طالبان: بیزنینگ «قانونلریمیزگه» قرشی چیقیش اسلامگه قرشی چیقیش حسابلنهدی و جنایت دیر
۸صبح، کابل: طالبان نینگ «محکمهلر جزایی اصولنامهسی»گه قرشی ناراضیلیکلر آرتیدن، اوشبو گروه نینگ عدلیه وزیرلیگی آگاهلنتیریشچه؛ اولر نینگ «قانونلریگه» قرشی چیقیش شریعتگه قرشی چیقیش حسابلنهدی و ناراضیلر جوابگرلیککه تارتیلهدی.
اوشبو وزیرلیک، ۸- دلو، چهارشنبه کونی، ترقهتگن بیاناتیده ایتیشیچه، طالبان نینگ قانونی حجتلری «خدا کتابی و پیغمبر سنتیگه» موافق ایشلب چیقیلگن.
وزیرلیک نینگ ادعاسیگه کۉره، قانونی حجتلر دینی عالملر، بو گروه رهبری هبتالله آخوندزاده، عالی محکمه همده هر بیر وزیرلیک درجهسیده کۉریب چیقیلهدی.
بیاناتده شوندهی ایتیشلیچه: «طالبان نینگ قانونی حجتلریده شریعتگه ضد بۉلگن هېچ بیر مادهسی، بندی یاکه حکمی یۉق؛ اولر تۉلیق شریعتگه موافق دیر، شریعتگه ضد ناراضیلیک، شریعتگه قرشی چیقیش دیر».
طالبان دعوا قیلیشچه، اوشبو «قانونلرگه» قرشی ناراضیلیکگه رخصت یۉق و ناراضیلر محکمه ارگانلریگه تقدیم اېتیلهدی.
شو بیلن بیرگه، طالبان اۉز «محکمهلر جزایی اصولنامهسی»ده قوللیکنی رسمیلشتیرگن و جمعیتنی عالملر، اشراف، اۉرته طبقه و پست طبقه کبی قتلملرگه اجرهتگن.
بعضی انسان حقوقلری تشکیلاتلری «طالبان محکمهلر جزایی اصولنامه»نی انسان حقوقلرینی بوزیش، دینی آزچیلیکلرنی باستیریش و گروهگه قرشی چیققنلرنی اۉلدیریشگه عاید انیق حجت دېب بهالهگن.
