هبت‌الله‌نینگ ینگی حُکمی؛ سلّه و دوپّی کیمه‌یدیگن خادملر ایشدن بۉشه‌تیله‌دی
امین کاوه
۸صبح گزېته‌سیگه یېتیب کېلگن طالبان رهبری هبت‌الله آخوندزاده‌‌نینگ حکمی نسخه‌سی‌گه کۉره، بو گروه نظارتی آستیده‌گی برچه دولت خدمتچیلری سقال قۉییش، سلّه و دوپّی کییشگه مجبور قیلینگن. اوشبو حکمگه کۉره، بو بویروققه بۉیسونمه‌گن خادملر معاشینی تۉخته‌تیش، لوازمیدن چېتله‌تیش، لوازم درجه‌سینی پسه‌یتیریش و نهایت ایشدن بۉشه‌تیش کبی جزالرگه دوچ کېله‌دی. شونینگدېک، بو بویروققه کۉره، برچه خادملر نمازلرینی جماعت بیلن اۉقیشلری و طالبان‌نینگ امر باالمعروف و نهی عن المنکر محتسبلری‌نینگ درسلریده قتنه‌شیشلری شرط. طالبان رهبری‌نینگ اَیتیشیچه، بو گروه‌نینگ امر باالمعروف و نهی عن المنکر قانونی تۉغری تطبیق اېتیلمه‌گن و شو سببلی اونی عملگه آشیریش اوچون ینه آلتی مادّه‌دن عبارت حکم چیقرگن. اوشبو حکمده وطنداشلر‌نینگ، خصوصاً، شیعه‌لر‌نینگ دینی اېرکینلیگی اعتباردن چېتده قالدیریلگن و برچه خادملر اهل‌سنت و جماعت تعلیماتلری اساسیده‌گی دینی درسلرده قتنه‌شیشگه مجبور قیلینگن. شونینگدېک، طالبان‌نینگ افغانستاندن تشقریده‌گی سیاسی وکالت‌خانه‌لری و اېلچیخانه‌لریده ایشله‌یدیگن خادملر هم اوشبو بویروقلرگه رعایه قیلیشگه مجبور اېتیلگن.
طالبان رهبری بو گروه‌نینگ امر باالمعروف و نهی عن المنکر وزیرلیگی حساباتینی اېشیتگنیدن سۉنگ چیقرگن ینگی مکتوبیده امر باالمعروف و نهی عن المنکر قانونی‌نینگ تۉغری عملگه آشیریلمه‌یاتگنی حقیده شکایتلر موجودلیگی اَیتیلگن.
مکتوبده اوشبو گروه‌نینگ دولت ایشلری اداره‌سی تامانیدن یوباریلگن طالبان‌نینگ امر باالمعروف و نهی عن المنکر قانونینی عملگه آشیریش حقیدگی حساباتیده نقصان و کمچیلیکلر موجود اېکنی و شو اساسده اونی عملگه آشیریش اوچون ینگی بویروقلر چیقریلگنی اَیتیلگن.
هبت‌الله‌نینگ اوشبو حکمی آلتی مادّه‌دن عبارت بۉلیب، اونده اونینگ بویروقلرینی مجبوری روشده عملگه آشیریشگه اورغو بېریلگن و قاعده‌بوزرلر جزالنیشی حقیده آگاهلنتیریلگن. اوشبو حکم پشتو تیلیده چیقریلگن بۉلیب، اونینگ بیرینچی مادّه‌سیده شونده‌ی دېیله‌دی: «خُلقی یاکه تشقی کۉرینیشی شریعتگه ضد بۉلگن هر قنده‌ی خادمگه نسبتاً ۱۵/۵/۱۴۴۶ هجری-قمری سنه‌سیده‌گی ۳۵۴-سانلی حکمگه موافق، تعیینلنگن هیات تامانیدن تېگیشلی تعزیر جزاسی، جمله‌دن، معاشنی تۉخته‌تیش، وظیفه‌سیدن چېتله‌تیش، لوازم درجه‌سینی پسه‌یتیریش و وظیفه‌سیدن بۉشه‌تیش قۉللنیلسین.»
اوشبو حکم‌نینگ ایکّینچی مادّه‌سیده طالبان حکمرانلیگی آستیده‌گی دولت خادملری نماز اۉقیشگه مجبور قیلینگن و اولرگه نماز حقیده تعلیم بېریش بویوریلگن. شونینگدېک، دینی اېرکینلیک، خصوصاً، شیعه‌لر‌نینگ دینی اېرکینلیگی حسابگه آلینمه‌گن حالده، برچه خادملرگه اهل سنت و جماعت عقیده‌سینی دایمی روشده اۉقیتیش بویوریلگن.
