بیرلشگن ملتلر تشکیلاتی: ننگرهارده‌گی مینگلب عایله‌لر اساسی احتیاجلرینی تأمینلشده معمالرگه دوچ کېلماقده
۸صبح، کابل: خلق‌ارا مهاجرت تشکیلاتی (IOM) ننگرهار ولایتی‌نینگ خوگیانی اولسواللیگیده پاکستاندن قَیتگن و افغانستان ایچیده کۉچیریلگن مینگلب ضعیف عایله‌لر حیات‌نینگ اساسی احتیاجلرینی تأمینلشده معمالرگه دوچ کېله‌یاتگنینی معلوم قیلدی.
اوشبو تشکیلات چهارشنبه کونی، ۲۸ اسد، خبر بېریشیچه، بو عایله‌لر‌نینگ کۉپچیلیگی طبیعی آفتلر و اقتصادی معمالردن سۉنگ خوفسیزلیک و برقرارلیک ایزلب خوگیانی اولسواللیگیگه جایلشگن.
حساباتگه کۉره، ایش امکانیتلری‌نینگ چېکلنگنی، قشّاقلیک، کۉچیریلگنلیک و اساسی خدمتلردن فایده‌لنیش امکانیتی‌نینگ چېکلنگنی کۉپلب عایله‌لر‌نینگ حیاتینی قیینلشتیرگن.
تشکیلات قۉشیمچه قیلیشیچه، بو عایله‌لر آزیق-آوقت، باش‌پناه، طبی یاردم و فرزندلری‌نینگ باشقه اساسی احتیاجلرینی تأمینلشده قیینچیلیکلرگه دوچ کېلماقده.
بیرلشگن ملتلر تشکیلاتی اوشبو حدودده‌گی اجتماعی مرکز بو عایله‌لرگه خدمت کۉرسه‌تیش جاییگه ایلنگنینی و هر کونی یوزلب کیشی تورلی یاردملرنی آلیش اوچون مراجعت قیلیشینی بیلدیرگن.
اوشبو مرکز‌نینگ عیاللر اوچون مخصوص بۉلیمیده روحی-اجتماعی یاردم خدمتلری، کسبی کۉنیکمه‌لر بۉییچه تعلیم و اجتماعی فعالیتلر تقدیم اېتیله‌دی همده عیاللر ضرورت توغیلگنده اختصاص‌لشگن خدمتلرگه یۉنه‌لتیریله‌دی.
