افغانستانده باله‌لر آره‌سیده توییب-آوقت‌لنمسلیک کوپه‌ییشی؛ خلق‌ارا تشکیلاتلر کۉپراق قۉللب-قوّتلاشگه چقیردی
۸صبح، کابل: جهان ساغلیقنی سقلش تشکیلاتی و بیرلشگن ملتلر تشکیلاتی باله‌لرنی قۉللب-قۉتلش جمغرمه‌سی (یونیسف) وکیللری افغانستانده آنه‌لر و باله‌لر اۉرته‌سیده تۉییب-آوقت‌لنمسلیک حالتلری کۉپه‌یه‌یاتگنیدن خواطر بیلدیریب، عایله‌لرنی قۉللب-قوّتلشنی کېنگه‌یتیریش ضرورلیگینی تأکیدله‌دیلر.
اوشبو بیاناتلر یک‌شنبه کونی، ۱۱-اسد، خلق‌ارا اېمیزیش هفته‌سی مناسبتی بیلن اۉتکزیلگن ییغیلیشده بیلدیریلدی.
ییغیلیشده خلق‌ارا تشکیلاتلر وکیللری اېمیزیش‌نینگ مهم اهمیتیگه قره‌مه‌ی، افغانستاندهگی کۉپلب آنه‌لر خبردارلیک‌نینگ پستلیگی، مصلحت خدمتلریدن فایده‌لنیش امکانیتی‌نینگ چېکلنگنلیگی و اقتصادی معمالر سببلی چقه‌لاقلرینی آزیقلنتیریشده جدّی قیینچیلیکلرگه دوچ کېله‌یاتگنینی اَیتدیلر.
اولر تۉییب-آوقت‌لنمسلیک باله‌لر‌نینگ جسمانی و عقلی رواجلنیشیگه جدّی ضرر یېتکزیشی ممکنلیگیدن آگاهلنتیریب، افغانستان بۉیلب آنه‌لر و باله‌لر اوچون قۉللب-قوّتلاوچی دستورلرنی عملگه آشیریش همده آزیقلنیش خدمتلرینی کوچه‌یتیریش ضرورلیگینی تأکیدله‌دیلر.
