یونیسف افغانستان‌نینگ شمالی و شرقی حدودلریده ۲۷۰ مینگ باله قیش عرفه‌سیده اۉلیم خوفی آستیده اېکنلیگینی معلوم قیلدی
۸صبح، کابل: بیرلشگن ملت‌لر تشکیلاتی باله‌لرنی قۉللب-قوتلش صندیغی (یونیسف) افغانستان نینگ زلزله تأثیریگه اوچره‌گن حدودلریده‌گی ۲۷۰ مینگ باله نینگ ساووقدن کېله‌دیگن کسللیکلرگه جدی خوف آستیده اېکنلیگینی آگاهلنتیردی.
یونیسف، ۱۲- قوس، چهارشنبه کونی، بیاناتیده بیلدیریشیچه، افغانستان‌ده‌گی ویرانکار زلزله‌لردن اوچ آی اۉتگن بۉلسه‌ده، شمالی و شرقی ولایت‌لرده‌گی باله‌لر شاشیلینچ انسان‌پرورلیک یاردمی‌گه محتاج بۉلیب، قیش نینگ اۉلیمگه آلیب کېلووچی ساووقلریگه دوچ کېلماقده.
یونیسف نمایندهسی، تاج‌الدین اویوالی، قۉشیمچه قیلیشچه: «اوی-جای‌لری ضررلنگن باله‌لر نینگ سلامتلیگی و خوفسیزلیگیدن چوقور خواطرده‌من. کېچه‌سی حرارت اله‌قچان صفر درجه‌دن پست‌گه توشدی و منفی ۲۵ درجه‌گچه پسه‌ییشی ممکن.»
بیانات‌گه کۉره، تشکیلات عایله‌لرنی قۉللب-قوتلش مقصدیده قیشگی یاردم پاکتلری، باله‌لر اوچون ایلیق کییملر، یاقیلغی اوچون نقد پول، ساغلیقنی سقلش خدمتلری، سوو، آزیقلنتیریش، تعلیم و حمایه کۉمکلرینی تقدیم اېته‌دی.
یونیسف، همکارلر و دونرلرنی «درحال» حرکت قیلیشگه چقیریب، بیلدیریشیچه، شونده ضررلنگن باله‌لر نینگ حیاتینی سقلش اوچون مهم قیشکی یاردم اۉز وقتیده یېتکزیله‌دی.
تشکیلات آلدین، هوا ساووغیده باله‌لر یوقیملی کسللیکلریگه کۉپراق دچار بۉلیشینی هم تأکیدلگن اېدی.
