مملکت نینگ بیش ولایتیده سوو تاشقینی؛ اولگنلر سانی قریب ۲۴۰ کیشی گه یېتدی
۸صبح، کابل: بغلان، تخار، بدخشان، هرات و غور ولایت‌لریده محلی منبعلر نینگ ایتیشلریچه، اوشبو ولایت‌لرده سوو تاشقینلری عاقبتیده قربان بولگنلر رقمی حاضرگچه ۲۳۹ کیشی یېتگن.
بغلان ده‌گی محلی منبعلر ۲۲ ثور، شنبه کونی ۸صبح کونده‌لیگی گه ایتیشلریچه، بغلان مرکزی و برکه تومنلریده اۉتگن کونگی سوو تاشقینلری عاقبتیده حاضرگچه ۲۱۰ کیشی نینگ قربان بولگن‌لیگی تصدیقلنگن.
برکه تومنیده محلی بویوک‌لردن بیری محمدنسیم گه کوره، اوشبو سوو تاشقینلری عاقبتیده مذکور ولایت نینگ «فلول» منطقه‌سی و باشقه نیچه قیشلاغیده ایکّی مینگدن آرتیق یشش اوی بوزیلگن.
اونینگ ایتیشیچه، «فلول» منطقه‌سیده بیر قنچه عایله‌لر اۉتگن کونگی سوو تاشقینلریده سکیز دن ۱۲ عایله اعضالرینی قولدن بیرگنلر.
اونینگ کوپه‌یتیریشیچه، اوشبو طبیعی آفت‌لر طفیلی کوپ سانده قربان بولگنلر نینگ جسدی تاپیلمه‌گن و تلفات رقمی آشیش احتمالی موجود دیر.
عین‌حالده، بغلان مرکزی مردمی شورا باشلیغی مفتی نصیراحمد، اوشبو ولایت نینگ ولایتی کسلخانه‌سیگه حاضرگچه قریب ۱۰۰ جسد انتقال بیریلگنینی معلوم قیلگن.
باشقه تاماندن، بدخشانده‌گی محلی منبعلر نینگ ۸صبح کونده‌لیگیگه ایتیشلریچه، بو ولایت نینگ تیشکان تومنیده اۉتگن کونگی سوو تاشقینی عاقبتیده چمه‌سی بیش کیشی قربان بولگنلر.
شونینگدیک قریب ۲۰۰ یشش اوی، ۵۰ کوپریک و پلچک، ۳۰ سوو توغانی، ۵ دینی مدرسه نینگ بناسی بوزیلیب و محل یشاوچیلری نینگ ایکّی مینگدن آرتیق چاروالری تلف بولگن.
باشقه تاماندن تخار ده طالبان محلی مسئوللری، مذکور ولایت نینگ نمک‌آب، فرخار، اشکمش، چال و کلفگان تومنلریده دهشتلی سوو تاشقینلری عاقبتیده ۲۰ کیشی قربان بولگنلرینی اېتگنلر.
تخار ده طالبان طبیعی آفت‌لرنی باشقریش ایشلری بوییچه باشلیغی احمدسیر ساجد گه کوره، ۲۱ ثور، جمعه دن شنبه گه اۉتر کیچه یوز بیرگن سوو تاشقینلری عاقبتیده چال، فرخار، اشکمش، نمک‌آب و کلفگان تومنلریده اونلب یشش اوی و یوزلب ایکینچیلیک ییر بوزیلگن.
بونگه قوشیمچه هرات ده طالبان امنیه قوماندان‌لیگی نینگ مطبوعات دفتری ۲۲ ثور شنبه کونی بیر بیانیه ترقه‌تیب، بو ولایت نینگ کشک کهنه تومنیده سوو تاشقینی ییتّی یاشر بیر باله شامل بیر عایله نینگ اوچ اعضاسی اۉلیمی گه ضامن بولگن.
غور ولایتی تیوره تومنی «شاه‌بیدک» قیشلاغیده اۉتگن کون عصر پیتی یوز بیرگن سوو تاشقینیده ۷۳ یاشر بیر کیشی جان بیرگن.
ایتیش کېره‌ک که اۉتگن کوندن بویان مملکت نینگ کوپ سانده ولایت‌لری کوچلی یامغیر و دهشتلی سوو تاشقینی گواهی بولگن.
