‌لله‌گنیدن بویان دوام اېتماقده و پاکستان بیلن طالبان اۉرته‌سیده برقرار مناسبتلر اۉرنه‌تیش استقبالینی جدّی روشده ضعیفلشتیرگن.
اونینگ قۉشیمچه قیلیشیچه، شو سببلی تورکیه، قطر، سعودی عربستانی و چین‌نینگ طالبان همده اسلام‌آباد اۉرته‌سیده‌گی کېسکینلیکنی کمه‌یتیریشگه قره‌تیلگن واسطه‌چیلیک سعی-حرکتلری هم حاضرگچه هېچ قنده‌ی نتیجه بېرمه‌گن.
پاکستان‌نینگ افغانستان بۉییچه سابق مخصوص وکیلی ینه شونی تأکیدله‌گن که طالبان‌نینگ خطتی-حرکتلری اولر اسلام‌آباد‌نینگ قانونی خوفسیزلیک تشویشلرینی برطرف اېتیشدن کۉره، تی‌تی‌پی بیلن علاقه‌لرنی سقلب قالیشنی اوستون قۉیه‌یاتگنینی کۉرسه‌تماقده.
درانی‌نینگ اَیتیشیچه، بو یانده‌شوو طالبان‌نینگ اۉزی هم ایچکی معمالر، جمله‌دن بدخشان ولایتیده‌گی تاباره کوچه‌ییب باره‌یاتگن بې‌قرارلیک بیلن یوزلشه‌یاتگن بیر پیتده ینه‌ده تشویشلی دیر.
او آگاهلنتیریشیچه، پاکستان‌نینگ خوفسیزلیککه عاید تشویشلرینی اعتبارسیز قالدیریش همده ایچکی باسیملر‌نینگ آرتیب باریشی پاکستان و طالبان اۉرته‌سیده‌گی ایکّی تامانله‌مه مناسبتلرده، شونینگدېک، بوتون منطقه‌ده ینه‌ده کوچلی بې‌قرارلیککه آلیب کېلیشی ممکن.