مکتوبده شونده‌ی دېیله‌دی: «نمازنی ادا اېتیش فرمانیگه موافق، برچه خادملرگه نماز حقیده ضرور تعلیم بېریلسین. شونینگدېک، «اهل سنت و جماعت عقیده‌سی» کتابی و «اطاعت‌نینگ شرعی تیزیمنی مستحکملشده‌گی تأثیری» رساله‌سی منتظم روشده اۉقیتیلسین.»
اوشبو حکمده هبت‌الله آخوندزاده ینه بیر بار خادملر‌نینگ سقالی و ساچی اوزونلیگیگه رعایه قیلیشگه اورغو بېریب، اولر‌نینگ سقالی بیر قبضه‌دن قیسقه بۉلمسلیگی کېره‌کلیگینی اَیتگن. او بو بویروققه بۉیسونمه‌گن خادملر جزالنیشیدن آگاهلنتیرگن.
حکم متنیده شونده‌ی دېیله‌دی: «برچه خادملر‌نینگ سقالی و ساچی شریعتگه موافق بۉلیشی کېره‌ک. سقالینی بیر قبضه‌دن قیسقه قیلگنلر بیرینچی بندده ذکر اېتیلگن ترتیبگه موافق تعزیر جزاسی بیلن جزالنسین.»
اوشبو حکمده طالبان رهبری خادملر اوچون تاقّی کییش و سلّه اۉره‌شنی هم مجبوری دېب اته‌ب، شونده‌ی دېگن: «برچه خادملر باشیگه تاقّی کییشی و نماز ادا اېتیش وقتیده سلّه اۉره‌شگه رعایه قیلیشی شرط.»
طالبان رهبری‌نینگ حکمیگه کۉره، بو گروه نظارتی آستیده‌گی برچه دولت خادملری نمازلرینی جماعت بیلن ادا اېتیشگه مجبور قیلینگن و اونینگ اَیتیشیچه، بو بویروققه بۉیسونمه‌گنلر تعزیر جزاسی بیلن جزالنه‌دی.
اوشبو حکم‌نینگ بېشینچی مادّه‌سیده شونده‌ی دېیله‌دی: «برچه خادملر جماعت نمازینی ادا اېتیشگه مجبور قیلینسین. بو بویروققه بۉیسونمه‌گنلر بیرینچی بندده ذکر اېتیلگن ترتیبگه موافق تعزیر جزاسی بیلن جزالنسین.»
شونینگدېک، طالبان رهبری بو گروه‌نینگ تشقی ایشلر وزیرلیگینی اوشبو بویروقلرنی طالبان‌نینگ افغانستاندن تشقریده‌گی برچه سیاسی وکالت‌خانه‌لری و اېلچیخانه‌لریده هم عملگه آشیریشگه مجبور قیلگن. اوشبو حکمگه کۉره، افغانستان ایچیده‌گی دولت خادملری اوچون چیقریلگن بویروقلر خارجده‌گی طالبان وکالت‌خانه‌لری خادملری و اعضالریگه هم تعلقلی دیر.
اوشبو حکم‌نینگ آلتینچی مادّه‌سیده شونده‌ی دېیله‌دی: «تشقی ایشلر وزیرلیگی اسلام امیرلیگی‌نینگ خارجده‌گی وکالت‌خانه‌لری و اېلچیخانه‌لرینی یوقاریده‌گی بویروقلرنی بجریشگه مجبور قیلیشی شرط.»
بو حالت طالبان نظارتی آستیده‌گی دولت خادملری اوشبو گروه‌نینگ تاباره کوچه‌ییب باره‌یاتگن باسیمیدن جدّی خواطر بیلدیره‌یاتگن بیر پیتده یوز بېرماقده. اولر‌نینگ اَیتیشیچه، قشّاقلیک و ایشسیزلیک سببلی طالبان باسیملریگه چیده‌شگه مجبور بۉلماقده‌لر و هر کونی بو گروه تامانیدن تورلی شکللرده حقارت و تحقیرلرگه دوچ کېلماقده‌لر. اولر‌نینگ تأکیدلشیچه، طالبان آدملر‌نینگ متخصصلیگی، قابلیتی و ایشنی بیلیشیگه اېمس، اوّلا تیلیگه، کېین اېسه سقالی و دوپّی‌یگه اعتبار بېره‌دی و شونگه قره‌ب مناسبتده بۉله‌دی.
