انسان حقوقلری تشکیلاتی: پاکستان پولیسی افغانستان مهاجرلر بایلیکلرینی آلگن
۸صبح، کابل: انسان حقوقلری تشکیلاتی نینگ ایتیشیچه، پاکستان پولیسی او مملکتده‌گی افغانستانلیک مهاجرلرنینگ «مال و بایلیکلرینی» ظبط، اویلرینی بوزیش و اولرنینگ کیملیک حجتلرینی اۉرته‌دن اېلتیشگه اولگورگن.
اوشبو تشکیلات ۷قوس سه‌شنبه کونی بیر اعلامیه نشر قیلیب، پاکستانلیک بلند مرتبه‌لی رسمیلر افغانستانلیک یشاوچیلر برابریده کېنگ قمروالی تخلفگه مرتکب بۉلگنلر دېب معلوم قیلدی.
انسان حقوقلری تشکیلاتی نینگ آسیا بۉییچه مدیری الین پیرسون: «پاکستانلیک بلند مرتبه‌لی رسمیلر افغانلر اوچون جبری محیط یره‌تگنلر تاکه اولر افغانستان نینگ خوفلی شرایطیگه قره‌مه‌ی یورتلریگه قیتیشگه مجبور بۉلسه‌لر» دېب ایتگن.
انسان حقوقلر تشکیلاتی نینگ گزارشیده کېلیشیچه، پاکستانلیک پولیسلر تون نینگ قرانغوسیده افغانستانلیک مهاجرلر اویلریگه باستیریب کیرگن واولرنی کلتکلب، تهدید و ایریم حاللرده اوشلب آلگن دیر.
اوشبو گزارش اساسیده، پاکستان پولیسی پاره سۉره‌ب افغانلرنینگ تاقینچاقلری، بایلیکلری و باشقه ماللرینی تارتیب آلگن و یشش اویلرینی بولدوزر بیلن ویران قیلیب تشله‌گن دېب بیلدیردی.
انسان حقوقلری تشکیلات نینگ کۉپه‌یتیریشیچه، پاکستانلیک بلند مرتبه‌لی رسمیلر افغانستانلیک هر بیر یشاوچینی پاکستان نینگ ۵۰ مینگ روپیه (۱۷۴دالر)دن آرتیق پول آلیب یوریالمسلیگینی بیلدیرگنی آرتیدن، کۉپراق مهاجرلر بایلیکلرینی آرتده قالدیریب تقریبا قشّاق حالتده افغانستان قیته‌دیلر.
شونینگ مهاجر خاتینلرنینگ انسان حقوقلری تشکیلاتیگه ایتیشیچه، پاکستان پولیسی بعضن ایریم خاتین – قیزلرنی جنسی آزار و اذیت قیلیب و اولرنی جنسی تجاوز قیلیشگه تهدید اېتگنلر.
پاکستانلیک بلند مرتبه‌لی رسمیلر، امریکا قۉشمه ایالتلری همده بویوک بریتانیاگه جای بېریلیشینی کوتیب تورگن پاکستانده‌گی افغانستانلیک یشاوچیلرنی ۸۳۰ دالر چیقیش خرجتینی تولشگه مجبور قیلگنی ایتیله‌دی.
بوندن آلدین هم انسان حقوقلری ایشلری بیلن شغلنگن تشکیلاتلر پاکستان حکومتینی حجت‌سیز مهاجرلرنی جبری چیقاریشگه عیبلب انسان حقوقلرینی آیاق آستی قیلگنلیکده متهم اېتگن اېدیلر، لېکن رسمی اسلام آباد قانونی حجتی بۉلمه‌گن مهاجرلرنی چیقاریشگه حقلی اېکن‌لیگینی بیلدیرگن.
