اروپا اتفاقی ایران نینگ اسراییل گه هجومینی قاره له‌دی
اروپا اتفاقی ایران نینگ اسراییل گه پهپادی و راکته هجوملرینی قاره له‌گن.
اروپا اتفاقی نینگ تشقی سیاست ایشلری بوییچه مسوولی جوزپ بورل، ۱۳اپریل، شنبه کیچه ایکس صحیفه‌سیده ایران نینگ اسراییل گه هجومینی «قبول قیلینمس» دیب و اونی قتیق طرزده قاره له‌گن.
بو هجوم منطقه ده کېکسین‌لیک‌لر آشیشی گه سبب بولیب و منطقه خوفسیزلیگینی تهدید قیلیشیدن آگاه‌لنتیرگن، جوزپ بورل.
عین‌حالده، فرانسه و ایتالیا تشقی ایشلر وزیرلری بو هجوم گه مناسبت بیلدیرگنلر.
فرانسه تشقی ایشلر وزیری استفان سژورنه ایکس صحیفه‌سیده ایران نینگ اسراییل گه هجومینی مثل‌سیز دیب و اونی قتیق قاره له‌گن.
او مملکتی اسراییل نی قۉللب-قوتلشنی بیلدیریش گه قوشیمچه، ایران مثل‌سیز ینگی اقدام گه قول اۉریب و حربی کېسکین‌لیک‌لر گه» سبب بولیشیدن آگاه‌لنتیرگن.
ایتالیان تشقی ایشلر وزیری آنتونیو تاجانی، ایکس صحیفه‌سیده مملکتی ایران نینگ اسراییل گه هجومینی دقت بیلن اېزلب و هر قنده‌ی سناریو گه تیارلیگینی بیلدیرگن.
بوندن آلدین بریتانیا باش وزیری ریشی سوناک، ایران نینگ اسراییل گه هجومینی قاره‌لب و مملکتی نینگ اسراییل و منطقه ده‌گی باشقه شریک‌لری جمله دن اردن و عراق نی قۉللب-قوتلشینی معلوم قیلگن.
ایتیش کېره‌ک که ایران نیچه ساعت آلدین اسراییل گه پهپادی و راکته هجوملرینی باشله‌دی و ایران اوشبو هجومده قریب ۱۰۰ پهپاد دن قوللنگن. بو هجوم ایکّی هفته آلدین اسراییل نینگ سوریه پایتختی دمشق ده ایران قنسولگرلیگی گه هجوم گه جواب اۉیوشتیریلگن.
