یازه‌من تا بارلیگیمنی بیلدیرسم
م. حسینی
مېن اۉقیش‌دن محروم قالیب عیاللیک عیبی بیلن افغانستان ناملی ییریک بیر قماقخانه‌ده قمه‌لیب قالگن بیر کیشی اوله‌راق بو سطرلرده یازیب بارلیگیمنی بیلدیره‌من؛ چونکه جیم‌لیک ایچیده، سیس چیقاریشیم اوچون یالغیز یۉل یازیش دیر. قووانه‌من هیچ بۉلمسه شو یۉل آرقه‌لی میدیالر بیزنینگ سیس‌میزنی ترقه‌تَدی، لیکن شو بیلن بیرگه قیغولنه‌من هم، شونچه‌لیک سیس چیقاریشیمیز و آغیر شرایط‌لرگه تَن بېرمه‌ی اینتیلگنیمیز بیلن حاضرگچه افغانستان خاتین-قیزلری احوالی خصوصیده سیزیلرلی بیر اوزگریش گواهی اېمس‌میز. گویا دنیا افغانستان ناملی بیر مملکت‌نی اونوتیب قۉیگن، بو یېرده اهالی‌نینگ یریمی اینگ دستلبکی حقلریدن محرومیت‌ده سقلنماقده‌لیگینی بیلمه‌یدی.
بیراق شوندی بۉلسه هم بوگون ینه بیربار یازیب، سیس چیقاره‌من. یازه‌من تا بیلدیرسم که افغانستان عیاللری هلی هم اوشبو جهنم چوقورلیگیده تیریکچیلیک اوچون اینتیلماقده. هلی هم ایرکین‌لیککه ایریشیش اوچون کوره‌شماقده و هلی هم آغیر تقیق‌لنیشلرگه تَن بېرمه‌ی بیلیم آلیش آرتیدن دیر.
مېن شو قیزلردن بیری‌من که مکتب‌لر و بیلیم یورتلر ایشیک‌لری یاپیلگندن کیین ممکن بۉلگن بیر یۉلدن اۉقیب بیلیم آلیشگه اورینه‌یبمن. اۉقیش‌لریم دوامی اوچون تورلی یۉللرنی قیدیره‌یبمن، آنلاین اۉقیش‌لرگه اشتراک اېته‌من و بعضی‌ده هم ایریم اۉقیش مرکزلری درسلریگه حضوری قتنه‌شمن. بو یۉل قوله‌ی اېمس و بو مدت ایچیده نیچه مراتبه موفقیت‌سیزلیککه اوچره‌دیم لیکن قیته توریب دوام بېردیم. تقیقلنیشلر، حقارتلر، توهین‌لر و بعضی‌ده کلتک‌لنیش برابریده چیده‌دیم تا قطعیت‌نی کۉرسه‌تیب تسلیم بۉلمسم. مېن یوتقزمسلیک اوچون اینتیله‌من تا کونی کېلیب تینگ بۉلمه‌گن اوروشده غلبه قازانسم. چونکه شونگه ایشانه‌من توشینگن عیال یوتقزمه‌یدی و تیز تَن بېرمه‌یدی. افغانستان‌نینگ حاضرگی حاکمیتی توشینگن عیاللردن قورقه‌دی و شو سبب بیلیم و توشینیش یۉللرینی یاپیب قۉیگن. اولر بیلهدی که افغانستان عیاللری توشینیشگه ایریش‌گنده اۉز حقلرینی بیلیشه‌دی و شو زمان اطاعت قیلمه‌ی حقلری اوچون کوره‌شَدی.
بوگون اۉزیم و یورتیمیزنینگ اۉنلب قیزی بیلن فخرلنه‌من؛ بو فخر شوندی انسانلر اوچون که چیکلاولر اوستیدن اوتیب غلبه‌گه ایریشدیلر. شوندی قیزلرنی تانیمن که اۉقیش بورسیه‌لرینی آلیشگه موفق بۉلیب، حاضر آسیا و اروپا مملکتلریده اۉقیشگه دوام بېرماقده‌لر. تانیمن شوندی قیزلرنی که آنلاین اۉقیش آرقه‌لی بیلیم آلگن. تانیمن شوندی عیاللرنی که مالیه‌وی ترقیاتگه قۉل تاپیب اۉز-اۉزلرینی تامین‌لشگه قادر بۉلگن. شونینگدېک شوندی‌لرنی تانیمن که بیر کون خیال بۉلگن آرزولریگه قۉل تاپکن.
ممکن بوگونلر اوشبو قیزلرنینگ آرزولری اېمس اېدی و اولر کینگ‌راق تفکرگه ایگه اېدی‌لر، لیکن شونچه‌لیک طلب‌لرگه قۉل تاپیش او هم سان‌سیز چیکلاولر ایچیده، کوچلی اراده و کېچه‌وکوندوز اینتیلیشگه نیازی بار اېدی.
مېن یازه‌من تا شوندی اَیتسم اگرده بوگون بیز دنیا تامانیدن اونوتیلگن بۉلسه‌ک هم بو اینتیلیش‌لر، سعی‌حرکتلر و بعضی‌ده افغانستان عیاللری آلگن مکافات‌لر افغانستان خاتین-قیزلری حاضرهم توریب کوره‌شی یاتگنینی کۉرسه‌تَدی و اېس‌لردن چیقاریلمس‌لیگی اوچون چیکلاولر آستیده اۉزلرینی بارلیگینی بیلدیرماقده‌لر.
مېن هم قرانغولیک و ایاغ-قۉلیم‌نی باغلب قۉیگن چیکلاولر ایچیدن اۉز بارلیگیمنی اعلام قیله‌من. مېن اعلام قیله‌من اۉقیش‌لریمگه دوام بېره‌من، قیینچیلیکلر، آغیر یۉللر و خوف-خطرلردن قۉرقمیمن و بونگه ایشانه‌من که کونی کېلیب اۉز آروزلریمگه ایریشه‌من. تۉرت ییل‌دن آرتیق زمان بۉله‌دی که کوره‌شیب کېله‌یبمن و بوندن کیین هم شو یۉلگه دوام بېره‌من. ایشانه‌من که بیرکون بیز یوتوقلیککه ایریشه‌میز و شو وقت اۉز حضوریمیز و فخریمیزنی بلند سیس بیلن اعلام قیله‌میز.
