محمد عالم کوهکن کتاب‌خانه‌سی استانبولده افغانستان طلبه‌لری و تدقیقاتچیلری‌گه آچیلدی
۸صبح، کابل: تورکستان ایللری اوقوو فرهنگ و یاردملشمه اویوشمه‌سی، افغانستان نینگ بیر قنچه مدنیت اربابلری و طلبه‌لر بیلن بیرگه‌لیکده، محمد عالم کوهکن، افغانستان شاعری و یازووچیسی خاطره‌سیگه استانبول -تورکیه‌ده خاطره تدبیرینی اۉتکزدی و تدبیرده اونینگ نامی بیلن کتابخانه آچیلدی.
اوشبو تدبیر، ۱۲ -میزان، شنبه کونی، اۉتکزیلیب و تورکستان ایللری اوقوو فرهنگ و یاردملشمه اویوشمه‌سی رییسی هاشم همدم : «کوهکن اوزاق ییللر دوامیده اۉزبېک تیلی نینگ رواجی اوچون ایشله‌دی. بیز هم شونده‌ی تدبیرلرنی اۉتکزیش آرقه‌لی افغانستان شاعرلری، یازووچیلری و ژورنالیستلری اۉرته‌سیده‌گی باغلیقلیکنی مستحکملشنی مقصد قیلگنمیز»دېب، ایتدی.
شونینگدېک همدم: بوندن بویان هر ییلی ۲۱ اکتبر، اۉزبېک تیلی ملی کونی مناسبتی بیلن «محمد عالم کوهکن مکافاتی» بیر نفر شاعر، یازووچی یاکه ژورنالیستگه تقدیم اېتیله‌دی دېب، بیلدیردی.
عین حالده، کوهکن نینگ فرزندی تویغون کوهکن، آته‌سی نینگ یکونلنمه‌گن اثرلرینی تۉپلب نشر قیلیشینی ایتدی.
محمد عالم کوهکن، افغانستان شاعری و یازووچیسی (۱۳۲۴–۱۴۰۲ هـ.ش)، شعریت و نثرده بیر قنچه اثرلر یره‌تگن بۉلیب، اولردن «قاره کۉزلریم» شعری تۉپلمی و «قۉرقینچلی کونلر» حکایه‌سی مثال طریقه‌سیده کېلتیریلیشی ممکن.
