طالبان عالی اوقوو وزیرلیگی افغانستاندهگی تۉرت خصوصی بیلیم‌یورتی فعالیتینی تۉخته‌تدی
۸صبح، کابل: کابلده‌گی منبعلر معلوم قیلیشیچه، طالبان افغانستانده تۉرت خصوصی بیلیم‌یورتی نینگ فعالیتینی تۉخته‌تگن.
محلی منبعلر، ۱۰- عقرب، شنبه کونی، ۸صبح گزېته‌سیگه ایتیشیچه، اوشبو قرارگه قلم، استقامت، ابن‌سینا و دنیا بیلیم‌یورتلری کیرا‌دی.
خبر بېریلیشیچه، بو تۉرت بیلیم‌یورتی فعالیتی نینگ تۉخته‌تیلیشی حقیده‌گی فرمان طالبان نینگ عالی اوقوو وزیری، ندا محمد ندیم تامانیدن امضالنگن.
منبعلر نینگ سۉزلریگه کۉره، طالبان بو بیلیم‌یورتلرگه بیر ییل ایچیده اولر نینگ کۉرسه‌تگن مسأله‌لرینی حل اېتمسه، فعالیت رخصت‌نامه‌سینی بېکار قیلیش بیلن تهدید قیلگن.
منبعلر ایشانچ بیلدیریشیچه، اېتنیک و منطقوی عامللر هم بو قرارگه تأثیر کۉرسه‌تگن بۉلیشی ممکن، گرچه طالبان بو باره‌ده رسمی سببلرنی تۉلیق آچیقلمگن بۉلسه‌ده.
بو قرار طالبان نینگ افغانستاندهگی بیلیم‌یورتی و تعلیم مرکزلریگه کېتمه-کېت چېکلاولر قۉیه‌یاتگنی یانیده قبول قیلینگن.
آلدین، طالبان افغانستان بۉیلب بیلیم‌یورتلر نینگ اېشیکلرینی قیز طلبه‌لر اوچون یاپگن، شونینگدېک، طبیات انستیتوتلرینی هم قیزلر اوچون کېینگی فرمانگچه یاپیق حالده قالدیرگن اېدی.
