کابلده جهازلنگن پارک‌لر‌نینگ یېتیشمسلیگی؛ عایله‌لر تېکین دَم آلیش امکانیتیدن محروم
ایلیا
کابل‌نینگ اَیریم اهالیسی شهر‌نینگ تورلی حدودلریده بې‌پول و یخشی جهازلنگن دم آلیش باغلری یېتیشمسلیگیدن شکایت قیلماقده. اولر‌نینگ اَیتیشیچه، کابل‌نینگ کۉپلب حدودلریده جماعت باغلری موجود اېمس، موجود باغلر اېسه یا یشه‌ش جایلریدن جوده اوزاقده جایلشگن یاکه عایله‌لر، اینیقسه باله‌لر فایده‌لنیشی اوچون ضرور امکانیت و جهازلرگه اېگه اېمس. اولر‌نینگ سۉزلریگه کۉره، بې‌پول دَم آلیش مسکنلری‌نینگ یېتیشمسلیگی باله‌لر، اۉسمیرلر و یاشلرنی دَم آلیش، سپورت بیلن شغللنیش همده اجتماعی ملاقات قیلیش اوچون ساغلام محیطدن محروم قیلگن. اولر قۉشیمچه قیلیشیچه، کابلده اَیریم خصوصی استراحت باغلری فعالیت یوریته‌یاتگن بۉلسه-ده، قشّاقلیک، ایشسیزلیک و یوقاری خرجتلر سببلی کۉپلب عایله‌لر بو جایلردن فایده‌لنه آلمه‌یدی. اولر‌نینگ فکریچه، جماعت باغلرینی برپا اېتیش و رواجلنتیریش نه‌فقط خلق، اینیقسه باله‌لر و یاشلر‌نینگ جسمانی همده روحی سلامتلیگینی یخشیلشده مهم ا‌ۉرین توته‌‌دی، بلکه اجتماعی علاقه‌لرنی مستحکملش و شهر حیاتی صفتینی آشیریشگه هم یاردم بېره‌دی.
کابل‌نینگ دۉغ‌آباد حدودیده یشاوچیلردن بیری حمزه، شهرده بې‌پول و یخشی جهازلنگن باغلر یېتیشمسلیگیدن شکایت قیله‌دی. اونینگ اَیتیشیچه، موجود جماعت باغلری یا اولر‌نینگ یشه‌ش جاییدن جوده اوزاقده یاکه اولرده عایله‌لر، اینیقسه باله‌لر فایده‌لنیشی اوچون ضرور شرایطلر یره‌تیلمه‌گن.
بو کابل یشاوچیسی شونده‌ی دېیدی: «باله‌لر اۉینه‌شی و دَم آلیشی ممکن بۉلگن بې‌پول جایلر جوده چېکلنگن. علاوالدین، دهبوری و مکروکبی باغلر بار، اما اولرده باله‌لر اۉینه‌شی اوچون ماس واسطه‌لر و امکانیتلر یۉق. باشقه تاماندن، یخشی جهازلنگن اۉیین میدانلری‌نینگ اکثریتی خصوصی بۉلیب، اولردن فایده‌لنیش پوللیک. اصلیده، فقط کارته چهارده بیر-ایکّی جای بې‌پول. کابل حیوانات باغی هم باله‌لر اوچون اَیریم دَم آلیش امکانیتلرینی یره‌تگن، اما اوندن فایده‌لنیش هم تۉلاونی طلب قیله‌دی.»
کابل‌نینگ ینه بیر یشاوچیسی مجید، اولر‌نینگ حدودیده باله‌لری و کېکسه آنه‌سینی سَیر قیلدیریش اوچون آلیب باره آله‌دیگن بې‌پول باغ یۉقلیگینی اَیته‌دی. او قۉشیمچه قیلیشیچه، کابلده‌گی موجود بې‌پول باغلر نه‌فقط عایله‌لر اوچون ماس امکانیتلرگه اېگه اېمس، بلکه اولرده‌گی موجود واسطه و جهازلر هم تۉغری سقلنمه‌یدی. اونینگ اَیتیشیچه، بو باغلر‌نینگ اَیریملریده‌گی باله‌لر اۉیین واسطه‌لری وقت اۉتیشی بیلن اېسکیرگن یاکه بوزیلگن، اما طالبان شهر حاکمیتی مسؤوللری‌نینگ اعتبارسیزلیگی سببلی اولرنی ترمیملش و المشتیریش بۉییچه ثمره‌لی چاره‌لر کۉریلمه‌گن.
بو کابل یشاوچیسی شونده‌ی دېیدی: «باله‌لرنی باغگه آلیب بارگنیمیزده، مناسب اۉیین واسطه‌لری یۉق. واسطه‌لر‌نینگ اکثریتی سینگن یاکه جاییدن اوزیلیب کېتگن، اېسکیرگن بیر نېچته ارغیمچاق و سیرپنچیقدن باشقه باله‌لرنی کۉنگلینی آچه‌دیگن هېچ نرسه قالمه‌گن. بو‌نینگ عکسیگه، خصوصی باغلر و اۉیین میدانچه‌لری یخشی امکانیتلرگه اېگه، اما اولرگه کیریش و فایده‌لنیش اوچون پول آلینه‌دی. عادتده هر بیر کیشی اوچون چیپته تخمیناً ۳۰ افغانی توره‌دی و اگر عایله‌ده بیر نېچته باله بۉلسه، بو خرجتنی تۉله‌ش قیینلشه‌دی. رستورانتلر و دَم آلیش مرکزلری هم اۉز خدمتلرینی پول عوضیگه تقدیم اېته‌دی و حاضرگی شرایطده کۉپلب عایله‌لر بو امکانیتلردن فایده‌لنه آلمه‌یدی.»
