رویترز: ایران و امریکا تورکیه‌ده هستوی مذاکره‌لرنی قیته باشله‌یدی
رویترز خبر بېریشیچه، ایران و امریکا قۉشمه ایالت‌لری جاری هفته، جمعه کونی تورکیه‌ده هستوی مذاکره‌لرنی قیته باشله‌یدی. اوشبو مذاکره‌لر سۉنگگی کېسکینلیکلرنی کمه‌یتیریش و دیپلماتیک جریاننی قیته فعاللشتیریشگه قره‌تیلگن.
اوشبو نشر، ۲- فبروری، دوشنبه کونی، اعلان قیلگن گزارشیده قید اېتیشیچه، ایران تشقی ایشلر وزیری عباس عراقچی همده امریکا نینگ مخصوص نماینده‌سی، استیو ویتکاف، استانبول شهریده اوچره‌شوو اۉتکزه‌دی.
معلوماتلرگه کۉره، مذکور اوچره‌شووده سعودیه عربستانی، مصر، قطر و بیرلشگن عرب امیرلیکلری نماینده‌لری هم اشتراک اېته‌دی. مذاکره‌لر ایکی تامانلمه، اوچ تامانلمه همده کۉپ تامانلمه شکللرده اۉتکزیلیشی رېجه‌لشتیریلگن.
بو مذاکره‌لر ایرانده سۉنگگی ناراضیلیک نمایشلری باستیریلیشی و امریکا نینگ اوشبو مملکت ساحللری یقینیده حربی کوچلرینی کوچه‌یتیریشی آرتیدن کېسکینلیک کوچه‌یگن بیر پیتده اۉتکزیلماقده.
رویترز نینگ یازیشیچه، امریکا حکومتی مذاکره‌لرنی قیته باشلش اوچون اوچته اساسی شرطنی ایلگری سورگن. اوشبو شرطلرگه ایرانده یورانیم‌نی باییتیشنی تئخته‌تیش، تهران نینگ راکت دستورینی چېکلش همده منطقه‌ده‌گی واسطه‌چی گروهلرنی قۉللب-قوّتلشنی توگتیش کیرا‌دی.
شو بیلن بیرگه، ایران تشقی ایشلر وزیری، عباس عراقچی تهران و واشنگتن هستوی قورال موجود اېمسلیگینی کفالتله‌یدیگن عدالتلی و موازنتلی کېلیشووگه اېریشه آلیشینی تأکیدلب، بونده‌ی نتیجه هر ایکی تامان منفعتلریگه ماس کېلیشینی بیلدیرگن.
