صلاح‌الدین ایوبی؛ ایرانده‌‌گی قرضدارلیکدن ارگ یېتیب باریشیگچه
اېسلتمه: ۸صبح گزېته‌سی دواملی گزارشلریده طالبان‌نینگ اساسی یېری و دستلبکی هسته‌سیدن بۉلمه‌گن قوماندانلر‌نینگ حیاتی و بو گروهگه قۉشیلیش یۉلینی اۉرگنماقده. اوشبو توپلم‌نینگ بیرینچی گزارشی جمعه‌خان فاتح‌نینگ حیاتی و طالبانگه قۉشیلیش یۉلیگه بغیشلنگن اېدی، بو سفر اېسه طالبان‌نینگ اۉزبېک ملتیگه منسوب قوماندانی صلاح‌الدین ایوبی‌نینگ حیاتی و فعالیتی اۉرگنیلگن.
صلاح‌الدین ایوبی، فاریاب ولایتیدن چیققن، طالبان‌نینگ تجربه‌لی و نفوذلی شخصلریدن بیری بۉلیب، ییگیرمه ییلدن آرتیق وقت دوامیده اوشبو گروه‌نینگ حربی، سیاسی و اداری توزیلمه‌لریده فعالیت یوریتگن همده محلی جنگچیدن طالبان‌نینگ قوماندانلری و یوقاری مرتبه‌لی عملدارلریدن بیریگه ایلنگن. بیر نېچه ییللیک حربی فعالیت، سابق حکومت تامانیدن ایکّی مرته حبسگه آلینیشی، محکمه‌لنیشی و قماققه توشیشی، کېینچه‌لیک اېسه طالبان صفیگه قَیتیشی اونینگ فعالیت تاریخیگه کیره‌دی. او شمالی ولایتلر‌نینگ قوله‌شیده و طالبان کوچلری‌نینگ کابلگه کیریشیده رۉل اۉینه‌گن، اوشبو گروه حاکمیتنی اېگه‌لله‌گنیدن کېین هم مهم لوازملرنی اېگه‌لله‌گن. ایوبی طالبان‌نینگ بیر قطار یوقاری مرتبه‌لی رهبرلری بیلن یقین علاقه‌لریدن تشقری، سۉنگگی ییللرده ۲۰۳-منصوری قول‌اوردوسی باشلیغی لوازمیدن چېتله‌تیلیشیگه قرشی چیقیشی و تورکی ملت وکیللریگه نسبتاً کمسیتیش بۉله‌یاتگنینی دعوا قیلیشی سببلی بیر مدت طالبان رهبریتی بیلن کېلیشماوچیلیککه بارگن. بیراق نزاع حل اېتیلگنیدن سۉنگ او ینه طالبان رژیمی توزیلمه‌سیگه قَیتدی و حاضرده اوشبو گروه‌نینگ لوگر ولایتی والیسی صفتیده فعالیت یوریتماقده.
محمد ایوبی‌نینگ اۉغلی، صلاح‌الدین ایوبی، فاریاب ولایتی المار اولسواللیگی‌نینگ مُرشادی قیشلاغی یشاوچیسی، اۉزبېک ملتیگه منسوب و تخمیناً ۴۹ یاشده. او طالبان‌نینگ تجربه‌لی شخصلریدن بیری حسابلنه‌دی و هجری-شمسی ۱۳۷۰-ییللر‌نینگ آخریدن باشلب اکه‌سی داملا صدرالدین‌نینگ یۉل-یۉریغی بیلن اوشبو گروهگه قۉشیلگن. داملا صدرالدین طالبان حرکتی ملا محمد عمر باشچیلیگیده تشکیل تاپگن دستلبکی کونلردناق بو گروهگه اعضا بۉلگن. صلاح‌الدین ایوبی ایکّی یریم اۉن ییلدن آرتیق فعالیتی دوامیده طالبان توزیلمه‌سیده تورلی حربی، سیاسی و اداری مسؤولیتلرنی ذمّه‌سیگه آلگن.
اونینگ رسمی تعلیمی حقیده ایشانچلی معلوماتلر موجود اېمس و اونینگ عالی یاکه بیلیم یورتی تعلیمی آلگنینی تصدیقلاوچی هېچ قنده‌ی حجت اعلان قیلینمه‌گن. وطنداشلری‌نینگ اَیتیشیچه، او بیر مدت پاکستان‌نینگ اکوره ختک دینی مدرسه‌سیده قرآن یادلش بیلن شغللنگن و عیناً اۉشه یېردن طالبان صفیگه قۉشیلگن.
