طالبانلر حکمرانلیگی‌نینگ بېش ییللیگی؛ بیرلشگن ملتلر افغانستانده عیاللر حقوقلری بحرانی کوچه‌یگنیدن خبر بېردی
۸صبح، کابل: بیرلشگن ملتلر تشکیلاتی‌نینگ عیاللر بۉلیمی (UN Women) افغانستانده عیاللر حقوقلری بحرانی‌نینگ کوچه‌ییشیدن خواطر بیلدیریب، افغانستان عیاللری‌نینگ یریمی آییگه اتیگی بیر یاکه ایکّی مرته اویدن تشقریگه چیقیشینی و طالبان چېکلاولری اولر‌نینگ اېرکین حرکتلنیش امکانیتینی کمه‌یتیرگنینی اَیتدی.
اوشبو تشکیلات چهارشنبه کونی، ۲۱ اسد، ترقه‌تگن بیاناتیده، طالبان حکمرانلیگی‌نینگ بېشینچی ییلیده افغانستان هنوز دنیاده‌گی قیزلر اۉرته تعلیمدن، عیاللر اېسه بیلیم یورتلرده تعلیم آلیشدن محروم بۉلگن یگانه مملکت اېکنینی اَیتدی.
بیرلشگن ملتلر تشکیلاتی‌نینگ عیاللر بۉلیمی بیاناتیده شونده‌ی دېیله‌دی: «طالبان ۲۰۲۱-ییل اگوستیده حاکمیتنی اېگه‌لله‌گنیدن بېش ییل اۉتیب، افغانستان اهالیسی‌نینگ یریمی‌نینگ حقوقلرینی تیزیملی روشده یۉققه چیقردی و بوگونگی دنیاده مثلی کۉریلمه‌گن نمونه‌گه ایلندی.»
اوشبو تشکیلات قۉشیمچه قیلیشیچه، طالبان رسمیلری بو گروه حاکمیتگه کېلگنیدن بېری عیاللر و قیزلرگه قرشی ۱۰۰ دن آرتیق فرمان چیقرگن.
بمت‌نینگ اوشبو تشکیلاتی معلوماتیگه کۉره، طالبان کمسیتیشنی تیزیملی‌لشتیریب، دنیاده‌گی عیاللر حقوقلری بیلن باغلیق اېنگ آغیر انقراضنی ینه‌ده چوقورلشتیرگن.
اوشبو تشکیلات اۉتکزگن سۉراو نتیجه‌لریگه کۉره، عیاللر‌نینگ یریمیدن کۉپی آییگه ایکّی مرته یاکه اوندن کمراق اویدن تشقریگه چیقیشینی اَیتگن.
عیاللر‌نینگ قریب تۉرت‌دن اوچ قسمی هم اویدن محرم همراهلیگیسیز چیققنلریده اۉزلرینی خوفسیز حس قیلمسلیکلرینی بیلدیرگن.
اوشبو تشکیلات‌نینگ اَیتیشیچه، بو چېکلاولر عیاللر آره‌سیده روحی سلامتلیک بحرانی‌نینگ کوچه‌ییشیگه هم آلیب کېلگن.
هر ۱۰ عیالدن یېتّیته‌سی اۉز روحی سلامتلیگی حالتینی «یامان» یاکه «جوده یامان» دېب تعریفله‌گن و انزوا، امکانیتلر‌نینگ یۉقالیشی همده قۉللب-قوّتلش ترماقلریدن فایده‌لنیش امکانیتی‌نینگ چېکلنگنینی بونگه سبب صفتیده کۉرسه‌تگن.
