طالبان‌نینگ قۉلی و هیداوچیلرنینگ بۉش چۉنته‌گی؛ آغیر جریمه‌لر و کم درآمد
گندم
هراتده‌گی اَیریم تکسی و ریکشا هیداوچیلری یاقیلغی نرخی نینگ آشیشی، یۉلاوچیلر سانی‌نینگ کمه‌ییشی و اقتصادی تورغونلیکدن تشقری، تورلی تۉلاولر و جریمه‌لرنی هم طالبانگه تۉله‌شگه مجبور اېکنلیکلرینی اَیتماقده. اولرنینگ سۉزلریگه کۉره، طالبان هر بیر تکسی‌دن هر کونی مجبوری روشده ۳۰ افغانی آله‌دی و تورلی حالتلرده ریکشا هیداوچیلریگه هم آغیر جریمه‌لر ساله‌دی.
هراتده‌گی تکسی هیداوچیلری شهرده ۷ مینگ‌دن آرتیق تکسی فعالیت یوریته‌یاتگنینی و طالبان هر بیر موتردن هر کونی پول آله‌یاتگنینی دعوا قیلماقده. اولرنینگ ایتیشیچه، بو مبلغ تورلی ناملر بیلن هیداوچیلردن آلینه‌دی و اولر ایشنی دوام اېتتیریش همده عایله‌لری نینگ تورموش خرجتلرینی تأمینلش اوچون اونی تۉله‌شگه مجبور.
هراتده‌گی تکسی هیداوچیلریدن بیری شونده‌ی دېیدی: «سۉنگگی پیتلرده یاقیلغی نرخی آشدی، اما هیداوچیلرنینگ درآمدی کمه‌یدی. آدملر یوقاریراق یۉل حقینی تۉله‌شگه قادر اېمس و کۉپلب هیداوچیلر عایله‌لری نینگ خرجتلرینی زۉرغه قاپله‌یپتی. شونگه قره‌مه‌ی، بیز هر کونی ینه بیر مبلغ تۉله‌شگه مجبورمیز، بو اېسه اقتصادی باسیمنی ینه‌ده کوچه‌یتیره‌دی.»
شو بیلن بیرگه، اَیریم ریکشا هیداوچیلری طالبان تورلی بهانه‌لر بیلن، جمله‌دن ناتۉغری جایده تۉخته‌ش یاکه یۉل حرکتی قاعده‌لرینی بوزگنلیک عیبی بیلن اولرنینگ ریکشا‌لرینی آلیب کېتیشینی، سۉنگره اولرنی قَیتریب بېریش اوچون مینگ افغانی اوندیریشینی اَیتماقده.
بو هیداوچیلرنینگ سۉزلریگه کۉره، کۉپ حاللرده ریکشا‌لر آلدیندن آگاهلنتیریلمسدن آلیب کېتیله‌دی و ترانسپورت واسطه‌لری اېگه‌لری اولرنی قَیتریب آلیش اوچون جریمه تۉله‌شگه مجبور بۉله‌دی. اولر بو جریان شهر نینگ تورلی قِسملریده هر کونی دوام اېته‌یاتگنینی تأکیدله‌یدی.
هراتده‌گی ریکشا هیداوچیلریدن بیری شونده‌ی دېیدی: «عیاللرنینگ اشتراکی و حرکتلنیشیگه قۉییلگن چېکلاولر کوچه‌یگنیدن بېری بیزنینگ ایشیمیز هم ضرر کۉردی. ایلگری کۉپلب عیاللر و قیزلر کونده‌لیک قتناولر، خریدلر و شخصی ایشلر اوچون ریکشا‌لردن فایده‌لنردی، اما حاضر یۉلاوچیلر سانی کمه‌یگن. درآمدیمیز پسه‌یدی و بونده‌ی شرایطده ریکشانی قَیتریب آلیش اوچون مینگ افغانی تۉله‌ش جوده آغیر مبلغ حسابلنه‌دی.»
هرات نینگ اَیریم اهالیسی هم یاقیلغی نرخلری نینگ آشیشی، اقتصادی تورغونلیک و تکسی همده ریکشا هیداوچیلریدن پول آلینیشی فقرالر حیاتیگه بالواسطه تأثیر کۉرسه‌تگنینی اَیتماقده. اولرنینگ سۉزلریگه کۉره، کۉپلب هیداوچیلر اۉز خرجتلرینی قاپلش اوچون یۉل حقینی آشیریشگه مجبور بۉلماقده، بو اېسه آدملرگه قۉشیمچه باسیم یوکله‌یدی.
بو هیداوچیلر و هرات اهالیسی طالباندن تۉلاولر و جریمه‌لرنی ییغیش اصولینی قَیته کۉریب چیقیشنی همده اهالی نینگ آغیر اقتصادی شرایطینی انابتگه آلیشنی سۉره‌ماقده. اولر بو جریان نینگ دوام اېتیشی، یاقیلغی نرخلری نینگ آشیشی و ایش امکانیتلری نینگ کمه‌ییشی بیلن بیرگه، هراتده‌گی کۉپلب عایله‌لر نینگ تورموش معمالرینی ینه‌ده کوچه‌یتیریشینی تأکیدله‌ماقده.
بوندن آلدین باشقه اَیریم ولایتلرده‌گی منبعلر هم ۸صبح گزېته‌سیگه طالبان اولردن ناقانونی روشده پول آله‌یاتگنینی و تۉلاو قیلینمسه، فعالیت یوریتیشگه رخصت بېریلمسلیگینی تصدیقله‌گن اېدی.
بو خواطرلر طالبان ایچکی ایشلر وزیرلیگی مطبوعات کاتبی عبدالمتین قانع بوندن بویان «اۉنگ رول»لی یاکه افغانستان حرکت یۉنه‌لیشیگه ضد بۉلگن موترلرگه «رقم بېلگیسی» بېریلمسلیگینی ایتگن بیر پیتده بیلدیریلماقده. او کېچه ایکس صحیفه‌سیده آلدین کابلده اوشبو موتر اوچون بېریلگن وقتینچه‌لیک رقم بېلگیلری نینگ هم بېکار قیلینیشینی یازگن. اونینگ ایتیشیچه، موترلرنینگ رول تیزیمینی اۉزگرتیریش مسأله‌سی بیر نېچه اداره‌ده محاکمه قیلینماقده، اما حاضرگچه بیرار نتیجه‌گه اېریشیلمه‌گن.