طالبانگه قۉشیلیشی و فعالیتی‌نینگ دستلبکی ییللری
ایوبی هم‌دوره‌لری‌نینگ اَیتیشیچه، او ۱۳۷۷-ییلده، تخمیناً ۱۸ یاشیده، طالبان حاکمیتی‌نینگ بیرینچی دوریده جنگچی صفتیده اوشبو گروه صفیگه قۉشیلگن. ایوبی اۉشه پیتده حربی فعالیتینی فاریاب و جوزجان ولایتلریده باشله‌گن همده لوا قوماندانی، هم‌دوره غندی قوماندانی و شیرین تگاب اولسواللیگی خوفسیزلیک قوماندانی صفتیده فعالیت یوریتگن.
۲۰۰۱-ییلده طالبان‌نینگ بیرینچی رژیمی قوله‌گنیدن سۉنگ، او بیر مدت ایرانگه باردی و اصفهان و تهران شهرلریده بیر قطار هم‌قیشلاقلری بیلن بیرگه مردکارچیلیک قیلدی. بعضی دۉستلری‌نینگ اَیتیشیچه، او قمار اۉینه‌ش، کۉنگیل‌آچر و موسیقه مجلسلریده قتنه‌شیشگه هم قیزیققن و شو سببلی قرضدار بۉلگن.
صلاح‌الدین ایوبی ۱۳۸۲-ییلده ایراندن ینه افغانستانگه قَیتیب، بیر مدرسه‌ده امام و مدرس صفتیده ایشله‌ی باشله‌دی. او طالبان صفیده‌گی فعالیتینی اۉز وطنیده، شونینگدېک، سرپل، بدخشان و جوزجان کبی قۉشنی ولایتلرده یشیرین روشده قَیته باشله‌دی.
فاریاب ولایتی‌نینگ سابق خوفسیزلیک خادملریدن بیری‌نینگ اَیتیشیچه، او ۱۳۸۴-ییلده سابق حکومت ملی خوفسیزلیک باش باشقرمه‌سی کوچلری تامانیدن کتّه مقدارده‌گی پارتلاوچی مادّه‌لر و قوراللرنی تشیشده عیبلنیب حبسگه آلینگن و محکمه تامانیدن ۱۲ ییل قماق جزاسیگه حکم قیلینگن.
خودّی شو معلوماتگه کۉره، او سکّیز ییل پل‌چرخی قماقخانه‌سیده اۉتیرگنیدن سۉنگ، فاریاب ولایتی‌نینگ اَیریم وکیللری واسطه‌چیلیگیده و اۉشه پیتده‌گی جمهور باشیغ تامانیدن تۉرت ییللیک جزا یېنگیللیگی بېریلیشی بیلن آزاد قیلینگن. شونینگدېک، اَیریم خارجی دولتلر‌نینگ استخبارات خدمتلری هم اونینگ آزاد اېتیلیشیده رۉل اۉینه‌گنی اَیتیله‌دی.
قماقدن آزاد اېتیلگنیدن سۉنگ، ایوبی استه-سېکین طالبان توزیلمه‌سیده یوقاری لوازملرگه کۉتریلیب، شمالی زون کمیسیونی مسؤولی، طالبان‌نینگ فاریاب ولایتیده‌گی والی اۉرین‌باسری و والی کبی لوازملرنی اېگه‌لله‌دی.
شونینگدېک، اونینگ ۱۳۹۷-ییلده هرات ولایتیده ملی خوفسیزلیک کوچلری تامانیدن ینه حبسگه آلینگنی حقیده خبرلر موجود. اَیتیلیشیچه، او کابلده‌گی ملی خوفسیزلیک‌نینگ ۴۰-باشقرمه‌سیگه آلیب کېتیلگنیدن بیر نېچه آی اۉتیب، اوشبو اداره‌‌نینگ اَیریم مسؤوللری بیلن موافقلشوو و همکارلیکده حبسخانه‌دن قاچیب، پاکستانگه کېتگن. اَیریم منبعلر اونینگ ملی خوفسیزلیک کېنگشیده‌گی «بېشینچی ستون» دېب اته‌لووچی عنصرلر تامانیدن قۉللب-قوّتلنگنینی دعوا قیله‌دی.
طالبان توزیلمه‌سیده‌گی رۉلی و حاکمیتگه کۉتریلیش جریانی
تقدیم اېتیلگن معلوماتلرگه کۉره، ایوبی ۱۳۹۷–۱۳۹۹-ییللر آره‌لیغیده طالبان مرکزی کمیسیونی رهبریتی دایره‌سی اعضاسی صفتیده فعالیت یوریتگن و افغانستان شمالیده‌گی ولایتلر‌نینگ قوله‌ش جریانیده قریب ۴۰ مینگ جنگچینی سفربر قیلیش و تشکیل اېتیش آرقه‌لی مهم رۉل اۉینه‌گن.
