طالبان‌نینگ کمسیتیشی؛ غزنی و کابلده‌گی هزاره‌لر و شیعه‌لر اویلرینی بۉشه‌تیشگه قرشی ناراضیلیک بیلدیرماقده
۸صبح، غزنی
غزنی مرکزیده‌گی نوآباد شهرچه‌سی و اساسا شیعه‌لر استقامت قیله‌دیگن کابل شهری‌نینگ آلتینچی حدویده‌گی امید سبز شهرچه‌سی اهالیسی طالبان‌نینگ عدلیه وزیرلیگی همده اوشبو گروه‌نینگ یېرلرنی تارتیب آلیش‌نینگ آلدینی آلیش و اولرنی قَیتریش کمیسیونیده‌گی مسؤوللر‌نینگ اۉزباشیمچه‌لیک و طرف‌کشلیک بیلن مناسبتده بۉله‌یاتگنیدن شکایت قیلماقده. اولر اوشبو کمیسیون‌نینگ قرارلریده حجت و دلیللر خالصانه بهالنمه‌یاتگنی همده معین قتلم و گروهگه اته‌یلب باسیم اۉتکزیله‌یاتگنینی تأکیدله‌ماقده. اوشبو شهرچه‌لر اهالیسی آدملر آره‌سیده قۉرقوو و واهمه محیطینی یره‌تیش همده اولردن پول اوندیریشگه اورینیشلر دوام اېته‌یاتگنینی اَیتماقده.
اوشبو اهالی ۸صبح گزېته‌سیگه بېرگن صحبتیده طالبان‌نینگ یېرلرنی تارتیب آلیش‌نینگ آلدینی آلیش و قَیتریش کمیسیونی اۉتگن ییللرده مملکت‌نینگ تورلی ولایتلریده کمیده ۱۵ ته شهرچه‌نی دولت ملکی دېب اعلان قیلگنیگه قره‌مه‌ی، سۉنگگی کونلرده فقط ایکّی شهرچه اهالیسیگه تورلی یۉللر بیلن روحی باسیم اۉتکزیله‌یاتگنی همده اولرگه ملکلرینی بۉشه‌تیش حقیده قَیته-قَیته آگاهلنتیریش بېریله‌یاتگنینی تصدیقله‌گن.
اوشبو شهرچه‌لر اهالیسی حجت و دلیللری خالصانه بهالنگن تقدیرده، بو ایکّی شهرچه‌ده‌گی برچه یېرلر حجت و شرعی قباله‌لرگه اېگه اېکنینی تأکیدله‌ماقده. اولر‌نینگ اَیتیشیچه، حاضرگی اهالی پول تۉله‌ش عوضیگه اۉزلری اوچون باش‌پناه قورگن یاکه اۉز شخصی مبلغلریدن میلیونلب افغانیلرنی ملک ساتیب آلیشگه صرفله‌گن.
غزنی نوآباد شهرچه‌سی اهالیسی اوشبو شهرچه بیلن بیر قطارده غزنیده ینه ایکّی شهرچه هم دولت ملکی دېب اعلان قیلینگنینی، بیراق ملکلرنی بۉشه‌تیش بویروغی فقط نوآباد شهرچه‌سیگه بېریلگنینی اَیتماقده.
غزنی مرکزیده‌گی نوآباد شهرچه‌سی اهالیسی طالبان‌نینگ مملکت اوستیدن قَیته حاکمیتنی اېگه‌لله‌گن دستلبکی کونلریدن باشلب خلق آلدیده‌گی مسأله‌لر و معمالردن بیری عیناً شو شهرچه‌لر و تورر جایلر بۉلگنینی تأکیدله‌ماقده. اولر‌نینگ اَیتیشیچه، طالبان‌نینگ عدلیه وزیرلیگی و یېرلرنی تارتیب آلیش‌نینگ آلدینی آلیش و قَیتریش کمیسیونی بو مسأله‌ده خلقنی قۉرقوو و امید آره‌سیده قالدیریب کېلماقده.
اوشبو شهرچه اهالیسیدن بیری خدا‌داد شونده‌ی دېیدی: «آدملر شخصی پوللری بیلن یېرلرنی اېگه‌لریدن ساتیب آلیب، اوی قورگن. بو یېرلر دولت‌دن اېمس، بلکه شخصی بۉلگن و قباله همده سالیق تۉله‌نگنینی تصدیقلاوچی حجتلرگه اېگه اېدی. آدملر نوآبادده ۳۰ ییلدن آرتیق وقتدن بېری یشه‌ب کېلماقده و حاضر دولت ملکی دېب اعلان قیلینه‌یاتگنی، مېنینگ فکریمچه، کمسیتیش، طرف‌کشلیک، اېتنیک حکمرانلیک و باسیم واسطه‌سی، نتیجه‌ده اېسه پول اوندیریش بیلن باغلیق.»
اونینگ اَیتیشیچه، اویلر و ملکلرنی بۉشه‌تیش اوچون مدت بېلگیلنگنیدن سۉنگ، وکیللر، آقسقاللر و علمالر قندهارگه باریب، قندهار والیسی بیلن اوچره‌شگن. طالبان رهبری‌نینگ یقینلریدن بیری حسابلنگن ملا شیرین اخوند اهالیگه اولر‌نینگ طلبینی طالبان رهبریگه یېتکزیشینی وعده قیلگن.
