جۉیا: طالبان حکمرانلیگی آستیده‌گی عیاللر اته‌یلب تعقیب و اذیت‌گه دوچ کېلماقده
۸صبح، کابل: ژورنالیست و رخشانه مېدیا اساسچیسی زهرا جۉیا بریتانیا پارلمانیده اوروش و ماجرالر بیلن باغلیق جنسی زۉرآورلیک موضوعسیده اۉتکزیلگن ییغیلیشده طالبان حکمرانلیگی آستیده‌گی افغانستان عیاللری و قیزلری اته‌یلب تعقیب و تضییققه دچار قیلینه‌یاتگنینی اَیتدی.
اوشبو ییغیلیش، چهارشنبه کونی، ۲۴-سرطان، خلق‌ارا مدافع وکیللر کانون‌نینگ انسان حقوقلری موسسه‌سی همده جینوسایدگه جواب بېریش اتفاقی تامانیدن بریتانیاده تشکیل اېتیلدی.
اوشبو ییغیلیشده زهرا جۉیا عیاللر و قیزلر، اینیقسه هزاره عیاللری طالبان حکمرانلیگی آستیده تعقیب و تضییققه دچار قیلینه‌یاتگنینی تأکیدله‌دی.
ییغیلیش‌نینگ باشقه سۉزلاو‌چیلری اوروش بیلن باغلیق جنسی زۉرآورلیک (CRSV) قوراللی ماجرالر دوامیده صادر اېتیله‌دیگن اېنگ آغیر جنایتلردن بیری بۉلیب قاله‌یاتگنیدن آگاهلنتیرر اېکن، خلق‌ارا جنایت حقوقی ساحه‌سیده سېزیلرلی یوتوقلرگه اېریشیلگنیگه قره‌مه‌ی، جزادن خالی قالیش هنوز عادتی حال اېکنینی بیلدیردیلر.
اولر اوروش بیلن باغلیق زۉرآورلیکلرگه جنسی تجاوز، جنسی قوللیک، مجبوری حامله‌دارلیک، مجبوری نکاح، و اوروش همده حربی جنایتلر بیلن باغلیق صادر اېتیله‌دیگن جنسی زۉرآورلیک‌نینگ باشقه شکللری کیریشینی تأکیدله‌دیلر.
اوشبو ییغیلیشده بیرلشگن ملتلر تشکیلاتی حساباتیگه کۉره، ۲۰۲۵-ییلده دنیا بۉیلب اوروش بیلن باغلیق زۉرآورلیک‌نینگ قریب ۱۰ مینگ ته تصدیقلنگن حالتی قید اېتیلگنی هم معلوم قیلیندی.