اَیریم منبعلرگه کۉره، شو سببلی او «شمال فاتح‌سی» دېب هم اتله‌دی. اولر‌نینگ اَیتیشیچه، ایوبی کابل قوله‌شی‌نینگ دستلبکی کونلریده اۉز کوچلری بیلن جمهور باشلیغ سراییگه یېتیب بارگن و اونینگ بیر قطار قوراللی آدملری بیلن توشگن صورتلری هم عامه‌وی اخبارات واسطه‌لریده اعلان قیلینگن.
صلاح‌الدین ایوبی حربی، خوفسیزلیک و باشقروو ساحه‌لریده کتّه تجربه‌گه اېگه. سابق حکومت خوفسیزلیک کوچلریگه قرشی طالبان‌نینگ عملیاتلریده اوزاق ییللر قتنه‌شگنی، محلی توزیلمه‌لرگه قوماندانلیک قیلگنی، اداری توزیلمه‌لرنی باشقرگنی و اوشبو گروه رهبریتی‌نینگ تورلی درجه‌لریده فعالیت یوریتگنی اونینگ اېنگ مهم تجربه‌لریدن حسابلنه‌دی.
شونینگدېک، اونینگ طالبان مدافعه وزیری ملا یعقوب مجاهد، و طالبان ایچکی ایشلر وزیری سراج‌الدین حقّانی بیلن یقین علاقه‌لری بۉلگنی همده اولردن سیاسی و تشکیلی قۉللب-قوّتلش آلگنی اَیتیله‌دی؛ بیراق بو معلوماتلر هم موجود خبرلرگه اساسلنگن بۉلیب، اولرنی مستقل روشده تصدیقلش قیین.
عایله‌وی حالتی و تأثیر ترماغی
عایله‌وی جهتدن، اونینگ «بلال کور» نامی بیلن تنیلگن قمرالدین ناملی اکه‌سی تقدیم اېتیلگن معلوماتلرگه کۉره، طالبان‌نینگ فاریاب ولایتیده‌گی استخبارات باشقرمه‌سیده رهبرلیک لوازمیده ایشله‌یدی. شونینگدېک، صلاح‌الدین ایوبی‌نینگ اوچ خاتینی بارلیگی و اوچینچی خاتینی‌نینگ آته‌سی نورالله، مولوی عبدالمنان نیازی گروهیگه علاقه‌دار شخصلردن بیری بۉلگنی همده داعش بیلن هم علاقه‌سی بۉلگنی دعوا قیلینگن. بو دعوالر هم حاضرگچه مستقل روشده تصدیقلنمه‌گن.
صلاح‌الدین ایوبی‌نینگ فعالیت تاریخیگه سابق حکومت خوفسیزلیک کوچلری تامانیدن ایکّی مرته حبسگه آلینیشی، پارتلاوچی مادّه‌لرنی تشیشده عیبلنیشی، ملی خوفسیزلیک ۴۰-باشقرمه‌سی حبسخانه‌سیدن قاچگنی حقیده‌گی خبرلر و اَیریم عایله‌وی علاقه‌لری تۉغریسیده‌گی دعوالر کیره‌دی؛ بو موضوعلر تورلی حساباتلرده ایلگری سوریلگن.
بونگه قرشی روشده، طالبانده‌گی اوزاق ییللیک فعالیتی، ولایت درجه‌سیده‌گی باشقروو تجربه‌سی، افغانستان شِمالیده‌گی خوفسیزلیک وضعیتیدن خبردارلیگی و اوشبو گروه‌نینگ اَیریم یوقاری مرتبه‌لی رهبرلری بیلن علاقه‌لری اونینگ طالبان توزیلمه‌سیده‌گی موقعینی مستحکملشگه یاردم بېرگن عامللر صفتیده کۉریله‌دی.
جمهوریت قوله‌گنیدن کېین صلاح‌الدین ایوبی
صلاح‌الدین ایوبی هنوز طالبان‌نینگ نفوذلی شخصلریدن بیری حسابلنه‌دی. موجود معلوماتلرگه کۉره، او اوشبو گروه‌نینگ عادی اعضاسیدن یوقاری مرتبه‌لی حربی، سیاسی و اداری لوازملرگچه بۉلگن یۉلنی باسیب اۉتگن و ییگیرمه ییلدن آرتیق فعالیتی دوامیده طالبان توزیلمه‌سیده سېزیلرلی موقعگه اېگه بۉلگن. بیراق اونینگ خوفسیزلیککه عاید فعالیتی، شخصی مناسبتلری، عایله‌وی علاقه‌لری و او حقیده‌گی اَیریم دعوالرگه عاید معلوماتلر‌نینگ بیر قِسمی اعلان قیلینگن خبرلر و روایتلرگه اساسلنگن.
