هانا: افغان مهاجرلری قیتیشی بیلن حقوقلری بوزیلیشی خوفیگه دوچ کېلماقده
۸صبح، کابل: هانا انسان حقوقلری تشکیلاتی ایران‌ده حجتسیز مهاجرلرنی چیقریب یوباریش رېجه‌سی دوام اېته‌یاتگنیگه اشاره قیلیب، افغان مهاجرلری افغانستانگه قَیتگنیدن سۉنگ، اینیقسه عیاللر و باله‌لر‌نینگ حبسگه آلینیشی و انسان حقوقلری بوزیلیشی خوفی باره‌سیده خواطر بیلدیرگن.
اوشبو تشکیلات دوشنبه کونی، ۱۹-اسد، اعلان قیلگن حساباتیده اَیتیلیشیچه، اوشبو رېجه‌نی عملگه آشیریش باله‌لرنی عایله‌دن اجره‌لیش، اۉقیشنی تشلب کېتیش، شخصینی تصدیقلاوچی حجتلرسیز قالیش، استثمار و خوفسیز بۉلمه‌گن محیطگه قَیتیش کبی خوفلرگه دچار قیلیشی ممکن.
هانا شونینگدېک، افغان عیاللری و قیزلری خوفسیزلیک و جنسی شرایطلری، اجتماعی یاکه سیاسی فعالیت تاریخی همده قۉللب-قوّتلش ترماغی‌نینگ یۉقلیگینی حسابگه آلگن حالده، قَیتگنیدن سۉنگ اساسی حقوقلری بوزیلیشی خوفیگه دوچ کېلیشی ممکنلیگیدن آگاهلنتیرگن.
اوشبو تشکیلات قۉشیمچه قیلیشیچه، شخصگه شونچه‌که «حجتسیز وطنداش» دېگن مقام بېریلیشی هر بیر شخص‌نینگ حالتی و اونینگ حمایه‌گه بۉلگن احتیاجینی بهالش‌نینگ اۉرنینی باسه آلمه‌یدی.
هانا تأکیدله‌شیچه، ثمره‌لی حقوقی و حمایه کفالتلریسیز دېپورت‌لرنی دوام اېتتیریش افغان مهاجرلری و باش‌پناه ایزلاوچیلری‌نینگ، اینیقسه عیاللر و ۱۸ یاشگچه بۉلگن باله‌لر‌نینگ حقوقلری بوزیلیشی کوچه‌ییشی خوفینی جدّی روشده آشیره‌دی.
بو حالتگه قره‌مه‌ی، اېران ایچکی ایشلر وزیرلیگی اۉتگن کون ۱۴۰۴-ییل باشیدن بویان تخمیناً ایکّی میلیون حجتسیز یاکه یشه‌ش اوچون رخصت‌نامه‌گه اېگه بۉلمه‌گن افغان مهاجرینی مملکتدن چیقریب یوبارگنینی و بو جریان هنوز دوام اېته‌یاتگنینی معلوم قیلدی.
