ایران ویزه‌سی بېریلیشیده‌گی چېکلاولر؛ قاره بازارده ویزه نرخی ایکّی مینگ دالرگچه یېتماقده
بیر قطار ایران ویزه‌سی طلبگارلری کابلده اوشبو ویزه قاره بازاری کېنگه‌یگنیدن شکایت قیلماقده. اولرنینگ ایتیشیچه، اۉتگن بیر ییل دوامیده ایران ویزه‌سینی بېریش جریانیده‌گی کېنگ کۉلملی چېکلاولر نارسمی بازارده ویزه ساتیب آلیش و ساتیش نینگ کېنگه‌ییشیگه شرایط یره‌تگن. بو طلبگارلرگه کۉره، ایران ویزه‌لری حاضرده کمیشن‌کارلر و ایران اېلچیخانه‌سی بیلن یقین علاقه‌لرگه اېگه اَیریم سیاحلیک کمپنیلری آرقه‌لی جوده قیمت نرخلرده ساتیلماقده. اولر اَیریم ویزه‌لرنینگ نرخی ۱۶۰۰ دن ۲ مینگ دالرگچه یېتیشینی قۉشیمچه قیله‌دی. بو طلبگارلر ۸صبح گزېته‌سی بیلن صحبتده ایش، دوالنیش، اۉقیش یاکه عایله اعضالرینی کۉریش مقصدیده سفر قیلماقچی بۉلگنلر اوچون هم ایشچی و طبی ویزه‌لرگه قۉل تاپیش جدّی چېکلاولر و کتّه خرجتلر بیلن باغلنگنینی ایتیشه‌دی. اولرنینگ فکریچه، اوشبو حالت نینگ دوام اېتیشی کۉپلب آدملر اوچون ایران سفرینی قیینلشتیرگن.
طلبگارلر ایران رسمیلریدن افغانستان وطنداشلری اوچون ویزه بېریش نینگ رسمی، شفّاف و آچیق تیزیمینی قَیته یۉلگه قۉییشنی سۉره‌شماقده، شونده واسطه‌چیلرنینگ سوءاستعمالی و ویزه قاره بازاری نینگ کېنگه‌ییشی برطرف اېتیله‌دی.
ایران ویزه‌سی طلبگارلریدن بیری، اوچ آیلیک اورینیشلریگه قره‌مه‌ی هلی هم اوشبو مملکت ویزه‌سینی آلالمه‌گنینی ایته‌دی. اونینگ سۉزلریگه کۉره، ایشچی و طبی ویزه‌لر چېکلنگن مقدارده افغانستان وطنداشلریگه بېریله‌یاتگن بۉلسه-ده، سیاحلیک ویزه‌سی نینگ تۉخته‌تیلیشی طلبگارلر آره‌سیده چلکشلیکنی آشیریب، ویزه قاره بازاری نینگ کېنگه‌ییشیگه سبب بۉلگن. او واسطه‌چیلر و اَیریم سیاحلیک کمپنیلری موجود چېکلاولردن فایده‌لنیب، ویزه‌لرنی جوده قیمت نرخلرده ساته‌یاتگنینی قۉشیمچه قیله‌دی.
بو طلبگار شونده‌ی دېیدی: «سۉنگگی اوچ آیده رسمی یۉللر آرقه‌لی ویزه آلیش اوچون کمیده ۱۰ ته سیاحلیک کمپنیسیگه مراجعت قیلدیم، اما هنوزگچه موفقیتگه اېریشمه‌دیم. ایشچی و طبی ویزه اوچون هم عریضه بېرگنمن، لېکن هر سفر تورلی تۉسیقلرگه دوچ کېله‌من. خرجتلر جوده یوقاری، کوتیش وقتی اېسه جوده اوزاق. مېن هالند بیلیم یورتلریدن بیری‌ده دوکتورلیک باسقیچی اوچون قبول آلگنمن و صحبت اوچون ایرانگه باریشیم کېره‌ک، اما هنوز ویزه آلالمه‌دیم.»
او ایران اېلچیخانه‌سی ایچیده اَیریم شخصلر واسطه‌چیلر و قاره بازارده فعال کمپنیلر بیلن همکارلیک قیله‌یاتگنینی دعوا قیله‌دی.
سبحان، ینه بیر ایران ویزه‌سی طلبگاری، یوزلب دالر تۉله‌ب و آیلر دوامیده کوتگنیگه قره‌مه‌ی هنوز ویزه آلالمه‌گنینی ایته‌دی. او ایران سفرینی تنلاو اېمس، بلکه ضرورت دېب حسابله‌یدی و چېکلاولرنینگ دوام اېتیشی طلبگارلر اوچون کتّه معمالر توغدیره‌یاتگنینی تأکیدله‌یدی.
بو ییگیت شونده‌ی دېیدی: «ایران ویزه‌سینی آلیش شرایطی آلدین هم قیین اېدی، اما سۉنگگی اۉزگریشلردن کېین ینه‌ده آغیرلشدی. عادتده ۱۰ الی ۱۵ مینگ افغانیگه آلینیشی ممکن بۉلگن ویزه حاضر قاره بازارده ۱۵۰۰ دالرگچه یېتماقده. کۉپلب سیاحلیک کمپنیلری و واسطه‌چیلر آدملرنینگ مجبوریتیدن فایده‌لنماقده. آدملر قشّاقلیک، ایشسیزلیک و تورلی احتیاجلر سبب سفرگه مجبور، اما واسطه‌چیلر و اَیریم کمپنیلر کتّه کمیشن‌لر آلیب، ویزه نرخینی بیر نېچه برابر آشیریب یوباریشگن. بو حالت طلبگارلرنی جدّی معمالر و سرسانلیککه دچار قیلماقده.»