ایوبی جمهوریت قوله‌گنیدن سۉنگ حقانی ترماغی بیلن موافقلشگن حالده کابلگه کیردی. اونینگ عامه‌وی اخبارات واسطه‌لریده اعلان قیلینگن صحبتلریدن بیریده اَیتیشیچه، او اوشبو گروه رهبرلری‌نینگ بویروغیگه بناءً کابل اطرافیده‌گی اولسواللیکلرنی اېگه‌لله‌گن و بیرینچی بۉلیب لوگر یۉنه‌لیشی آرقه‌لی ۴۰ کیشی بیلن جمهور باشلیغ سراییگه کیرگن. او شونده‌ی دېیدی: «مېن اوچون غلطی لحظه اېدی؛ آزاد بۉلیشیمگه عموماً امید قیلمه‌گن قماقدن چیقیب، افغانستان جمهور باشلیغی‌نینگ چوکی‌سیگه آرتیگه اۉتیردیم.»
ایوبی جمهور رییسلیک سراییگه کیرگن پیتلری حقیده هم باشقه‌چه حکایه قیله‌دی. اونینگ اَیتیشیچه، جمهور باشلیغ‌نینگ ایشخانه‌سیده بیر میلیون دالر بۉلگن و اولر بو مبلغنی مسؤوللرگه تاپشیرگن. او بو تیزیم قورال کوچی بیلن حاکمیتگه کېلگنینی و حاکمیتنی اوشبو گروهگه تاپشیریش اوچون هېچ قنده‌ی کېلیشوو بۉلمه‌گنینی حکایه قیله‌دی. ا ایوبی، شونینگدېک، اگر اشرف غنی هم سرایده بۉلگنیده، طالبان‌نینگ عمومی عفو اعلانیگه کۉره کېچیریلگن بۉلردی، دېیدی.
بو حالت طالبان افغانستان اوستیدن نظارتنی قۉلگه کیریتگنیدن سۉنگ، عمومی عفو اعلان قیلگنیگه قره‌مه‌ی، سابق حکومت‌نینگ یوزلب حربی خدمتچیلری، سیاسی شخصلر و فقرالیک فعاللری‌نینگ اۉلدیریلیشیگه عاید کېنگ کۉلملی عیبلاولرگه دوچ کېلگن بیر پیتده یوز بېرماقده.
ایوبی جمهوریت قوله‌شی‌نینگ دستلبکی کونلریده طالبان‌نینگ ملی قرشیلیک جبهه‌سی بیلن مذاکره‌لر آلیب بارووچی هیاتی اعضاسی صفتیده اوشبو گروه‌نینگ بیر قطار رهبرلری بیلن بیرگه بیر نېچه مرته مذاکره اۉتکزدی. بیراق مذاکره‌لر ۱۲ کوندن سۉنگ نتیجه‌سیز یکونلندی و طالبان کېینچه‌لیک پنجشېرنی اېگه‌للش اوچون حربی عملیات‌نی باشله‌دی.
۲۰۳-منصوری قول‌اوردوسی ارکان باشلیغی صفتیده فعالیت یوریتگن صلاح‌الدین ایوبی ۱۴۰۱-ییل مېزان آییده لوازمیدن چېتله‌تیلدی. او بو قرارگه و تورکی ملت وکیللریگه نسبتاً حقوقلر بوزیله‌یاتگنینی دېب حسابله‌گن حالتگه ناراضیلیک صفتیده میمنه شهریگه باردی و بیر مدت طرفدارلری بیلن بیرگه اوشبو گروهگه قرشی قره‌مه-قرشی مناسبت‌ده توردی.
ایوبی قیشلاقلرنی رواجلنتیریش وزیرلیگی سیاست بۉییچه اۉرین‌باسری اېتیب تعیینلنگن بۉلسه-ده، بو لوازمنی قبول قیلمه‌دی. طالبان رهبریتی بیلن نزاع حل اېتیلگنیدن سۉنگ او زابل ولایت خوفسیزلیک قومندانی کېین اېسه لوگر ولایت والیسی اوله‌راق تعیین‌لندی و حاضر هم شو لوازمده فعالیت یوریتماقده.
