افغانستانده تعلیم انقراضی؛ خوست مکتبلری ساینس و تیل اۉقیتووچیلری یېتیشماوچیلیگی بیلن یوزمه-یوز
۸صبح، خوست: محلی منبعلرنینگ ایتیشیچه، خوست ولایتیده، اینیقسه ساینس و تیللر بۉییچه ملَکه‌لی اۉقیتووچیلر یېتیشمسلیگی سببلی مکتبلرده‌گی تعلیم جریانی جدّی معمالرگه دوچ کېلگن و درس صفتی پسه‌یگن.
منبعلر سه‌شنبه کونی، ۲۹ ثور، ۸صبح گزېته‌سیگه بېرگن صحبتلریده خوست مرکزی و اولسواللیکلریده‌گی اَیریم مکتبلرده صنفلر اۉقیتووچی یېتیشماوچیلیگی بیلن یوزلشه‌یاتگنینی ایتگن.
منبعلر تأکیدلشیچه، اَیریم حاللرده بۉش درس ساعتلرینی تۉلدیریش اوچون اۉقووچیلر مجبوری روشده اۉقیتیش جریانیگه جلب قیلینماقده.
اولرنینگ سۉزلریگه کۉره، بعضی مکتبلرده یوقاری صنف اۉقووچیلری قویی صنفلرگه کیریب، اَیریم درس ساعتلرینی اۉتیشگه مجبور قیلینماقده؛ بو اېسه آته-آنه‌لرده خواطر اویغاتگن.
منبعلر ینه شونی ایتیشه‌دی که ملَکه‌لی اۉقیتووچیلر یۉقلیگی سببلی اَیریم حاللرده طالبان تامانیدن دینی فنلرنی اۉقیتیش اوچون تعیینلنگن مدرسه بیتیرووچیلری باشقه فنلرنی هم اۉقیتیشگه جلب قیلینماقده.
منبعلرگه کۉره، اَیریم صنفلرده ریاضی، ساینس و تیللر کبی اساسی فنلر تۉغری اۉقیتیلمه‌یپتی و درس وقتی نینگ کتّه قِسمی انیق رېجه‌سیز اۉتماقده.
بو حالت آته-آنهلرنینگ خواطریگه سبب بۉلگن و اولر بو جریان دوام اېتسه، فرزندلری نینگ تعلیم کېله‌جگی جدّی خوف آستیده قالیشینی اَیتماقده.
بوندن آلدین هم منبعلر طالبان قَیته حاکمیتگه کېلگنیدن سۉنگ مملکتده زمانه‌وی تعلیم تیزیمی تیزیملی روشده یېمیریله‌یاتگنی و طالبان نینگ اساسی اعتباری دینی تعلیمگه قره‌تیلگنی سببلی اۉقووچیلر مکتبگه باریشدن ساویب قاله‌یاتگنینی بیلدیرگن اېدی.
