ایران نینگ اسراییل گه هجومی گه مناسبت‌لر؛ «دنیا باشقه اوروشنی تحمل قیله آلمه‌یدی»
ایران نینگ اسراییل گه پهپادی و راکته هجوملری بیلن اۉرته شرق‌ده ینگی اوروش باشلنیشی گه دایر خواطرلر کوچه‌یگن، عین‌حالده بیرلشگن ملتلر تشکیلاتی و بیر قطار مملکتلر ایکّی تامان‌نی آغیرلیک قیلیشگه چقیرگنلر.
بیرلشگن ملتلر تشکیلاتی باش کاتبی آنتونیو گوترش ۱۴ اپریل، یک‌شنبه کونی ایران نینگ اسراییل گه هجومینی قاره‌لب و دشمن‌لیکلرینی توخته‌تیشنی سۉره‌گن.
اونگه کوره: «مین منطقه ده کېسکین‌لیک کوچه‌یشیدن خواطرده من. برچه تامانلردن آغیرلیک قیلیب و اۉرته شرق‌ده نیچه جبهه ده بویوک حربی توقنشوولر گه سبب بوله‌دیگن حرکت گه قول اۉرمسلیک‌لرینی اېسته‌یمن.»
بیانیه ده اوندن نقل قیلینیب کېلیشیچه: «مین نیچه مراتبه منطقه و دنیا باشقه اوروشنی تحمل قیله آلمسلیکدن آگاه‌لنتیرگن من.»
عین‌حالده، امریکا، چین، سعودی عربستان ایران نینگ هجوملرینی قاره‌لب و اۉرته شرق‌ده کېسکین‌لیک کوچه‌یشیدن آگاه‌لنتیرگنلر.
امریکا جمهور باشلیغی جوبایدن بو هجومنی قاره‌لب و اسراییل نینگ ایران هجومی گه جواب قیتریشیدن حمایت قیلمسلیگینی بیلدیرگن.
عین‌حالده، چین تشقی ایشلر وزیرلیگی بیر بیانیه ترقه‌تیب، اۉرته شرق‌ده‌گی احوال، غزه اوروشیدن چیققن کېکسین‌لیک بولیب و توقنشوولر تېزلیک بیلن توخته‌تیلیشی کېره‌ک دیگن.
چین دنیا همجمعیت اینیقسه نفوذلی مملکتلردن اۉرته شرق‌ده صلح و ثبات برقرار اېتیلیشی اوچون تلاش قیلیشلرینی اېسته‌گن.
باشقه تاماندن سعودی عربستان ایکّی تامان‌نی آغیرلیک قیلیش گه چقیریب و بیرلشگن ملتلر تشکیلاتی خوفسیزلیک کینگشیدن منطقه ده صلح و خوفسیزلیک سقلنیش مسوولیتینی تن آلیشینی سۉره‌گن.
ایران ۱۴ اپریل، شنبه کیچه سوریه پایتختی دمشق ده اوشبو مملکت قنسولگرلیگی گه اسراییل نینگ هجومی گه جواب، ۲۰۰ دن آرتیق پهپاد، کروز و بالستیک راکته اسراییل توپراغی گه آتگن.
ایران یېتکرمه‌لری ۱۵۰ راکت نشانگه تېکنینی ادعا قیلسه‌لرده، بیراق اسراییل اردوسی اکثر راکته‌لر یوق قیلینگنینی بیلدیرگن.