شو بیلن بیرگه، اَیریم سیاحلیک کمپنیلری مسووللری رسمی ویزه‌لرگه قۉل تاپیش چېکلنگنلیگی کۉپلب طلبگارلرنی نارسمی بازارگه یۉنه‌لتیرگنینی و کمپنیلر فعالیتی نینگ بیر قِسمینی تنزلگه آلیب کېلگنینی ایته‌دی. اولرنینگ فکریچه، بعضی سیاحلیک کمپنیلری هم قاره بازارده ویزه ساتیش و ساتیب آلیش جریانیده اشتراک اېتماقده. بو مسووللر طالبان اوشبو کمپنیلر و ویزه سوداسی جریانینی ثمره‌لی نظارت قیلمه‌یاتگنینی دعوا قیلیشه‌دی.
سیاحلیک کمپنیلریدن بیری مسوولی امین (مستعار)، ایران و پاکستان ویزه‌سی بېریلیشیده‌گی چېکلاولر ویزه قاره بازاری نینگ کېنگه‌ییشیگه سبب بۉلگنینی و کمپنیلر فعالیتینی جدّی پسه‌ییشگه آلیب کېلگنینی ایته‌دی. او شونده‌ی دېیدی: «بو درجه‌ده ایشیمیزگه تأثیر قیلدی که اداره‌میزنی یاپیشگه مجبور بۉلدیک. مزاجلر ویزه اوچون کتّه خرجتلرنی تۉله‌شگه قادر اېمس، نتیجه‌ده قاره بازار رسمی جریان اۉرنینی اېگه‌لله‌دی.»
او، شونینگدېک، افغانستان وطنداشلریگه ویزه بېریش و چېگره‌لردن اۉتیش جریانیده‌گی معامله‌دن هم تنقید بیلدیره‌دی. اونینگ سۉزلریگه کۉره، کۉپلب افغانلر قانونی تۉلاولرنی تۉله‌گن بۉلسه هم ویزه رد جوابینی آله‌دی و اَیریم اۉتیش یۉللریده ناتۉغری مناسبتگه دوچ کېله‌دی. او قۉشیمچه قیله‌دی: «پاکستانلیکلر اوچون افغانستان ویزه‌سی آلیش آسان و ارزان، اما کۉپلب افغانلر پول تۉله‌گن بۉلسه هم رد اېتیله‌دی. حاضر اېنگ کۉپ طلب اروپا دولتلری، اینیقسه تورکیه ویزه‌سیگه بۉلیپتی.»
۸صبح گزېته‌سی بیر قطار سیاحلیک کمپنیلری بیلن صحبت آرقه‌لی ایران ویزه‌سی قاره بازارده تورلی نرخلرده ساتیله‌یاتگنینی انیقله‌گن.
صحبت قیلینگن منبعلرگه کۉره، «تېزکار» دېب اتله‌دیگن ویزه ۷ کون ایچیده تخمیناً ۱۷۵۰ دالر توره‌دی، باشقه تورلری اېسه ۱۵۰۰ و ۱۳۸۰ دالر اطرافیده بۉلیب، ۷ الی ۱۰ کون کوتیش بیلن ساتیله‌دی. اولرنینگ ایتیشیچه، پاکستان ویزه‌سی هم نارسمی بازارده ۳ مینگ دالردن نرخده ساتیله‌دی. منبعلر نرخلر ویزه توری، بېریلیش وقتی و واسطه‌چیلرگه قره‌ب اۉزگریشینی، اَیریم حاللرده رسمی نرخلردن انچه یوقاری بۉلیشینی ایته‌دی.
ایران، افغانستان وطنداشلری اوچون مهم سیاحت و مهاجرت یۉنه‌لیشلریدن بیری بۉلیب، هر ییلی مینگلب آدملر ایش، دوالنیش، تعلیم و عایله اعضالرینی کۉریش مقصدیده اوشبو مملکتگه باره‌دی. ایران اسلام جمهوریتی کابلده اېلچیخانه‌گه، هرات، جلال‌آباد، قندهار و مزارشریف‌ده کنسوللیکلرگه اېگه.
بیراق طلبگارلرنینگ ایتیشیچه، سۉنگگی بیر ییلدن آرتیق وقت دوامیده ایران ویزه‌سینی آلیش جریانی ینه‌ده چېکلاولی و مرکّب بۉلیب کېتگن. اولرنینگ فکریچه، رسمی یۉللرگه کیریش کمه‌یگن بیر پیتده ویزه قاره بازاری کېنگه‌ییب، اَیریم سیاحلیک کمپنیلری ویزه‌نی بیر نېچه برابر قیمتگه ساتماقده.
شو شرایطده ویزه‌گه کیریش قیینلشووی و سفر خرجتلری نینگ آشیشی قۉشنی دولتلرگه، جمله‌دن ایرانگه ایش، دوالنیش، تعلیم یاکه مهاجرت مقصدیده باریشگه محتاج وطنداشلر اوچون ینگی معمالرنی یوزه‌گه کېلتیرگن.
