منبعلر: فاریاب‌ده سابق خلق قۉزغآلانلری اعضاسی بۉلگن شخص نینگ بۉلکلب تشلنگن جسدی تاپیلدی
۸صبح، فاریاب: محلی منبعلر فاریاب ولایتیده سابق خلق قۉزغآلانلری اعضاسی صبغت‌الله، وحشیانه طرزده اۉلدیریلگنی و اونینگ بۉلکلب تشلنگن جسدی تاپیلگنینی معلوم قیلدی.
منبعلر،۱۳- دلو، دوشنبه کونی، ۸صبح نشری‌گه بېرگن معلوماتیگه کۉره، صبغت‌الله فاریاب ولایتی‌نینگ بندر تومنیگه قره‌شلی کرکری قیشلاغی اهالیسی بۉلگن. اونینگ جسدی میمنه شهری‌نینگ اوچینچی ناحیه‌سیده انیقلنگن.
منبع‌لرنینگ ایتیشیچه، او نامعلوم شخص‌لر تامانیدن اۉته شفقت‌سیز طرزده اۉلدیریلگن بۉلیب، جسدی نینگ ایریم اعضالری کېسیب تشلنگن.
حاضرچه اوشبو قاتللیک نینگ سبب‌لری و اجراچیلری نامعلوم. بیراق مذکور حادثه فاریاب ولایتیده اهالی خوفسیزلیگی باره‌سیده‌گی خواطرلرنی ینه‌ده کوچیتیرگن.
سۉنگگی آی‌لر دوامیده افغانستان‌نینگ بیر قطار ولایتلریده خوفسیزلیک وضعیتی یامانلشگنی حقیده خبرلر بېریلماقده. شونگه اۉخشش حادثه‌لرده، سۉنگگی هفته‌لرده هرات ولایتیده بیر نېچه یاشلر علیحده حالت‌لرده نامعلوم قوراللنگن شخص‌لر تامانیدن اۉلدیریلگن.
طالبان مملکت بۉیلب تۉلیق خوفسیزلیک تأمینلنگنینی دعوا قیلیب کېلماقده. اما محلی اهالی اوشبو دعوالرگه شبهه بیلن قره‌ب، خوفسیزلیک حالتی نظارت‌دن چیقه‌یاتگنینی و وضعیت کوندن کونگه آغیرلشیب باره‌یاتگنینی تأکیدلماقده.
بو آره‌ده، سۉنگگی تۉرت ییل‌دن بویان طالبان سابق خلق قۉزغآلانلری اعضالری و اولگی حکومت بیلن علاقه‌دار شخص‌لرگه نسبتاً حبسگه آلیش، قییناققه سالیش و قاتللیک حالتلریده عیبلنیب کېلینماقده.
منبعلر اوشبو واقعه هم طالبان تامانیدن عمل‌گه آشیریلگنینی تخمین قیلیب، بو گروه مملکت بۉیلب قصاصکارانه عملیات‌لرنی دوام اېتتیره‌یاتگنینی قید اېتماقده.
