انسان حقوقلری فعاللری اتفاقی: هراتده عیاللرنینگ حبسگه آلینیشی عیاللرنی جمعیتدن چېتلهتیش سیاستینینگ بیر قسمی دیر
۸صبح، کابل: انسان حقوقلری فعاللری اتفاقی هراتده عیاللرنینگ حبسگه آلینیشی دوام اېتهیاتگنیگه مناسبت بیلدیریب، بیرلشگن ملتلر تشکیلاتی، مخصوص گزارشگرلر و انسان حقوقلری تشکیلاتلرینی طالباننی جوابگرلیککه تارتیش اوچون زودلیک بیلن ثمرهلی چارهلر کۉریشگه چقیردی.
مذکور اتفاق پنجشنبه کونی، ۸-اسد، اعلان قیلگن بیاناتیده طالبان تامانیدن عیاللرگه نسبتاً عملگه آشیریلهیاتگن اۉزباشیمچهلیک بیلن حبسگه آلیشلر و چېکلاولرنی ناقانونی همده انسان حقوقلری، خلقارا حقوق و انسان قدر-قیمتیگه ضد دېب تعریفلهگن.
بیاناتده خلقارا تشکیلاتلر عدالتسیزلیکنینگ ینهده کېنگهییشینینگ و انسانی فاجعهلرنینگ تکرارلنیشینینگ آلدینی آلیش اوچون عملی همده ثمرهلی چارهلرنی کۉریشی لازملیگی تأکیدلنگن.
انسان حقوقلری فعاللری اتفاقی حاضر هراتده صادر بۉلهیاتگن واقعهلر فقط کیینیشگه قۉییلگن چېکلاولر بیلن چېکلنیب قالمهیاتگنی، بلکه عیاللرنی نظارت قیلیش، تحقیرلش و اجتماعی حیاتدن چېتلهتیشگه قرهتیلگن تیزیملی سیاستنینگ بیر قِسمی اېکنینی تأکیدلهگن.
مذکور اتفاق بو خطتی-حرکتلر افغانستان تاریخیدهگی زۉرآورلیک و چوقور ایلدیز آتگن ظلم دورلرینی اېسلهتیشینی، اۉشه دورلرده عیاللرنینگ قدر-قیمتی، اختیاری و حقوقلری استبداد همده قوراللی حکمرانلیک قربانیگه ایلنگنینی قید اېتگن.
مذکور تشکیلاتنینگ تأکیدلشیچه، عیاللرنی قماققه تشلش، قیزلرنی سکوت سقلشگه مجبور قیلیش و عایلهلر آرهسیده قۉرقوو محیطینی حکمران اېتیش آرقهلی هېچ بیر جمعیت برقرارلیک، عدالت یاکه قانونیلیککه اېریشه آلمهیدی.
