بیرلشگن ملتلر تشکیلاتی: قیتیب کېلگن افغان مهاجرلری کسبی تیارگرلیک آله‌دی
۸صبح، کابل: بیرلشگن ملتلر تشکیلاتی نینگ افغانستان بۉییچه قاچقینلر مسأله‌لری عالی کمیسارلیگی معلوم قیلیشیچه، فقط ۲۰۲۵- ییل نینگ اۉزیده ۲.۸ میلیوندن آرتیق افغان مملکت‌گه قیتگن.
مذکور تشکیلات، ۱۵- جدی، دوشنبه کونی، اعلان قیلگن گزارشیده، بو قیتیش تۉلقینی اساسا قۉشنی ایران و پاکستاندن افغانستانگه یۉنه‌لگنی، مملکت اېسه هنوز بې‌قرارلیک و سۉنگگی طبیعی آفتلر نینگ عاقبتلرینی باشدن کېچیره‌یاتگنینی قید اېتگن.
قاچقینلر مسأله‌لری عالی کمیسارلیگی گزارشیگه کۉره، قیتیب کېلووچیلر نینگ کۉپی باش‌پناه‌سیز، مناسب ایش اۉرنیسیز یاکه یېترلی جمغرمه‌سیز افغانستانگه قیتماقده و اۉز عایله‌لری نینگ احتیاجلرینی تأمینله‌ی آلمه‌یپتی.
شرقی افغانستاندهگی اوشبو وضعیتگه یېچیم تاپیش مقصدیده بیرلشگن ملتلر تشکیلاتی افغانستان مخصوص بودجه جمغرمه‌سی(STFA) مبلغی حسابیدن «برقرار یېچیملر» بۉییچه قۉشمه لایحه‌نی عملگه آشیرماقده.
UNDP رهبرلیگیده آلیب باریله‌یاتگن مذکور لایحه بیرلشگن ملتلر تشکیلاتی نینگ ینه سکیزته تشکیلاتینی بیرلشتیرگن بۉلیب، جماعه‌گه اساسلنگن رواجلنیش یاندشووی آرقه‌لی اساسی اساسی توزیلمنی مستحکملش، برقرار و هرتمانلمه تیریکچیلیک منبعلرینی یره‌تیش همده عیاللرنی قۉللب-قوتلشگه قره‌تیلگن.
لایحه نینگ اساسی فعالیتلریدن بیری، قیتیب کېلووچیلرگه تخنیکی و کسبی تعلیم بېریش بۉلیب، بو آرقه‌لی اولر کسبی کۉنیکمه‌لرنی اېگه‌للب، ایش بازاریگه کیریب باره‌دی.
اوشبو تعلیملر موبایل لرنی ترمیملش، قویاش انرژیسی تیزیملرینی اۉرنه‌تیش و ترمیملش همده درآمد کېلتیرووچی باشقه کۉنیکمه‌لرنی اۉز ایچیگه آله‌دی؛ کورس یکونیده اېسه تینگلاوچیلر اۉز بیزنسینی باشلش اوچون ضرور اسبا-اسکونه‌لر بیلن تأمینلنه‌دی.
مذکور لایحه، بیرلشگن ملتلر تشکیلاتی نینگ همکارلیکده‌گی فعالیتیگه مثال بۉلیب، اهالی نینگ احتیاجلریگه یۉنه‌لتیریلگن حالده و ایشلر نینگ تکرارلنیشی نینگ آلدینی آلیش آرقه‌لی قیتیب کېلووچیلرگه برقرار حیات همده ایش بازاریده اۉزینی اۉزی تأمینلش امکانینی بېرماقده.
