سِرلی آدم اۉلدیریش‌لر کۉپه‌یشی؛ فاریاب ولایتیده تورکمنلر‌نینگ بیر آقسقالی اۉلدیریلدی
۸صبح، فاریاب: فاریابدن بۉلگن منبعلرگه کۉره، اوشبو ولایت‌نینگ قرغان اولسواللیگیده تورکمن خلقی‌نینگ آقسقاللریدن بیری نامعلوم شخصلر تامانیدن اۉلدیریلگن.
اوشبو منبعلر شنبه کونی، ۳۱ اسد، ۸صبح گزېته‌سیگه معلوم قیلیشیچه، تورکمن خلقی‌نینگ بو آقسقالی فاریاب ولایتی قرغان اولسواللیگی‌نینگ «پتاش‌لر» قیشلاغی یشاوچیسی بۉلگن.
معلوماتلرگه کۉره، اونینگ اسمی اسدالله بۉلگن و جمعه کېچه‌سی ساعت ۲:۰۰ اطرافیده نامعلوم شخصلر تامانیدن اویقوسیده پیچاقلنیب اۉلدیریلگن.
اسدالله‌نینگ یقینلری اونی هېچ قنده‌ی جبهه یاکه گروهگه علاقه‌دار بۉلمه‌گن عادی شخص دېب تعریفله‌گن.
اولر‌نینگ اَیتیشیچه، نامعلوم شخصلر اونی اۉلدیرگچ، واقعه جاییدن قاچیب کېتگن.
حاضرچه اوشبو واقعه‌نینگ سببی و اونی صادر اېتگن شخصلر‌نینگ کیملیگی حقیده قۉشیمچه تفصیلاتلر موجود اېمس.
شو بیلن بیرگه، طالبان‌نینگ افغانستان بۉیلب خوفسیزلیکنی تأمینله‌گنی حقیده‌گی دعوالریگه قره‌مه‌ی، مملکت‌نینگ تورلی حدودلریده قوم آقسقاللری، سابق حربیلر و عادی اهالی‌لر‌نینگ سِرلی اۉلدیریلیشلری کۉپه‌یگن.
