اوچا: افغانستانده جنسیتگه اساسلنگن زۉره‌وانلیک خوفی نینگ آشیشی همان یوقاری درجه‌ده قالماقده
۸صبح، کابل: بیرلشگن ملتلر تشکیلاتی‌نینگ انسانپرورلیک یاردملرنی موافقلشتیریش ادارهسی (اوچا) معلوم قیلیشیچه، افغانستانده جنسیتگه اساسلنگن زۉره‌وانلیک خوفی‌نینگ آشیشی همان یوقاری درجه‌ده قالماقده.
اوچا شنبه کونی، ۲۹- حمل، جاری ییل اپریل آیی‌نینگ ۷-سیدن ۱۷-نچی کونلری بۉییچه حسابات ترقه‌تیب، اونده سۉنگگی یامغیرلر و سوو تاشقینلری عاقبتیده یېتگن ضررلر حقیده هم معلومات بېریلگن.
شونینگدېک، اوشبو اداره تأکیدله‌شیچه، حمایه ساحه‌سیده‌گی همکارلر ایکّی مینگ ایکّی یوزدن آرتیق کیشیگه روانی و اجتماعی خدمتلر همده جنسیتگه اساسلنگن زۉره‌وانلیک بیلن باغلیق یاردم کۉرسه‌تگن.
حساباتده ایتیلیشیچه: «کېنگراق حمایه خوفلری همان یوقاری درجه‌ده قالماقده؛ جمله‌دن جنسیتگه اساسلنگن زۉره‌وانلیک خوفی نینگ آشیشی، باله‌لر محنتی و تخمینا ۱۴ مینگ کیشیگه تأثیر قیلگن روانی باسیملر».
اوچا قۉشیمچه قیلیشیچه انسانپرورلیک همکارلر مملکت نینگ کۉپ حدودلرینی قمره‌ب آلگن سۉنگگی یامغیرلر و سوو تاشقینلری عاقبتیده شاشیلینچ یاردم ایشلرینی کېنگه‌یتیرگن.
عموماً آلگنده، حساباتده «بیر نېچه یوز کیشی هلاک بۉلگن یاکه جراحت آلگن»، مینگلب اویلر ضرر کۉرگن یاکه ویران بۉلگن، یوزلب کیلومتر مهم یۉللر و بیر نېچه کۉپریکلر کبی مهم قوریلمه‌لر یۉق قیلینگن، شونینگدېک، اېکینچیلیک یېرلری نینگ کتّه قِسمی ضرر کۉرگنی ایتیلگن.
اوچا معلوم قیلیشیچه، ۷۳ مینگدن آرتیق کیشی ضرر کۉرگن و ۳۱ مینگدن آرتیق کیشی شاشیلینچ یاردمگه محتاج صفتیده انیقلنگن.
اوشبو اداره بیرلشگن ملتلر تشکیلاتلری تورلی ضرر کۉرگن عایله‌لرگه یاردم کۉرسه‌تگنینی تأکیدله‌گن.
