قندهارده واکسیناتورلر ایکّی آیدن بېری معاشلری‌نینگ تۉله‌نمه‌یاتگنیدن شکایت قیلماقده
۸صبح، قندهار: محلی منبعلر‌نینگ اَیتیشیچه، قندهار ولایتیده‌گی واکسیناتورلر‌نینگ معاشلری سۉنگگی ایکّی آیدن بېری تۉله‌نمه‌گن و بو خادملر اقتصادی معمالرگه دوچ کېلماقده.
منبعلر شنبه کونی، ۱۴-سنبله کونی، ۸صبح گزېته‌سیگه بېرگن صحبتیده واکسیناتورلر‌نینگ آیلیک معاشلری کم اېکنینی، شونگه قره‌مه‌ی، اولر‌نینگ سۉنگگی ایکّی آیلیک معاشلری هم تۉله‌نمه‌گنینی اَیتیشدی.
واکسیناتورلردن بیری یوقاری لوازملرده مسؤولیتگه اېگه بۉلگن شخصلر ایکّی مینگ‌دن ایکّی مینگ ۵۰۰ دالرگچه معاش آلیشی و معاشلری اۉز وقتیده تۉله‌نیشینی، واکسیناتورلر‌نینگ معاشی اېسه اوچ مینگ‌دن بېش مینگ افغانیگچه اېکنینی اَیتدی.
منبعلر قۉشیمچه قیلیشیچه، واکسیناتورلر یشه‌ش خرجتلرینی عیناً شو معاش حسابیدن قاپله‌یدی، بیراق اونینگ تۉله‌نیشی تۉخته‌تیلگنی سببلی اولر‌نینگ اقتصادی احوالی نهایتده آغیرلشگن.
اوشبو واکسیناتورلر، شونینگدېک، طالباننی ایش جریانیگه اره‌لشیش و اۉز قرینداشلرینی واکسین کمپنیلریگه ایشگه جایلشتیریشده عیبله‌ماقده.
اولر‌نینگ اَیتیشیچه، معاش یاکه باشقه حقوقلری تۉله‌نمه‌یاتگنیگه ناراضیلیک بیلدیرسه‌لر، ایشدن بۉشه‌تیله‌دی و اولر‌نینگ اۉرنیگه طالبانگه یقین بۉلگن شخصلر تعیینلنه‌دی.
منبعلر قۉشیمچه قیلیشیچه، اوشبو دستور‌نینگ مالیوی خرجتلری جهان ساغلیقنی سقلش تشکیلاتی و یونیسف تامانیدن تأمینلنه‌دی، بیراق طالبان اونینگ تخنیکی ایشلری و عملگه آشیریلیشینی نظارت قیله‌دی.
