چېگره‌لر آره‌سیده؛ کېم بیزدن گپیره‌دی؟
مرسل قیصاری
اوی هر دایم هم بیر جای اېمس. بعضا او بیر آواز دیر، بعضا بیر قوچاق، بعضا بیر آنه، و بعضا فقط هر کېچه آنگده تکرارلنه‌دیگن بیر خاطره. مېن بونینگ معناسینی اویگه قَیتیش مېن اوچون آرزوگه ایلنگنده انگله‌دیم؛ مصافه قیسقه یۉلدن بلند دیوارگه ایلنگنده، چېگره‌لر یاپیلگنده و اویگه باریش امکانسیز بۉلیب قالگنده. عینا اۉتگن ییل شو پیتده مېن هیجانگه تۉله اېدیم؛ یازگی تعطیللر کېلیشینی کونلب سنه‌ب، ینه اویگه قَیتیشنی کوتردیم. اما بو ییل باشقه‌چه. تعطیل عرفه‌سیده تورگن بۉلسم-ده، سۉنگّی آیلرده صادر بۉلگن واقعه‌لرنی حسابگه آلسه‌ک، بو سفر اویگه باره آلیشیمگه ایشانمیمن.
تورخم یۉلی سیاسی کېلیشماوچیلیکلر سببلی آیلردن بېری یاپیق، اما بو چېگره‌لر آرتیده مینگلب آدملر اۉز عایله‌لرینی ساغینماقده. اوشبو یاپیق چېگره آرتیده، مرسل و اونگه اۉخشه‌گن مینگلب انسانلر اویگه قَیتیشنی جوده ایسته‌یدی. اېندی بیر ییل اۉتدی؛ آنه‌منی آخرگی بار قوچاقله‌گنیمگه بیر ییل، عایله‌م دوره‌سیده بۉلگنیمگه بیر ییل، آپه-سینگیللریم یانیده اۉتیرگنیمگه بیر ییل بۉلدی. اېندی اېسه اوی فقط بیر جای اېمس؛ اوی بو آنگیمده یشه‌یدیگن نرسه‌دیر.
مېن خوفسیز، لېکن بېگانه بۉلگن جایده یشه‌یمن. بو یېرده اۉقیشیم، تعلیم آلیشیم، آرزولریم اوچون کوره‌شیشیم و اۉزیمگه کېله‌جک قوریشیم ممکن، اما هر اۉتگن کون ایچیمده نیمه‌دیر سۉنیب بارماقده؛ اونی هېچ کیم کۉرمه‌یدی.
هر کونی ینگیلیکلر کېسکینلیکلر حقیده گپیره‌دی؛ سیاست، چېگره‌لر، افغانستان، پاکستان و یقین شرق حقیده. اما کیم بیز حقیمیزده گپیره‌دی؟ بو سیاستلر آره‌سیده یۉقالیب قالگن قیزلر حقیده؛ حیاتی عینا شو چېگره‌لرگه باغلیق بۉلگنلر حقیده.
«تورخم یۉلی یاپیق.» بو جمله عادی تویولیشی ممکن، اما مېن اوچون بو اېشیته‌دیگن اېنگ آغیر جمله‌دیر. بو چېگره آرتیده مېنینگ عایله‌م بار؛ آنه‌م، آپه-سینگیللریم، اوکه‌م و هر کونی مېنی کوته‌یاتگن آته‌م. بو جمله شونی انگله‌ته‌دی که احتمال بو اَیریلیق قیسقه مدتلی اېمس.
اما مېن هلی هم امید قیله‌من. اۉقیمن، رېجه قیله‌من و موفقیتیم اوچون حرکت قیله‌من. مېن دوام اېته‌من؛ اۉزیم تنله‌مه‌گن یۉلده بۉلسم هم، اونده کوچلی بۉلیشگه قرار قیلگنمن. هېچ بیر مهاجر اویینی خورسندچیلیک بیلن ترک اېتمه‌یدی. مېن اوییمنی آرزولریم اوچون ترک اېتدیم؛ اېرکینلیک، تعلیم آلیش و مستقل بۉلیش آرزوسی اوچون. اما بو آرزولرنینگ هم آغیر بهاسی بار؛ سکوتده اۉته‌دیگن تونلر و کۉرینمه‌یدیگن کۉز یاشلر.
اطرافیمده‌گیلر مېنی دایما کوچلی دېب اتشه‌دی، اما کوچلی بۉلیش بو آغریقنی حس قیلمسلیک یاکه ساغینمسلیک دېگنی اېمس. بو آغریقنی قلبینگ‌نینگ اېنگ چوقور جاییگچه حس قیلیب، بَری-بیر تۉخته‌مسلیک دېمک دیر.
بو حکایه فقط مېن حقیمده اېمس؛ بو اویینی ترک اېتگن یوزلب قیزلر حقیده. چېگره‌لر آرتیده قالیب کېتگن قیزلر حقیده. اولرگه شونی ایته‌من: عزیز مهاجر، اگر ساغینچنی حس قیلسنگ بو طبیعی؛ اگر مهربان آنه‌نینگ آوازی و گۉزل اویینگنی ساغینسنگ بو طبیعی. اما سېن یالغیز اېمسسن. بو آغریق بیز، افغانستان قیزلری‌نینگ عمومی دردی دیر؛ اېنگ عادی تعلیم حقوقی اوچون اویینی و وطنینی ترک اېتگن قیزلرنینگ دردی.
اما هېچ قنده‌ی مصافه ابدی اېمس. بلکه بوگون چېگره‌لر یاپیق دیر، بلکه بو ییل اویگه قَیتالمسمیز، بلکه بو اَیریلیق بیرآز چۉزیلر. اما مېن ایشانه‌من بیز اویگه قَیته‌میز. بیر کون بو کوتیش یکونیگه یېته‌دی. اۉشه کونگچه بیز دوام اېته‌میز. بو آغریق یۉلیمیزنینگ آخری اېمس؛ بو بیزنی ینه‌ده کوچلی قیله‌دیگن یۉل‌نینگ بیر قِسمی دیر.