باشقه تاماندن، کابل‌نینگ غربی قِسمیده‌گی امید سبز شهرچه‌سی اهالیسی عدلیه وزیرلیگی، دولت یېرلرینی تارتیب آلیش‌نینگ آلدینی آلیش و قَیتریش کمیسیونی همده طالبان‌نینگ تارتیب آلینگن یېرلر ایشلرینی کۉریب چیقیش بۉییچه مخصوص محکمه‌سینی وکالتلرینی سوءاستعمال قیلیش و قبیله‌چیلیک اساسیده‌گی مناسبتده عیبله‌ماقده. اولر اوشبو اداره‌لر شهرچه یېرلریگه عاید قرارلرینی اعلان قیلیشده آچیق-آیدین بیر تمانلمه قرارلر چیقرگنینی تأکیدله‌ماقده.
اولر‌نینگ اَیتیشیچه، حجت و دلیللر طالبان‌نینگ یوقاریده قید اېتیلگن اداره‌لری کابل شهری‌نینگ ایکّی نقطه‌سیده‌گی ایکّی شهرچه‌‌نینگ کدستر اوچستکه‌سی مسأله‌سی بۉییچه بیر-بیریگه ضد ایکّی قرار چیقرگنینی کۉرسه‌ته‌دی. اولر پشتون تدبیرکارگه تېگیشلی بۉلگن سید جمال الدین شهرچه‌سیده‌گی ۱ مینگ ۲۰۰ جریب‌دن آرتیق یېر شخصی ملک دېب تاپیلگنینی، حال‌بوکه یگانه معماسی کدستر اوچستکه‌سی دېب کۉرسه‌تیلگن و هزاره تدبیرکار تامانیدن باشقریله‌دیگن امید سبز شهرچه‌سی‌نینگ یېری دولت ملکی دېب اعلان قیلینگنینی اَیتماقده. اولر‌نینگ فکریچه، بو یانده‌شوو طالبان‌نینگ «بیر تامگه ایکّی خیل هوا» سیاستینی کۉرسه‌ته‌دی.
امید سبز شهرچه‌سی اهالیسی حاجی محمدعلی شونده‌ی دېیدی: «شریعت و قانوننی تلقین قیلیش شخصی قره‌ش اساسیده بۉلمسلیگی کېره‌ک. بیرته حقوقی نزاعگه اېگه بۉلگن ایکّی یېرگه ایکّی خیل مناسبتده بۉلیش، بیر جایده شخصی، باشقه جایده اېسه دولت ملکی دېب حسابلشنی قبول قیلیب بۉلمه‌یدی. سید جمال الدین شهرچه‌سی یېرلری کدستر اوچستکه‌سی صفتیده تصدیقلنیب، کېین شخصی ملک دېب اعلان قیلینگن بۉلسه، امید سبز شهرچه‌سی یېری دولت ملکی دېب اته‌لیشی‌نینگ فرقی نیمه‌ده؟ خۉش، دېمک، بو یېرده همه نرسه انیق: فرق اهالیده و یشاوچیلرده؛ اولر قَیسی تیلده گپلشیشی و قَیسی دینگه اعتقاد قیلیشیده‌دیر.»
کابل‌نینگ غربی قِسمیده‌گی امید سبز شهرچه‌سی اهالیسیدن بیری اۉز شخصینی آشکار قیلمه‌گن حالده ۸صبح گزېته‌سیگه شونده‌ی دېیدی: «شبهه‌سیز، بو یېرده عدالت تأمینلنمه‌گن. بوتون مملکتنی قیدیرینگ؛ قانونی حجتلرگه، ترتیبلی و شهر ستندردلریگه ماس رېجه‌گه، جهازلنگن سوو، برق و کانالیزاسیون تیزیمیگه اېگه بۉلگن یگانه شهرچه عیناً امید سبز شهرچه‌سی دیر. اونینگ رېجه‌سی شهرسازلیک وزیرلیگی تامانیدن تصدیقلنگن، آدملر اۉز پوللری بیلن یېر ساتیب آلیب، مبلغلرینی اونگه صرفله‌گن. بیرار کیشی‌نینگ اۉز اویی و ملکینی بۉشه‌تیشی یاکه اویی و دوکانیدن اجاره آلیش حقوقیدن محروم بۉلیشی قَیسی جهتدن عدالت و شریعتگه موافق؟»
بو حالت طالبان جاری ییل باشلریده کابل‌نینگ غربی قِسمیده‌گی امید سبز شهرچه‌سیده ۱ مینگ ۵۰۰ جریب‌دن آرتیق یېر و غزنی مرکزیده‌گی نوآباد شهرچه‌سیده قریب ۲ مینگ جریب یېرنی دولت ملکی دېب اعلان قیلیب، اولر‌نینگ اهالیسیگه اۉز ملکلرینی بۉشه‌تیش حقیده بویروق بېرگن بیر پیتده یوز بېرماقده. شونگه قره‌مه‌ی، اوشبو شهرچه‌لر اهالیسی یېرلرینی پول عوضیگه ساتیب آلگنینی و هېچ قنده‌ی نرخده اۉز ملکلرینی ترک اېتمسلیگینی تأکیدله‌ماقده.
شو بیلن بیرگه، اوشبو ایکّی شهرچه‌‌نینگ بیر قنچه وکیللری علیحده سفرلر بیلن قندهار ولایتیگه باریب، اۉز ناراضیلیکلرینی طالبان رهبری‌نینگ اداره‌سیگه یېتکزگن.
