بوگتی: قانونی حجتلری بۉلگن مهاجرلرنی چیقارمه‌یمیز
۸صبح، کابل: پاکستان پولیسی تامانیدن قانونی حجتلری بۉلگن مهاجرلرنی چقیارییش حقیده‌گی خبرلر اعلان قیلینگنیدن سۉنگ، بو مملکت ایچکی ایشلر وزیری سرپرستی سرفراز بوگتی مهاجرت کارتی بۉلگن افغان مهاجرلرینی چیقارمسلیکلرینی ایتدی.
بوگتی بو بیاناتلرنی ۱۲-نوامبر، دوشنبه کونی پاکستان سنا مجلسیده ایتدی.
اونینگ سۉزلریگه کۉره، حاضرگچه افغانستاندن ۳۰۰ مینگگه یقین ناقانونی مهاجر پاکستاندن اۉز یورتیگه قَیتگن و اولردن اتیگی ۸مینگ نفری پاکستان حکومتی تامانیدن جبری چیقاریلگن.
بیراق طالبان نینگ کرا‌چیده‌گی باش کانسولی عبدالجبار تخاری نینگ ایتیشیچه، پاکستان نینگ سند ولایتی پولیسی مهاجرلرنی حجتلر بیلن حبسگه آله‌دی و پول عوضیگه قۉییب یوباره‌دی.
طالبان نینگ کرا‌چیده‌گی کانسوللیگی سه‌شنبه کونی، ۲۳ عقرب بېرگن بیاناتیده، پاکستان فدرا‌ل و ایالت رسمیلری حجتی بار مهاجرلر تعقیب قیلینمسلیگینی اعلان قیلگن بۉلسه-ده، اولرنینگ حبسگه آلینیشی و پول عوضیگه قۉییب یوباریلگنی حقیده خبرلر بارلیگینی یازدی.
اکتوبر آیی باشیده پاکستان مؤقت حکومتی اکثریتی افغانستان فقرالری بۉلگن ناقانونی خارجلیکلر ۳۱- اکتوبرگه قدَر مملکتنی اختیاری روشده ترک اېتیشلری کېره‌کلیگینی، عکس حالده پولیس اولرنی حبسگه آلیب، نوامبر آیی باشیده اۉز مملکتلریگه قَیتریشینی اعلان قیلدی.
بیرلشگن ملتلر تشکیلاتی و انسان حقوقلری تشکیلاتلری پاکستان قرارینی قَیته کۉریب چیقیش و مهاجرلرنی جبری چیقاریش جریانینی تۉخته‌تیشنی طلب قیلگن بۉلسه-ده، بو دولت نینگ مؤقت حکومتی بو طلبلرگه جواب بېرمه‌دی.