شو بیلن بیرگه، کابل‌نینگ باشقه اَیریم اهالیسی بې‌پول و یخشی جهازلنگن باغلر یېتیشمسلیگی همده طالبان تامانیدن عیاللر‌نینگ جماعت باغلریده بۉلیشیگه قۉییلگن چېکلاولر سببلی عایله‌لری و باله‌لرینی دَم آلدیریش اوچون خصوصی رستورانتلر و کۉنگیل‌آچر مرکزلرگه باریشگه مجبور بۉله‌یاتگنینی اَیتماقده.
ساحل، کابل اهالیسیدن بیری، بې‌پول و یخشی جهازلنگن باغلر یېتیشمسلیگی سببلی کۉپلب عایله‌لر باله‌لرینی دَم آلدیریش اوچون خصوصی باغلر، رستورانتلر و باله‌لر اۉیین میدانچه‌لری تشکیل اېتیلگن موزقه‌یماق دوکانلریگه باریشگه مجبور بۉله‌یاتگنینی اَیته‌دی. او قۉشیمچه قیلیشیچه، عایله‌لر بو جایلرگه محتاج بۉلسه-ده، قشّاقلیک و ایشسیزلیک کۉپلب فقرالر‌نینگ اولردن فایده‌لنیش خرجتلرینی تۉله‌شیگه امکان بېرمه‌یپتی.
کابل یشاوچیسی ایتیشیچه: «کابلده کۉپلب خصوصی و عایله‌وی باغلر موجود، حتا اَیریم رستورانتلر و موزقه‌یماق دوکانلری هم باله‌لر اۉینه‌شی اوچون جایلر تشکیل قیلگن، اما بو جایلردن فایده‌لنیش بې‌پول اېمس. آدملر باشقه مناسب مقابل بۉلمه‌گنی اوچون مجبورا او یېرلرگه باریشه‌دی. اگر اهالی‌نینگ اقتصادی احوالی یخشیراق بۉلگنیده، عایله‌لر بو امکانیتلردن فایده‌لنه آله‌ردی. اما حاضر ایشسیزلیک و قشّاقلیک کۉپچیلیکنی حتا شونده‌ی عادی هاردیق چیقریش امکانیتیدن هم محروم قیلگن.»
کابل‌نینگ ینه بیر یشاوچیسی، اَیریم تورر جای بلاکلریده‌گی یشیل حدودلر جماعت باغلری یېتیشمسلیگی سببلی اَیریم عایله‌لر اوچون چېکلنگن دَم آلیش مسکنلریدن بیریگه ایلنگنینی اَیته‌دی. او قۉشیمچه قیلیشیچه، بو حدودلر قیسقه مدت دَم آلیش اوچون فایده‌لی بۉلسه-ده، میدانی‌نینگ کیچیکلیگی و دَم آلیش امکانیتلری‌نینگ یۉقلیگی سببلی جماعت و یخشی جهازلنگن باغلر‌نینگ اۉرنینی باسه آلمه‌یدی.
بو ییگیت شونده‌ی دېیدی: «بوگونگی کونده اَیریم ینگی قوریلگن بنالرده اهالی اوچون کیچیک یشیل حدود موجود بۉلیب، اوندن عیاللر، اېرککلر و اینیقسه کېکسه‌لر فایده‌لنماقده. اما اېسکی بنالر‌نینگ اکثریتیده بونده‌ی امکانیت یۉق. اگر برچه تورر جای مجموعه‌لری و ینگی شهرچه‌لرده یشیل حدودلر همده دَم آلیش میدانلری برپا اېتیلیشی نظرده توتیلسه، آدملر قیسقه دم آلیش اوچون شهر‌نینگ اوزاق نقطه‌لریگه باریشگه یاکه خصوصی باغلردن فایده‌لنیش خرجتینی تۉله‌شگه مجبور بۉلمه‌یدی.»
کابل شهریده کۉپلب باغلر موجود بۉلسه-ده، اولر‌نینگ اکثریتیده باله‌لر اوچون ماس اۉیین واسطه‌لری یۉق یاکه موجود امکانیتلر جوده عادی و بوزیلگن. بو باغلر‌نینگ تورلی بورچکلریده یا یاشلر و کېکسه‌لر سگرت چېکیب اۉتیره‌دی یاکه فقط بیرته توپراقلی فوتبال میدانی بۉلیب، اونده اۉغیل باله‌لر اۉینه‌یدی.
بو حالت کابل اهالیسی‌نینگ موجود باغلرگه باریش اۉرنیگه کۉپراق رستورانتلرگه مراجعت قیلیشیگه سبب بۉلگن. بو جایلرده باله‌لر اۉینه‌شی و دَم آلیشی اوچون اَیریم امکانیتلر یره‌تیلگن. شونگه قره‌مه‌ی، کابل شهریده فقط آز سانلی عایله‌لر اۉز فرزندلرینی برق‌ده ایشله‌یدیگن اۉیین واسطه‌لری موجود بۉلگن بونده‌ی اۉیین شهرچه‌لریگه آلیب باره آله‌دی. بونده‌ی جایلرده باله اتیگی یریم ساعت بۉلیشی اوچون هم سېزیلرلی مقدارده حق تۉله‌شی کېره‌ک.
شهر نو پارکی، آریوب زازی پارکی، پارک شهر و دهبوری باغی کابل شهری‌نینگ اېنگ ییریک باغلریدن حسابلنه‌دی. آدملر دَم آلیش اوچون اوشبو باغلرگه باره‌دیلر. بیراق، سۉنگگی آیلرده بو باغلر‌نینگ اَیریملریدن فایده‌لنیش اهالی اوچون چېکلنگن یاکه بوتونله‌ی تۉخته‌تیلگن.
